Sema Çaglak

 

MÊRDÎN - Tepişteya bi nameyê Cîhan Asî ke 12 serrî yo Zîndanê Cinîyan ê Şakranî de yena tepiştiş, bi rayîrê telefonî teda û binpaykerdişê heqan ke hemverê înan de yenê kerdiş, keyeyê xo rê neql kerdî. Cîhane dîyar kerd ke yeno waştiş ke înfazê înan bêro veşnayîş û înan rê tehdîd yeno kerdiş.

 

Zîndananê mintiqa û Tirkîya de tedayê hemverê tepişteyan roj bi roje zêde beno. Tepişteyê bi rayîrê keyeyê xo rewşa ke ciwîyenê rayaumumî rê neql kerdî. Tepişteya nêweşe Cîhan Asî, 12 serrî yo Zîndanê Cinîyan ê Şakranî de yena tepiştiş. Cîhane bi rayîrê telefonî teda û binpaykerdişê heqan ke vera înan yenê kerdiş, neql kerdî.

 

Dedkênaya Cîhane, Sema Ozel Asî dîyar kerd ke çend roj verê Cîhane bi rayîrê telefonî neql kerdo ke tedayê serê înan her ke şino zêde beno û roj nêmaneno ke şîdet û tehdît bi înan nêro kerdiş û Sema vat: “Çi heyf, mintiqa de her keyeyî de tepişteyî estê. Ma zî sey heme merdimê tepişteyan, bi tedayê ke tepişteyan rê yenê kerdiş, dejenê. EWro lazim o ke maz, sey merdimê tepişteyan û şarî vengê tepişteyan teberî rê neql bikerê. Cîhane neql kerd ke bi bahaneyê pûç her tim erzîyeno serê qawîşê înan û hacetê înan yenê desteserkerdiş."

 

'Bi veşnayîşê înfazî dir tehdîd înan rê yeno kerdiş'

 

Sema dewam de wina vat: “Cîhane dîyar kerd ke yeno waştiş, înfazê înan bêro veşnayîş. HEmverê nê de zî yenê tehdîdkerdiş. Bi taybetî zî rojê yadkerdişan de teda û tehdîdan hemverê înan tewr zêde kenê. Bi tehdîdan yeno waştiş ke înfazê heme tepişteyan ê zîndanî de bêro veşnayîş. Sewbîna waştişname û mektubê ke teberê rê şawenê, vernîya înan yena girewtiş, seba ke nêresnê teber. Sewbîna temasê înan yê teberî zî dir yeno birnayîş û têkilîyê înan ma dir yeno astengkerdiş."

 

'Rewşa weşîye înan ver bi tehluke şina'

 

Sema wina dîqet ant serê tedayan: “Tepişteyê pêwa heme teda û zorî zî moralê xo xira nêkenê. Ganî ma têkoşînê înan nê wareyî de zî pare bikerê. Cîhane mîdeyê xo ra rehet nîya û xeylêk dej ancena. Eke bi hawayêke baş nêro tedawîkerdiş, beno ke cuya cibikewo tehluke. La tena Cîhane ney xeylêk embazê aye ke qawîşe de manenê, rewşa înan weşîye tehluke de ya. Lazim o ke çareyêke bêro vînayîş."

 

'Merdimê tepişteyan zî tecrîd ra para xo gênê'

 

Sema, tewr peyîn wina vat: “Sey metodêkê îşkenceyî tepişteyî yenê tecrîdkerdiş. Ma sey keye na rewşe qebûl nêkenê. Nê tecrîdê serê merdimanê ma yê tepişteyan de yeno kerdiş, ma zî tesîr benê. MA her wext înan dir dejenê. Bi her telefonêke ma rê zîndan ra yeno, endîşeyê ma zî zêde benê. Seba nê ma vanê tecrîd sucê merdimayî yo."