RIHA - Çalakîya 'Nobeta Edaletî' ya Kayeyê Şenyaşarî ya ke verê Edlîyeyê Rihayî de dest pê kerdbî roja 344ine de dewam kena.

 

Qezaya Pirsûsî ya  Rihayî de 14ê Hezîrane ya 2018ine de pawitox û merdimê Parlementerê AKPyî Îbrahîm Halîl Yildiz hêrişê keyeyê Şenyaşarî kerd. Netîceyê hêrişan de di lajî û mêrdeyê Emîne Şenyaşar e dinyaya xo bedilnayî û lajê aye Ferît  zî bi birîndarî xelesîyabî. Nobeta Edaletî ya Emîne û Ferît Şenyaşarî  9ê Adare de verê Edlîyeyê Rihayî de dest pê kerdbî roja 344ine de dewam kena.

 

Keyeyî serê hesabê xo yê Medyaya Dîjîtale de wina venga rayaumûmî rê kerd: "Sebebo ke heqaret ro Parlementerê AKPyî Îbrahîm Halîl Yildizî rê kerd o, Emîne Şenyaşare rê ceza ameya birnayîş. Îbrahîm Halîl Yildiz ke parlementerê keyeyê xo yo, Emîne rê dewa akerd û qezenc kerd. Bi talîmatan parlementerê AKPyî  dewa qezenc kenê. Kesê ke verê şarî de vindî kenê eşkera yê."