ANQARA - Tehliyeyê 4 tepişteyê ke Zîndanê Cinîyan ê Sîncanî de yenê tepiştiş, bi mehnaya nêvejîyayîşê çalakiyê komelî yê ke çin ê, dezenfektan nêwaştê, karê cigêrayîşê yê gardîyanan zehmet kerdê, ame  taloqkerdiş. 

 

Her roje binpaykerdişê heqan ê zîndanan zêde benê û îşkenceyê ke tepişteyî ci dir rî bi rî yenê verdayîş zî vejîyayo sewîyeya tewr berz. Rojeva sereyîn yê zîndanan, tepişteyê nêweş ê. Binpaykerdişê heqo bîn  zî pêwa ke cezaya tepişteyan qedêna zî bi mehnayê  pûç û vengî nêtehlîyekerdişê înan o. No qerar hetê "Heyetê Muşahadeyî û Îdareyî" bi hawayêke kêfî yeno dayîş.

 

Merkezê binpaykerdişî: Heyetê muşahadeyî û Îdareyî

 

Heyetê Muşahadeyî û Îdareyî heme zîndananê Tirkîya de ameyî awankerdiş û pêwa ke cezaya tepişteyê siyasîyan qedêno zî bi mehnayê "mendişê qawişê sîyasî","nêvano/a ez poşman a","Fikrê derheqê Rayberê PKKyî Abdullah Ocalanî" yeno astengkerdiş ke tehlîye bibê. 

 

Tehlîyeyê 3 cinîyê tepişteyan reya diyîn ame astengkerdiş

 

Rojdan Erez, Hanim Yildirim, Jiyan Ateş û Berrin Sari yê Zîndanê Cinîyan ê Sîncanî yê Anqara de yenê tepiştiş, bi mehnaya qerarê Heyetê Mûşahadeyî û Îdare nêameyî tehliyekerdiş. Zîndanê Cinîyan ê Sîncanî yê Anqarayî yew ê zîndanan ra yo ke bi muameleyê kêfî yeno rojeve. Hanime û Rojda 25ê teşrîna verêne, Jiyane zî 27ê teşrîna verêne ra sewbîna Berrine zî 20ê Kanûne ra bi hawayêke bi kêfî zîndan de yenê verdayîş. Hanime, Rojda û Jiyane ke bi 3 aşmî yo tehliyeyê înan yeno astengkerdiş, bi qerarê Heyetê Muşahade û Îdareyî tehliyeyê înan 3 mengî zî ame taloqkerdiş. 

 

Mehnayê nêkerdişê tehlîye absurt ê!

 

Jiyane û Hanime goreyê mehnaya Heyetê Muşahadeyî û Îdareyî seba nêvejîyayîşê perwerdeyî û pakêta islahî qebûl nêkerdê, tehliyekerdişê înan ame taloqkerdiş. Rojda pêwa ke qet nêzewicîyaya bi mehnaya "mêrdeyê xo kişto, no seba keyeyê mêrdeyê ke kişto tehluke yo” nêameye tehliyekerdiş. Berrine zî bi mehnaya ewraqê ci hema dadgehe ra nêameyo, nêameye tehliyekerdiş. 

 

‘Poşmanî serê tepişteyan de yena ferzkerdiş’

 

Waya Jiyan Ateş, Pinar Ateş dîyar kerd ke caardişê  kêfî hemverê tepişteyan de yeno kerdiş û wina vat: "Poşmanî serê tepişteyan de yena ferzkerdiş. Tepişteyê ke nê qebûl nêkenê zî nînê tehliyekerdiş. Gardiyanî vanê demo ke ma cigêrayîş kenê, tepişteyî  karê ma zehmet kenê. No rast nîyo û bi nê mehnayî zî tehliyekerdişê tepişteyan yeno taloqkerdiş. Gardiyanî her ca belawela kenê û derheqê înan de tu zabitname zî nîno girewtiş.”

 

‘Nêwaştişê dezenfektanî suc o! 

 

Jiyane tewr peyîn wina vat: "Gardiyan reye de yenê qawişan dezenfekte kenê û tepişteyî vera nê nêvejênê. Sewbîna yew sebeb zî nêtehliyekerdişî zî oyo ke vanê tepişteyî nêvejîyayê çalakîyê komelî. Xora seba pandemî heme çalakîyê komelî vindertê. Bi nê mehneyan 3 aşmî tehliyekerdişê tepişteyan ame taloqkerdiş." 

 

Tepişteyan hemverê binpaykerdişê heqan ke ci dir rî bi rî manenê, vengdayîşê hîsgêrî rayaumumî kerdî.