MERKEZÊ XEBERAN - Tepişteyê sîyasî yê 2yîn Hûmara Kiriklarî ke Bûcayî yê Îzmîrî de yenê tepiştiş, duştê binpaykerdişê heqan de, zîndan de dest bi grevê vêşanîye kerd. 

 

Duştê binpaykerdişê heqan de, 2yîn Hûmara Kiriklarî yê Bûcayî yê Îzmîrî de tepişteyê bi nameyê; Sînan Dûrmaz, Onûr Yilmaz, Abdullah Gunay, Sabah Dayan, Ozan Alpkaya, Halîs Daghan, Sertaç Kiliçarslan û Kenan Yildizbakan dest bi grevê vêşanî kerdî. Çalakîya grevê vêşanîye duştê binpaykerdişê heqan no 63 rojî yo domîyena. Tepişteyan dîyar kerdî ke dimayê tayînkerdişê midurê zîndanî Haydar Alî Akî binpaykerdişê heqan, zîndan de her ke şino zafêr beno.

 

‘Duştê binpaykerdişê heqan de grev da destpêkerdiş’

 

Tepişte Sertaç Kiliçarslanî bi rayîrê pêvînayîşî dir diyar kerd ke 28ê Teşrîna Peyîne de 3 embazê înan dest bi çalakîya grevê vêşanî kerdê û dimayê ke tehda, zordestîyê ke zîndan de zafêr bîyê, 27ê Çeleyî de zî embazê înan ê bînan dest pêkerd o. Sertaçî da zanayene ke ey dewrê 12-13 kiloyî dayo, ge-ge sereyê ey gêj beno û çimê ey tarî benê. Sewbîna ge-ge zî recifnayîş keweno ganê ey û o bêhal keweno.

 

Sertaçî dîyar kerd ke demo ke ê spor kenê kamerayî înan ancenê, wazenê ê kamerayî bêrê wedaritiş û wina vat: "Wa hucreyê ma û yê embazanê ma dûrî yewbînan nêfînê û kesê edlî yan zî dewaya ma ra nîyê nêkerê hucreyanê ma. Her rey erzenê serê hucreyanê ma û hacetanê ma vila kenê. Bi taybetî demê Haydar Ali Ak sey mudur tayînê zîndanî bi,  binpaykerdişê heqan tewr zêde bî. Ma wazenê waştişê ma bi ca bêrê û binpaykerdişê heqan ê zîndanan peynî bibê.”