Sema Çaglak

 

MÊRDÎN - Cinîyê ke komployê mîyanneteweyî şermezar kerdî, dîyar kerdî ke tecrîd dewamê komployî yo û wina vatî: "Ganî hemverê tecrîdî de bêveng nêro vindertiş. Pêwa nê hende hêriş, tehda û zordestîye lazimî bi yewîyîye esta."

 

Rayberê PKKyî Abdullah Ocalan ke 15ê Sibatî yê 1999î de bi komployê mîyanneteweyî ame destbendkerdiş û Zîndanê Asayîşî yê Berz ê Îmralî de ame tepiştiş. Dimayê ke Abdullah Ocalan Zîndanê Îmralî de ame tepiştiş, girawe pêro seke mintiqayê asayîşî ya xusûsî ame îlankerdiş û tedbîrê awarte yê eskerî ameyî girewtiş. Hemverê Ocalanî de polîtîkayêka girankerde ya îzolasyonî kewt dewre. Sewbîna hemverê tecrîdo ke rojane serê Abdullah Ocalanî de yeno kerdiş, heme sazgehî û dezgeyê heqê merdiman, bêvengîya xo pawenê.

 

Derheqê Komployê Mîyanneteweyî û tecrîdo ke 23 serrî yo Îmralî de serê Rayberê PKKyî Abdullah Ocalanî de yeno domnayîş ke,  cinîyê ke şahidî prosesê 15ê Sibate rê kerdê û seba komployê mîyanneteweyî kewtê grevê vêşanî  nîyadîyayîşê xo ajansê ma rê pare kerdî.

 

'Ma no komplo tu reyêke qebûl nêkerd û ma şermezar kenê'

 

Cemîle Akbaye ke Qoserê Mêrdînî de dîyar kerd ke, serra 1998î de Abdullah Ocalan ame tepiştiş mintiqa de reaksîyonê pîlî ameyî dayîş û pêwa ê reaksîyon û têkoşînan zî tehda û zordestî zafêr bî. Cemîle wina behsê nê prosesî kerd: "A roje ez mîyanê hêgayî de xebetîyayêne. Wexto ke şan de ez ameya keye, ez mêrdeyê xo ra pêhesîyawa Abdullah Ocalan ameyo destbendkerdiş. Ma bi na xebere xeylêk dejayî û mintiqa de duştê komployî de tewir bi tewir  çalakîyî ameyî organîzekerdiş. Wexto ke Abdullah Ocalan bi komployî ame destbendkerdiş, ma Qoser de xeylêk dadîyî kewtî grev. Ma qezayê Qoserî de çadirê çalakî kerdî a. Serê sibayî ra heta şanî ma ûca de nobete de bîyêne. Sewbîna ma dest bi  grevê vêşanî kerd. 3 rojî him Qoser de him zî Mêrdîn de ma grev de mendî. Ha nika zî o grev tayê cayan de yeno dewamkerdiş. Ma no komplo tu reyêke qebûl nêkerd û ma şermezar kenê."

 

'Ganî hemverê tecrîdî de bêveng nêro mendiş'

 

Cemîle peynîya qisanê xo de bale ante serê tecrîdî zî û ard ziwan ke tecrîd dewamîya komployê mîyanneteweyî yo û qiseyanê xo de wina behs kerd: "Ez no tecrîdo ke serê Birêz Ocalanî de yo zî qebûl nêkena. Wazena Birêz Ocalan azad bibo û tecrîd peynî bêro. Sewbîna tecrîdo serê tepişteyan de yo zî wa bêro wedaritiş. Heme tepişteyê ma yê sîyasî û kesê ke vera fikr û fehmê xo tepişteyê wa bêrê veradayîş. No tehdayo ke serê tepişteyan de yo netîceyê tecrîdê serê Birêz Ocalanî yo. Wa dadî nêbermê. Wa tu kes dej û zilm nêanco. Waştişê ma dadîyan tena aştîyêke mende û edalet o. Ganî wijdan bibo û heme tepişteyî bêrê veradayîş. Nika tehda û astengîyî serê ma de estê û ma nêwazenê êdî bi nê tehdayan bixejilîyê. Ma şer, kiştiş û destbendkerdiş nêwazenê."

 

'Nê no komplo nê zî  tecrîd yeno qebûlkerdiş'

 

Hefsadî Aslan zî ard ziwan ke Şarê Kurdî pêwa hende zilm û zordestîye sere çewt nêkerdo û dîyar kerd ke bi hezaran Kurdan vera dewaya heq û bîyayîşê xo tepişteyê û  zilm vînenê. Hefsadî vat: "Ma serranê 90î de zilmêko pîl vîna û ma hema zî nê zilmî vînenê. Bi hezaran kesî ameyî tepiştiş û destbendkerdiş. Çîyo ke ameyo serê Kurdan, nêameyo serê tu şarêna. Wexto ke Abdullah Ocalan ame destbendkerdişî ma zî xeylêk pê dejayî. Herkes pê deja û zilmêko pîl ame kerdiş. Nê no komplo nê zî tecrîd yeno qebûlkerdiş. Ewro zîndanan de bi hezaran tepişteyî binê zilmî û tecrîdo pîl de yê. Bi seyan tepişteyê nêweşî estê ke bêrê dermankerdiş. Ça de yo însanî, ça de yo wijdan û ça de yo edalet?"

 

'Ganî ma yewîyîya xo awan bikerê'

 

Hefsadî peynîyê qiseyanê xo de venga yewîyîye kerd û vat: "Hemverê nê zilmî û tecrîdî de ganî Şarê Kurdî yewîyîya xo awan bikerê û nê hêrişê duştê bîyayîş û erjê şarî tal vejê. Eke ma Kurdan yewîyîya xo awan bikerdê hende zilm, kiştiş û tehda ma nêvînayne. Wexto yewîyîya ma bibayne do tu hêrişî duştê bîyayîşê ma de ser de nêkewtêne. Coka lazim o ke Kurdî cade bibê yew!"