STENBOL - Tepişteyo nêweş Turgay Denîz ke Nêweşxaneyê Yedikuleyî dinyaya xo bedilna, qezaya Sûltanbeylî Goristanê Osmangazî bi hawayêke girseyî ame definkerdiş.

 

Tepişteyo nêweş Tûrgay Denîz (39) ke Zîndanê Metrîsî de ameyîne tepiştiş, ewro saetê serê siba de Nêweşxaneyê Yedikuleyî de dinyaya xo bedilna. Keyeyê Denîzî qezaya  Motkan ya Bedlîsî ra yo, cenazeya Denîzî nêweşxane ra girewt û berd qezaya Sûltanbeylî ya Stenbolî. Polisan rayîr de çend rey vernîya keyeyê Denîzî girewt û înan rê astengiyan vet. Rexmê heme astengiyan zî keyeyî cenazeya Denizî berd Camîya Abdurrahman ê qezaya û dimayê wecîbeyê dînî Goristanê Osmangazî bi hawayêke girseyî defin kerd. 

 

Hemserekê HDPyî Stenbolî Ferhat Encû, endam û îdarekarê HDPyî yê Sultanbeylî û xeylêk welatî beşdarê merasîmê cenaze bî. 

 

Dimayê definkerdişê keye û kesê beşdarê merasîmê cenaze bî goristan ra vejîyayî û şî sersaxiyê xo bidê keye. Keyeyî şînê xo Komeleya Hetkarî û Paştdayîşê Şarî yê Bedlîsî taxa Kavakpinarî ya qezaya Pendîkî de dayî ro.

 

Sewbîna ame zanayîş ke birayê Denîzî bi nameyê Ûlaş Denîz zî Zîndanê Kandirayî de tepişte yo û waşto ke tewrê merasîmê cenazeya kekê xo bibo la tewrbîyayîşê ci hetê îdarekarê zîndanî ra ameyo redkerdiş.