Medya Uren

 

MERKEZÊ XEBERAN - Endama TAJÊ Meyan Nasir derheqê hêrişê dewleta tirkî yê bi hemkarîya Hukmatê Iraqî û PDKyî yê Şengalî dîyar kerd û ê hemverê xîyanet û parçebîyayîşê vengdayîşê yewîye kenê û vat: "PDK hemverê destkewtişê komelê Êzidî bi Tirkîya dir hemkarî keno. Lazim o komelê Êzidî, rêxistine xo pîl bikero û reyke bîn nêkewo xefikê îxanetkaran. Ma Êzîdxanî pawit û ewro ra nata zî ma do bipawê."

 

Hêrişê dewleta tirkî yê bi hemkarîya Hukmetê Iraqî û PDKyî yê serê Şengalî de dewam keno. Netîceyê nê hêrişan de xeylêk multecîyê Şengalî û şerwanê pawitoxê Şengalî ameyî qetilkerdiş. 21ê Çeleyî de, netîceyê hêrişê teyareyê dewleta tirkî de 2 şerwanê YBŞyî dinyaya xo bedilnayî. Demê merasîmê pakrewanan de zî hêzê Iraqî waştî ke  mudaxale bikerê û derûdorê keyeyî girewtibî. Endama Tevgerê Azadîya Cinîyan ê Êzidî (TAJÊ) Meyan Nasir derheqê hêrişan de ercnayîş kerd.

 

'Ma deyndarê înan ê û ma do serê rêça înan de bê'

 

Meyane sere de pakrewanê ke seba herra Êzîdxanî de canê xo feda kerdê ard vîr û vat: "Fermanê 74in ke serê komelê Êzidîyan de ameyo kerdiş, ciwananê ma cepheyê xoverdayîşê xo nêteriknayî. Înan bi hezaran can û herra ma azad kerdî. No têkoşînê înan ê pîroz heta roja ewro zî bêmabên dewam keno. Yanî verê azadîye de înan canê xo feda kerdî. Verê zî 2 şorişgêrî şehîd kewtî. Ma deyndarê înan ê û ma do serê rêçe înan de bê."

 

'Ê xîyanet de bi israr ê'

 

Meyane dewam de wina vat: "Ewro destê PDKyî mîyanê gonîya wayê û birayê ci de yê. Ma nê xîyanetê  înan fermanê 74ine ra zanê. Înan Şengal rot. Bî sebebê qirkerdişê  pîlî. Cinî, tutî bi hawayêke wehşî ameyî qetilkerdiş û remnayîş û hema aqûbetê xeylêkan dîyar nîyo. PDK ke hesabê nê xîyanetî nêdayo yeno ma ra hesab pers keno. Her ke ma vanê ma pîya mîyanê yewîye de bê, ê xîyanet de israr kenê."

 

Vengdayîşê xurtkerdişê yewîye

 

Meyane tewr peyîn wina vat: "Hemverê xîyanet û hêrişan ma xoserîya komeleyê Êzidî awan kenê û ma nê heq kenê. Ê deyndarê Şengalî yê. Labelê her het ra hêrişê destkewtişê ma kenê. Ferqê înan û DAIŞî yewbînan ra çin o. Çeteyê xo kerdê mîyanê ma. Ma vengdayîşê yewbîyayîşî kenê. Ganî Êzidî rêxistinêê xo girs bikerê û nêkewê dafike îxanetkaran. Teberê ma de kes nêeşkeno ma bipawo. Ganî ma nê rojan û ewro baş fam bikerê, bierjnê û bikewê mîyanê pawitişî."