Dîlan Babat

 

ENQERE - Parlamentera verê ya HDPyî Tugba Hezer, hewldayîşê betalkerdişê parlamenterîya Semra Guzel a HDPyî de erjnayîş kerd û vat, Nê serebûtî prosesê derheqê Semra Guzel de nîyê û wina helwestê muxalefetî rexne kerd: “Gelo bi reynakerdişê polîtîkayê şaş yê rejîmê Erdoganî do Tirkîya demokratîk bikerê."

 

Munaqeşeyê derheqê betalkerdişê parlamenterîya Semra Guzel a HDPyij demêk derg o dewam keno.  Komîsyonê Têmîyan yê Desturê Bingehîn- Edeletî rapor û şerhê muxalefetî cigêrayîş kerd û seba Semraye hewteyêk prosesê seba pawitişê nuşteyî û ame naskerdiş. Dimayê pawitişê ke Semra bido, Komîsyon do seba wedaritişê destnêdayîşî bido raydayîşî. Eke qerarê derheqê destnêdayîşî de bêro dayîş, rapor do hewaleyê Heyetê Pêroyî yê Meclîsî bêro kerdiş. Vengdayîşê Heyetê Pêroyî de wedaritişê destnêdayîşî dîyar bibo.

 

Parlamentera verê ya Partîya Demokratîke ya Şaran (HDP) Tugba Hezer ke verê parlamenterîya aye amebî betalkerdiş, derheqê rewşa parlamenterî Semra Guzel de qisey kerd.

 

‘Ma xerîbê nê prosesî nîyê'

 

Tugba wina bale ant serê prosesî û vat: “Serê vatişêk parlamentera HDPyî de hêriş kenê. Nê hêrişî dir hukm kenê dewre û prosesêke sey wedaritişê destnêdayîşî kenê dewre. Wexto ke nê kenê zî çapemenî ra bigîrê heta hukmî heme îmkanê kenê seferber. Dişminîyê hemverê cinî û kurdan kenê dewre. Bi hewtan fotografêke derheqê Semra de serwîs kenê. Wexto nê kenê zî merdiman rojeva rast ra dûr fînenê."

 

‘Serê Semra de prosesêke plankerde kerdî dewre' 

 

Tugba dewam de wina vat: “Fotografê aîdê 2014ine ewro anê rojeve. O wext Semra Guzel parlamenter nêbî û endama partî nêbî zî. 2017ine de zî parlamenter nêbî, 2018ine de pêwa Semra Guzel ameya weçînayîş zî, cipersayîşêk nêameyo akerdiş. La  2022 de fotografêke yeno serwîskerdiş. No prosesêke plankerde yo hetê îqtîdarî ra yeno kerdiş. Rejîm her hat ra krîzêk ciwîyeno. Nê krîzî de zî hêrişê hemver HDPyî de bêmabên dewam keno. Serê nê fotografî de hemverê HDPyî de dewaya padayîşî xebitneno."

 

Helwestê muxalefetî yê hemverê HDPyî

 

Tugba bal ant serê helwestê muxalefetî û vat: "Demo ke helwestê muxalefetî wina bo, vatişê serê demokratîkbîyayîşê Tirkîya zî manaya ci çin o. Muxalefet vera kerdişan bêveng maneno. 2016ine de demo ke destnêdayîş ameyî wedaritiş Kemal Kiliçdaroglu vat ‘Hemverê destura bingehînî yo la ma do vajê erê.' Dadgeha Heqê Merdiman ê Ewropayî (DMME) qerarêk binpaykerdişî ame û DMMEyî tena Erdogan ney CHP zî mahkum kerd. Dima ra Kemal Kiliçdaroglu vat, ‘Ez bêrî îqtîdar ez o Qendîl tarû mar bikerî.’ Manaya nê zî no yo; Erdogan pêwa her çî biser nêkerd û ez o nê welatî tewr zêde feqîr bikerî û problemê kurdan de safîkerdiş çin o." 

 

‘Problemê kurdî problemê terorî nîyo'

 

Tugba tewr peyîn wina vat: “Seserra polîtîkaya dewlete ya hemverê kurdan de netîceyêk nêdano. Dewlete waştişê şarê Kurdî zana. Seba nê gorî berjewendîyê netew dewlete hemverê nê ya. Bêvengîya muxalefetî ya vera qeyûman, tesdîqkerdişê tezkereyê şerî, wedaritişê destnêdayîşî, tena hêrs pîl keno. Bi nê metodî netîce nîno giirewtiş û ganî muxalefet êdî nê fam bikero. Problemê kurdî problemê terorî nîyo. Ganî muxalefet do wina bivîno û têbigeyro."