Rabîa Onver

 

WAN - Dadîya tepişteyê nêweşî Rojhat Aydin, Hemê Aydin dîyar kerd ke helnayîşê esteyê destê lajê ci roj bi roje tewr giran beno û veng da ke ganî heme tepişteyê nêweşî bêrê veradayîş. Hemê wina vat: “Tepişteyê nêweşî nînê dermankerdiş. Xeylêk nêweşê ke emrê înan pîl o estê. Yew zî nêşawenê keyeyê înan. Derman nêkenê û seba nê mirenê. Wa tepişteyê nêweşî ganî serbest bêrê veradayîş.”

 

Qezaya Nisêbînî ya Mêrdînî de mabêne serran ê 2015-2016 de dimayê xoverdayîşê îdarekarîyê xoserî ra dima 17 ci ra tutî 70 kesî ameyî destbendkerdiş û înan ra yew zî Rojhat Aydin bi. Rojhat demê pêrodayîşan de  birîndar bi. Rojhat ke wedarnayê nêweşxaneyê Dewlete yê Mêrdînî vera ke dermankerdişê ci temam bibo, ame vetiş û hetê dadgehe ra bi îdiayê ‘endamîya rêxistine’ ame tepiştiş. Netîceyê dewaya ameye akerdiş de bi îdiayê ‘yewîya dewlete xera kerdo’ cezaya muebetî ci rê ameye dayîş. Rojat ke 7 serrî yo zîndanê Tîpê T yê Tokatî de tepişte yo, problemê weşîya ci her ke şino tewr giran beno. Seba parçeyê şarapnelî îsabetê bedenê ci kerdo, hetê rayrayîşî de zehmetiyan anceno, engişta ci ya destan a qije tira bî, destê ci de este helêno û sewbîna çimê ci vînîbîyayîş xo vînî kenê.

 

Dadîya ci Hemê Aydin dîyar kerd ke seba dermankerdişê ay tam nêame kerdiş helnayîşê esteyê destê ey her ke şino giran beno û Hemê zî Nobeta Edeletî ya 51 rojî yo Baroyê Wanî de ca gêna.

 

Vera ke dermankerdişê ci temam bibo berdî zîndan

 

Hemê wina qal kerd: “Ma ra vatî nêweşxane de yo û ma şî zîndan. Ma wezîfedaran ra pers kerd, înan zî vat; nêweşxane de yo. Semedo ke nîşanê ma nêdê her tim ma nêweşxane ra şawitî zîndan uca ra zî şawitî nêweşxane. Tewr peyîn zî nêweşxane de polîsî ameyî verê ma. Vatî, ‘çi karê şima tîya de esto? Şima heme nika binê muşahadeyî de yê. Şêrê tîya ra, çîyêk bibo  berpirs ci şima yê’. Ma zî vat, ‘lajê mi tîya de yo, ma rewşa ci meraq kenê.’ Vatî, ‘şêrê keyeyê xo nika do berê zîndan.’ Dimayê ke berdî zîndan, ma pêvînayîşê girewte de ey dî. Rrewşa ey zaf giran bî, birînî ey giran bî, perîşan bi. Hema dermankerdişê ey temam nêbibi bi ê birînan şawitî zîndan.”

 

‘Lajê mi nêame dermankerdiş’

 

Hemê vat, lajê ci vernê de zîndanê Tîpê E yê Mêrdînî de bîyo û dima ra surgunê zîndanê Tîpê T yê Tokatî ameyo kerdiş û wina vat: “Îdarekarê zîndanî seba  dermankerdişê Rojhatî ê şawitê Tokat. La demo ke ez şîya zîndan mi dî ke dermankerdişê ey nêkerdê. Rewşa lajê mi baş nêbi. Birînî ey nêamebî dermankerdiş. Destpêkê pandemî de ma nêdî. Rewşa înan senîn o ma nêzanê. Ganî destê xo ra emeliyat bibo. Ganî dermankerdişê ci bêro kerdiş.”

 

Ke‘Ma edalet wazenê’

 

Hemê tewr peyîn wina vat:  “Tepişteyê nêweşî nînê dermankerdiş. Yê ke emrê înan pîl o estê. Yew zî  tehliye nêkenê. Derman nêkenê. Serrêke de 8 cenazeyî zîndanan ra vejîyayî. Yew zî dermankerdişê înan nêamebi kerdiş. Wa êdî tepişteyî nêmirê. Tepişteyê ke cezayê înan qedîyaya zî vera nêdanê. Bi bahaneyê cezayê înan derg kenê. Bi 51 rojî yo ma tîya yê. Ma edelet wazenê. Ma do çalakîya xo tîya de dewam bikerê. Ma tîya ra nêwurzenê. Heta edalet bi ca nêro ma do nêwurzê. Wa heme keyeyê tepiştryan tewrê nobete bibê. Wa no zulm peynî bibo. Wa şarê kurdî verê ma de ca bigîrê. Wa paştdayîş bidê ma.”