Rabîa Onver 

 

COLEMÊRG - Dayîkê Aştîye derheqê tecrîdê giran ê serê Rayberê PKKyî Abdullah Ocalanî de qisey kerdî û dîyar kerdî ke heta no tecrîd nêwurzo, aştî do mimkun nêbo û mifteyê azadî û aştî destê Abdullah Ocalanî de yo.

 

Tecrîdo giran ê serê Rayberê PKKyî Abdullah Ocalan dewam keno û bi 10 mengî tu xebere ci ra nîno girewtoş. Muracatê avûkat û keyeyî zî bêsebeb yenê redkerdiş, yan zî cewab nîno dayîş. Polîtîkayê tecrîdî yê giran ê serê Rayberê PKKyî Abdullah Ocalan dewam keno û pêwa nê îhlalkerdişê heqan zî her ke şino zêde beno.

 

Endamê Meclîsê Dayikan ê Aştîye ya Geverî derheqê tecrîdê serê Rayberê PKKyî Abdullah Ocalanî de ercnayîş kerdî û dîyar kerdî ganî tecrîd peynî bibo.

 

‘Wa Serek û heme tepişteyî bêrê veradayîş'

 

Dayîka Aştîye Gulçîn Karabuk dîyar kerd ke tecrîdê serê Abdullah Ocalanî dewam keno, qebûl nêkenê û ganî no tecrîd peynî bibo û vat: "Ma wazenê tecrîdo giran peynî bibo. Wa êdî berê zîndanan abibo. Wa serek û heme tepişteyî bêrê veradayîş. Gelo no bi çend cenaze zîndanan ra vejîyayî. Êdî bes o wa dayîkî nêbermê. No dej heta key dewam bikero. Êdî bes o. Wa tecrîd wedarnê. Wa cenazeyî zîndanan ra nêvejîyê. Vanê ‘ma wayê û birayê’, gelo no wina beno? Edalet nêmendo. Ma edelet wazenê."

 

‘Wa ganî avûkatî pêvînayîş bikerê'

 

Gulçîne wina dewam kerd: “Redkerdiş bêhuqûqî yo. Xora serek destê înan de esîr o. Heqê ey esto keye û avûkatanê xo bivîno. Yewin çîyo ke ma meraq kenê, çira ma nêeşkenê xebere serekê xo ra bigîrê. Waştişê ma oyo ke avûkatî lezabez şêrê Îmrali.”

 

‘Mifteyê azadî destê serekî de yo'

 

Dayîka Aştîye Gulê Polat zî wina vat: “23 serrî yo tecrîd dewam keno. Ganî tecrîd bêro wedaritiş. Bi aşman o ne avûkat ne zî keyeyî eşkenê şêrê verê serekî. Mifteyê aştî û azadî destê serekî de yo. Wa tecrîdê serê serekî û tepişteyan bêro wedaritiş. Wa êdî cenazeyî zîndanan ra nêvejîyê. Nika ma pêro binê zulmî de yê. Heta tecrîd nêwurzo, no zulm zî do dewam bikero. Wezaretê dade wezîfeyê xo nêkeno. Wezîrê dade ney, wezîrê zilmî yo, zilm ma hemine rê keno."

 

‘Hewl danê ke ma biqedênê’

 

Dayîka aştîye Zozan Gurbuz zî wina qal kerd: “Bi aşman o ma serekê xo ra xebere nêgînê. Avûkatan çend rey muracat kerd la qebûl nêkerdî. Ma wazenê no tecrîd serê serekî û tepişteyan de bêro wedaritiş. Wa no zilm biqedîyo, tabutî zîndanan ra nêvejîyê. Gelo do heta ça serekî tecrîd bikerê. 40 mîlyonî Kurdî estê û wazenê bi no hawa Kurdan biqedênê. La ma nêqedênê. Ma êdî aştî û azadî wazenê. Ma heme binê zulmî de yê. Yewin waştişê ma wedaritişê tecrîdî yo."