Şîrîn Çinar

 

AMED - Sîyasetmedarê cinîyan dîyar kerdî ke ganî tepişteyê nêweşî û Aysel Tugluk bêro veradayîş û sewbîna vatî, heta nêrê veradayîş do têkoşînê înan dewam bikero.

 

Binpaykerdişê heqan yê zîndanan her ke şino zêde beno û tepişteyê nêweşî pêwa rewşa înan ê giranî nînê veradayîş. Hetê îdarekarîyê zîndanî ra dermankerdişê tepişteyê nêweşan yeno astengkerdiş û îdarekarî rewşa tepişteyê nêweşî bêveng ê. Nê nêweşan ra yewe zî tepişteya giran ya sîyasetmedara kurde Aysel Tugluk a. Aysel Tugluk  2016 ra heta nika zîndanê Tîpê Fyê Kandira yê Kocaelî de tepişte ya.

 

13ê êlule 2017in de dimayê hêrişê nîjadperst yê hemverê cenazeya dayîka Aysel Tugluke, teşhîsê demansî Aysele rê ame ronayîş. Aysele seba rewşa weşîye nêeşkena tena cuya xo dewam bikero û pêwa raporê doktoran yê ‘nêeşkena zîndan de bimano' zî ATKyî verpayê ci rapor dayo.

 

‘Wa embazê ma bêrê veradayîş'

 

Hedîye Daşçi îdarekara HDPyî ya Amedî de ca gêna wina vat: "Doktoran raporê ‘nêeşkena zîndan de bimano' da. La pêwa nê ATKyî raporê verpayê ci da. Tepişteyê  nêweşî nêrê veradayîş û înan ra yew zî Aysele ya. Ma sîyasetmedarê cinî veng danê ke ganî embaza bêro veradayîş."

 

‘Hewcedarîyê tepişteyê nêweşan bi ca nîno'

 

Endama Meclîsê Cinîyan ê HDPyî Ayhan Akgul zî wina bale ant: "Tecrîdê serê tepişteyê sîyasîyan roj bi roje giran beno. Netîceyê nê de bi hezaran embazê ma problemê weşîye ciwîyenê. Tepişteyê rewşa înan giran nêeşkenê tena cuya xo dewam bikerê. Seba nê cenazeyî zîndanan ra vejênê. Çi heyf, prosesê peyîn xeylêk cenazeyî zîndanan ra vejîyayî."

 

‘Wa ganî bêrê veradayîş'

 

Ayhane dewam de wina vat: “Pêwa rewşa aye ya giran nîna veradayîş. Doktoran raporê ‘nêeşkena zîndan de bimano' dayî. La ATKyî nê asteng kerd. Na babete de ganî  huqûq wezîfeyê xo bi ca bîyaro. Ganî problemê tepişteyê nêweşî bêro çareserkerdiş. Waştişê ma oyo ke Aysele û heme tepişteyê bînan yê nêweşî ganî bêrê veradayîş."

 

‘Ma do bibê vengê Aysel Tugluk’

 

Vervatoxa Meclîsê Cinîyan ê HDPyî Amedî Yasemîn Uçer zî reaksîyon vera nê dayî: “Her kes rewşa zîndanan zano. Na rewşe serra vîyarte de zî ameyîne ciwîyayîş û hema zî dewam kena. Partîyê îqtîdarî wexto ke tengezar benê, hêrişê cinîyê kurdan kenê.  Polîtîkayê ke nika yenê kerdiş nê ramojnenê. La ma tu wext bêveng nêmendî. Ma peyser game nêeştî. Ma do hemverê polîtîkayê tecrîdî bêveng nêmanê û ma do bibê vengê Aysele û heme tepişteyê nêweşan."