RIHA - "Nobeta Edaletî" roja 337ine de dewam kena. Emîne Şenyaşar seba problemê weşîye nobeta xo keye de dewam kerd. Ferît Şenyaşar zî verê edliyeyê Rihayî de nobeta xo dewam kenê.

 

Merdim û pawitoxê parlamenterê AKPyî Îbrahîm Halîl Yildiz 14ê hezîrana serra 2018ine de Pirsûsê Rihayî de hêrişê kargeha Keyeyê Şenyaşarî kerd. Netîceyê hêrişî de mêrdeyê dayîka Emîne Şenyaşar û 2 lajê ci ameyî kiştiş. Laji ci Ferît Şenyaşar zî bi birîndarî xelas bi. Dayîka Emîn Şenyaşar û lajê ci Ferît Şenyaşar, seba tepiştişê kiştoxan û muhakemeyê înan, 9ê adara 2021 de vernîya Edliyeyê Rihayî dest bi Nobeta Edaletî kerdî. Nobeta Keyeyê Şenyaşarî 337 rojî pey xo de verda. Dayika Emîne Şenyaşar seba ke nêweş a, çalakiya xo keyeyê xo yê Pirsûsî de dewam kerd. Lajê ci Ferît Şenyaşar zî verê berê edlîye de bi.

 

Derheqê babete de keyeyî serê hesabê xo yê dîjîtalî de nê pare kerd: "Nobeta ma ya edaletî ya verê Edliyeyê Rihayî de dewam o. Do vengdayîşê ma yê edaletî dewam bikero. Bêvengîya hemverê zilmî, yeno manaya pawitişê kiştoxan. Heme baro, rêxistinê huqûqî, partiyê sîyasî û şarê bi rûmet ê Rihayî wayîrê ma vejîyayî. Ma heqdar ê û ma do serbikewê."