WAN - Semedo ke vayî û zem yeno kerdiş hêze meydan ra wiştewe ra û sektoro ke zaf zorî de yo deştiş o. Terzîye Behîce Bektaş pêwa nîyadayîşê cînsîyetperestîyî bi umîdêk pîl 15 serrî yo karê xo kena û seba dikanê xo  zî îfadeyê seke 'ez padî zî nêeşkena biciwîyî' ard ziwan. 

 

Tirkîya de vera krîzê ekonomîyî her ke şino quwetê  herênayîşî keweno û coka nê ra welatîyî mexdûrîyetê pîlî ciwîyenê û hewcedarê letêk nanî mendê. Bi hezaran sektorî ke nêeşkenê êdî xo bidominê yew ci ra terzîtî ya. La, derzenî û qumaş ra bigîro heta xeylêk çîyî bînî êdî terzî nêeşkenê xo serê payan de verdê.

 

‘Çar mengî yo ez xerckerdiş cebê xo ra dana’

 

Cinîya bi nameyê Behîce Bektaşa ke Pasajê Japonî ya qezaya Îpekyolû ya Wanî 15 serrî yo terzîtîya lihêfan, pîkoyî, qirlentan û betanîyan kena, dîyar kerd ke no çar serrî yo karêk qet çinî yo û ameya sewîyeyê ke dikanê xo bigîro. Behîce îzahat kerd ke krîzê şertê zimistanî zî zafêr beno û no çar mengî yo yew karêke nêgirewto. Behîce nê çîyî ardî ziwan: "Ez gîranîyî ciyêz virazena û no zî girêdayîyê mewsîmî yo. Coka nê karê mi çinî yo. Zafêrî hamnanan vera ke veyveyî estê ez siparîşê ciyêzan gêna. La zimistanî dir karê ma vinderto. No çar mengî yo ez xercê sey kîra, faturan cebê xo ra dana." 

 

‘Qumaş di qat vay bîyo’

 

Behîce îşaret kerd ke, mengêk verî cû qumaş herênawo la nika vayî ya ci di qatî zêde bîyo û da zanayene ke pîko bi 900 TL viraştêne nika bi hezar û heştsey (1.800)TL, hezar û hewtsey (1.700)TL, virazena. Behîce vat vayîya metreyêke qumaşî 25 TL bî, nika bîyo 45, 50, 60 TL û pîke zî bi 180 TL herênena. Behîce wina derg kerd: "Çar serrî verî zî zimistanî kar çinêbî la qe nêbîyê tunîkê ma ra çîyêk nêşîyêne. Nika ma kîra zî tunîkê xo ra danê. Ma ameyê sewîyeyê ke nêeşkenê çîyêk bikerê." 

 

‘Kes nêeşkeno çîyêk biherêno’

 

Behîce dewamîye de wina vat: " Çend deqîqe verî muşterîyêk ame seba pîko. La vayî xeylêk zaf bî. Karê ke mi rê ard 15 rojê mi gêno. Qumaşo ke vayîya ci tewr kemî 45 tl yo. Mi hezar û disey û pancas (1.250) TL vaya ci dayo. La reyna zî ci rê zêde ame. O/A zî heqdar o/ a. La ez zî nêeşkena çîyêk bikera. Wextê mi zî xeylêk zêde gêno. Sîparîşêke wina ra 250 TL karê mi maneno. Ez nê 250 TL yî di hewteyî pare kena rojane keno 17 TL. Yanê hewceyîya nanê min o rojêke yo. La welatî zî heqdar ê. Problemê debare zaf giran o."

 

‘Pêwa dolar kewt vayî nêkewte’

 

Behîce bale ante serê zêdebîyayîşê vayî û vat dolarî dir heme çîyî vayî bîyî la pêwa ke dolar kewto zî vayî nêkewtî û wina îzah kerd: "Vera ke serê dolarî dir mal ameyo herênayîş. Çîyêk ameyo herênayîş zî dima ke dolar kewt, nêeşka vayîya ci bifîno coka do zirar bikero. Ê rojan mi ro mexlanan munaqaşe kerd. La ê zî heqdar ê. Înan vatê wexto vay bîyo berhem herênayo û nika ra bi vayîya ke newe roşenê bidê mi."

 

‘Wina şêro ez o dikan padî’

 

Behîce bale ante serê problemanê ekonomîyî yê duştî û vat; seba kîrayî dikan û faturan serê hezar TL yî ra dana û nê çîyî ardî ziwan: "Ez seba banê xo hezar û pancsey (1.500) TL dana. Tutê mi şino mekteb. Yew zî  şino dersxane. Xercê keyî reseno panc hezarî(5000). Ez tîya de kar nêkena. Wina şêro ez o dikan padî û tekstîl de bixebetî."

 

‘Bi umîdêke pîl kerd a’ 

 

Behîce peynîyê qiseyanê xo de dîyar kerd ke 15 serrî verî cû bi umîdêk pîl dikanê xo akerdo û wina peynîya ci ard: "Wina şêro ez o dikan bigîrî. Dima ke ez dikan bigîrî ez o nêeşkî tutanê xo bidî wendiş. Ez ke dikan bigîrî nêeşkena biciwîyî. Seba na vayî baş bibê ganî wareyêke ciwîye bêro viraştiş. Ez nêwazena dikanê xo bigîrî. Mi bi îmkanê çetinî no ca akerd. 15 serrî yo ez hewl dana ke  serê payan de vinderî."