Şehrîban Aslan

 

AMED -  Wekîla Serekîya Baroyê Amedî, avûkate Zûhal Işık da zanayene ke serê vengê Baroyê Huqûqî yê Asrînî ra, sere ro Wezaretê Edaletî dayo la derheqê muracatî de hema cewabêk nêameyo dayîş.

 

Rayberê PKKyî Abdullah Ocalan û çar tepişteyê bîn ê ke verê ey de Zîndanê Îmralî de tepişteyê, bi aşmano malûmat nîno girewtiş. Avûkatî no wextêko derg o seba pêvînayîşê muwekîlanê xo dir bikerê muracat kenê la verpersêke nêgînê. No heme serê giranbîyayîşê tecrîdî de yeno ca û zîndanan de zî tehda û îşkence serê tepişteyan de domneno. Keyeyê tepişteyan verê nê caardişan de, Baroyê Amed û Wanî de dest bi çalakîya 'Nobeta Edaletî' kerdî.

 

Wekîla Serekîye Baroyê Amedî, avûkate Zûhal Işik derheqê tecrîdî  û binpaykerdişê heqan ê zîndanan de erjnayîş kerd.

 

'Tecrîd metodêke yo duştê rûmetê merdimîye yo'

 

Zûhale vat ke na seserre de hema tecrîd yeno qiseykerdişî û no zî rewşêke yo  merdiman xeylêk aciz keno ke û no erjinayîş kerd: "Zîndananê Tirkîya de xeylêk heqê sereyînî nêeşkenê bêrê xebetnayîş. Binpaykerdişê heqan yenê ciwîyayîş. Heqo tewr sereyîn, heqê ciwîyayîşî yo. No heq him mevzûatê mîyanneteweyî de him zî yê neteweyî de binê asayîşî de yo. La no wexto peyîn de seke şima zî zanenê tepişteyê nêweşî nînê veradayîş, zîndanan de dinyaya xo bedilnenê. Cezakerdiş ameyo sewîyeyê binpaykerdişê heqê ciwîye. Mimkun nîyo ke ez sey huqûqnasêke qebûl bikerî."

 

'Wezaret hema ro ma nêagêrayo'

 

Zûhale ard ziwan ke qanûnê pawitoxîyê humara 1136, verpersîyarê pawitişîyo û caardişê heqê merdiman û sewîyeyê corbîyayîşî yê huqûqî, dano serê baroyan û wina derg kerd: "Baroyê Amedî vera nê verpersîyarîya xo bi serrano têkoşîne kena. Nê çerçewayî de Baroyê Huqûqî yê Asrîn î, vengêko kerd, Baroyê Amedî zî ci de yo 28 sazgehan rê kerd; Buroyê Huqûqî yê Asrînî no 8 mengî yo  muwekîlanê xo yê Zîndanê Îmralî de yê dir pêvînayîş nêkerdo. Semedê nê qaxûyê cidî estê û malûmat înan ra nîno girewtiş. Derheqê nê de lebatkerdene ameya kerdiş. Ma na babete de sere ro Wezaretê Edaletî da. La hema verpersêke nêame dayîş. No zî ma avûkatan û keyeyanê tepişteyan  keno qaxûyan."

 

'Keyeyî 15ê Teşrîna Peyîne ra yê baroyê ma de çalakîye de yê'

 

Zûhale bale ante serê binpaykerdişê heqan ê zîndanan de zî û babeta nobetanê edaletî de zî wina îzah kerd: "Keyeyî, 15ê Teşrîna Peyîne ra yê baroyê ma de nobeta edaletî de yê. Waştişê înan no yo ke, seba dermankerdişê tepişteyanê nêweşan bêro kerdiş wa înfazê înan bêro taloqeştiş. Tena nê Amed de, her cayê Tirkîya de nizdî yê hîrê sey hezar(3.000) tepişteyî estê. Nînan ra hezar û şeş sey (1.600) tepişteyê nêweşê. Ê ke nêweşîya înan cidî yê estê. Kayeyî seba merdimê înan bêrê dermankerdişî nika baroyê ma de,  çalakîye de yê."

 

'Muracatê seba Aysel Tugluk nêame verpersîyayîş'

 

Zûhale peynîyê qiseyanê xo de bale ante serê rewşa tepişteya nêweşe Aysel Tugluk zî û vat, Aysele 8 mengî yo hetê hekîmê  pisporî yê ATKyî  ra ameya kontrolkerdiş û wina vat: "Asasê raporî ke ameyo hadrekerdiş de weşîyîya Aysele de problemê cidî yenê ciwîyayîş û nêeşkena  bi tena sereyê xo ciwîya xo bidomno. Pêwa nê raporî Aysele hema tepişteya.  Dima ra ATKyî menga Êlûle de raporêk newe da û vat; 'eşkena zîndan de bimano'. Ma vîst(20) baroyan rê veng kerd. La seba nê muracatê ma, hema cewabêk nêameyo dayîş. Ma bi serê nameyê Baroyê Amedî, bi serrano derheqê binpaykerdişê heqan de,  raporan rayaumûmîye rê pare kenê. Ganî na babete de gamê muhîmî bêrê eştiş. Ma no wexto peynî de malûmatê merdeyan zîndanan ra şinawenê. Ma bi serê nameyê Baroyê Amedî duştê binpaykerdişê heqan de, dest têkoşîna huqûqî ra vera nêdanê."