Derya Ren

 

AMED - Arzu Karman ke hemverê tecrîdî 2016 de tewrê grevê vêşanîye bîye, derheqê komployê mîyanneteweyî de wina vat: “Sere de cinîyê kurdî û heme cinî, ganî dorê paradîgmayê ke Birêz Ocalan dayo werte, bibê yew. Seba ke xêrcê nê xelasîya ma çin a."

 

Rayberê PKKyî Abdullah Ocalan ke 15ê Sibata 1999ine de bi komployê mîyanneteweyî ardî Tirkîya, binê şertê giran yê tecrîdî de yeno tepiştiş. 1999 ra heta ewro, bi mîlyonan kesî komplo protesto kerd û xeylêk kesî bedenê xo da verê adirî, çalakîya ‘Şima nêeşkenê roja ma tarî bikerê’ kerdî. Sewbîna xeylêk kesî kewtî grevê vêşanîye.

 

Serê komployî de 23 serrî derbaz bi û tecrîd roj bi roje giran bi. Hemverê tecrîdî hem zîndanan de, hem teber de xeylêk rey grevê vêşanîye ameyî kerdiş. Nê grevan ra yew zî 5ê êlule 2016ine de amebi kerdiş. Dimayê peynîbîyayîşê prosesî dir muzakereyê caardişê giranî yê tecrîdî kerdî û bi amancê protestokerdişî, hemseraka KCDyî Leyla Guven, 50 siyasetmedarî awanîya DBPyê Amedî de çalakiya grevê vêşanîye dayî destpêkerdiş. Hemseraka DBPya Amedî Arzu Karaman ke o wext aye zî tewrê grevî bî, derheqê prosesê komplo û tecrîdî de qisey kerd.

 

Arzu ke 1999ine de 9 serrî bî, dîyar kerd ke pêwa tute bîya xoverdayîş de ca girewta û vat: "Her ca de însanî rawuştî bî serê lingan. Sere de dayîkî her kes kewt grevê vêşanîye û beşdarê çalakîyê nobetan bi. Çalakîyê ke dayîkê ma ci de ca gênê, ma kelecan kenê. Nê emrî de ma bi rastîyê xo dir ameyî rî bi rî. Bi komployî waştî ke şarî çin bikerê. Şarê kurdî pêwa pêro çî wayîrê rayberêko stratejîk û bi taktîk bî.”

 

‘Rastîyê şarê ke wayîrê serekî vejênê esto'

 

Arzuye wina bale ant ser: “Şarê kurdî 1999ine de dorê serekî de xelakê adirî awan kerd. Bi desan kesî bedenê xo dayî verê adirî. La dewlete çîyêk winasî nêpawitêne. O wext xoverdayîş ame destpêkerdiş. Rastîyêke şar ke wayîrê serekî vejîya esto. Dewleta tirkî waşt ke şarê kurdî serekî ra bivisno. La hedefê înan bi ca nêame. Kes nêeşka bikewo mabêne. Na rewşe ewro zî dewam kena."

 

‘CPT xoser nîyo'

 

Arzu tewr peyîn wina vat: “Tecrîdê serê Birêz Ocalanî sere de serê şarê Rojhelato Mîyanên û heme şarê dinya de bi ca yeno. Her kes ganî nê bizano. Xelasîya ma hemine ya. Têkoşînê şarê kurdî hemverê tecrîdî her tim dewam keno. 2018ine de bi rayberîya Leyla Guven grevê vêşanîye ame destpêkerdiş. Netîceyê têkoşînî de 7 embazê ma şehîd kewtî. La her tim xoverdayîş dewam keno. Ewro CPT kewto binê kontrolê zîhnîyetê dewletpawitoxî. Îmraliyî de sûcê merdimayî yeno kerdiş. La nê nêanê rojeva xo. No zî nê ramojneno CPT xoser nîyo."