Sema Çaglak

 

MÊRDÎN - Merkezê Cinîyan ê Gulşîlave ke vernî qeyûmî tayînê şaredarîye bêro kerdiş xeml û rengê cinîyan bî, dimayê qeyûmî û pey ra bêveng û tal a. Nameyê komeleye nêameyo bedilnayîş û nêameyo girewtiş la cinî ci de çinî yê.

 

Tayînkerdişê qeyûman ê seba şaredarîyanê mintiqayî seke yew metodê polîtîkayê şerê xusûsî ameyê xebetnayîş. Serra 2016î de wexto qeyûm tayînê şaredarîyan kerdî heme sazgehê ke xizmet danê komele xebatê înan ameyî vindertiş. Qeyûm sere ra hêrişê  serê destqezencê cinîyan kerd û xebatê înan dayî vindarnayîş. Prosesê qeyûman de xeylêk sazgehê cinîyan ê ke binê banê şaredarîyan de bî ameyê girewtiş. Tena nê sazgehe  ke xizmet dayêne ciniyan,  sazgehe xizmetê ziwanî û kulturê Kurdî kerdê zî ameyî girewtiş û xeylêk kesi kar ra ameyî eştiş. Xeylêk awanîyê ke sazgehê cinîyan bî, hetê qeyûman ra yan ameyî rotişî yan zî bi destûrê hukmatî seke muftuyîtî yan zî binê nameyê 'Perwerdeyê Şarî' de ameyî rotiş. Nameyê sazgehê cinîyan ameyî bedilnayîş û hêriş duştê cinîyan de ame ca.

 

Yew ê sazgehan ra ke yan ameyî girewtiş yan zî muhtewayê înan amî talkerdiş zî Merkezê Cinîyan ê Gulşîlave ya girêdayîya Şaredarîya Nêsêbînî ya Mêrdînî ya. La belê dimayê weçînayîşê 31ê Adare ya 2019î ke şaredarî newe ra bidestkerd, xebatê seba cinîyan newe ra ameyî destpêkerdiş. Hemşaredarîyê Nisêbînî dima ra ke ameyî serê wezîfeyî, Merkeza Cinîyan ê Gulşîlave newe ra aktîf kerd.  Şaredarîye qeza de bi seferberîya ke seba Ziwanê Kurdî da destpêkerdiş. Pêwa heme astengîyan  şaredarî  vera xebatê xo yê serê Kultur û Hunerê Kurdî de hetê şarî ra rastê eleqeyêka pîl e amî. Dima ra qeyûm hewêna ame tayînkerdiş, newe ra reyna xeylêk sazgehî û nê sazgehan dir Merkeza Cinîyan ê Gulşîlave zî ame girewtiş û o kuçe seba xebatkarê komeleye qedexe kerd. Nika sazgehe seba çi yena xebetnayîş nîno zanayîş.

 

'Qeyûm cinîyan her wareyî ra dûrî vist'

 

Sîdar Sari ke, verîyê qeyûmî Merkezê Cinîyan ê Gulşîlave de perwerdeyê kompîtorî û muzîkî vînayne,  dîyar kerd ke kuçeyo seba sazgehî amebî cîyakerdiş,  tena cinî û tutan eşkayêne ci de xebate bikerdêne. Sîdare  ard ziwan ke, qeyûm averşîyayîşê cinîyan nêwazeno û vat: "Vernîyê qeyûmî  no kuçe, tutan ra bigîro heta cinîyanê 70 serreyî ra ci de bî û aîdê înan bî. Nê kuçeyî de qursî ameyêne dayîş û perwerde cinîyan rê ameyêne dayîş. Perwerdeyê seke fotoxraf, muzîk, ziwan, kompîtor û edebîyat seba cinîyan ameyêne dayîş. Mi ûca de perwerdeyê muzîkî vîna û ma têreyde deyîrî vatêne. Sewbîna konserî zî ameyêne dayîş. Eleqeyêke zaf baş bîbî û cinîyan ûca de wextê weşî û renginî derbas kerdêne."

 

'Nameyê sazgehî nêbedilîyayo la cinî ci de çinî yê'

 

Sîdare ard ziwan ke, dimayê qeyûmî êdî cinî nêeşkenê na sazgehe bixebetno û wina dewam kerd: "Nika no sazgeh seba çi yeno xebetnayîş nîno zanayîş. Der û dora ci zî seke parke yena xebetnayîş û kesê ke yenê, seba seyrane yenê. Na sazgehe seba averşîyayîşê cinîyan xeylêk baş e bî. Ma cinîyan o wext serê sibayî ra heta şanî serê babetanê tewir bi tewirî munaqeşe kerdê û wexto mird û pirr derbas kerdê. La çi heyf ke nika qeyûm wazeno her tewirî cinîyan apey de verdo. Cinî her çîyî ra ameyî dûrîvistişî. Nameyê sazgehî nîka eynî yo, la seba cinîyan tu çîyêke ci de çinî yo."