Şîrîn Çinar

 

AMED - Merdima tepişteye Hanim Tanriverdî da zanayene ke rewşa tepişteyanê nêweşan krîtîk o û rayaumûmîyê mîyanneteweyî duştê nê de bêvengo û wina vat: "Wa no zulm peynî bêro."

 

Tecrîdê serê Rayberê PKKyî Abdullah Ocalanî de serê heme hetê komele de û xusûsî zî ro zîndanan kerdo. Binpaykerdişê heqan ê hemverê tepişteyan roj bi roje giranêr beno. Goreyê raporê ÎHDyî yê 2020î de zîndanan de 604 ci ra giran pêroyin hezar û şeşsey û panc (1.605) tepişteyê nêweşî estê. Yew tepişteyo nêweşî ra lîsteyê nêweşanê  giranan de yo Ramazan Tanriverdî yo 63 serrî  yo ke nêweşê şekirî, kezebe û mîdeyî yo. Ramazan Tanriverdî 30 serrî yo tepişteyo û Zîndanê Asayîşê Berz ê Tîpê Fyî yê Amedî de yeno tepiştiş.

 

Cinîya Ramazan Tanriverdî û îdarekara HDPyî ya Bismilî Hanim Tanriverdî bale ante serê tepişteyê nêweşan û zorî û zehmetîyê ke ancenê ard ziwan.

 

'Gelo bi çi heqî ezîyet ro tepişteyan kenê'

 

Hanime dîyar kerd ke binpaykerdişê heqan û cezayê dîsîplînî yê zîndanan de zafêr benê, tepişteyê nêweşî nînê dermankerdiş û wina vat: "Mêrdeyê mi di reyî mîde ra emelîyat bîyo. Kezeba xo ra zî anjîyo bîyo. Nêweşîya şekirî zî esta. Ez şina pêvînayîşan, destê ey cemidnayeyê. Rewşa înan qet baş nîya. 8 aşmî mendo ke cezayê mêrdeyê mi biqedîyo. Pêwa nê seba ey û embazê ey serrêke û di aşmî cezayê dîsîplînî dayê û înfazî veyşinayê. Çi heqê înan esto ke nê ezîyetî ro tepişteyan kenê? Ma şinê pêvînayîşî ma zî rastê caardişê xiraban yenê. Nêverdenê ma tepişteyan ê bînan dir silam bidê yewbînî. Pêvînayîşê akerdeyî de nêverdenê ma fotograf biancê. Yanê îşkence kenê. Her kesî vîna ke çi ame sereyê Kadafî û Saddamî, înan ke zilm ro şarî kerdbî. Gelo qet nê nêfikirênê?"

 

'Ma keyeyê xo de rehet nîyê'

 

Hanime dewamîya qiseyanê xo de wina vat: "Ganî tepişteyê nêweşî lezkî bêrê veradayîş. Çirê nînê veradayîş? Tepişteyanê nêweşan nêbenê nêweşxaneyan. Wexto benê zî bi kelepçe benê. Na rewşe nêbeno bêro  qebûlkerdiş. Wa no zilm peynî bêro. Gelo do heta çi cayî wina dewam bikero? Ma serê herra xo de, ma keyeyê xo de rehet nîyê. Vera ke merdimê ma binê tecrîdî de yê."

 

'Însanîyetî çîyêk wina nêvîna yo'

 

Hanime bale ante serê rewşa Aysel Tugluk ke nêweşê demansî ya û pêwa raporê aye ke 'Nêeşkena tepişte bimano' esto û nîna veradayîşî zî û wina erjnayîş kerd: "Ganî Aysele lezkî bêro veradayîşî. Şertê tepişteyan qetî baş nîyê. Wa ê di aşmî şêrê zîndanan de bimanê. O wext do şertê zîndanan ra fam bikerê. Tarîx de însanîyetî çîyêk wina nêvîna yo. Kezeba dadîyan sojena. Dadî pêwa emr û nêweşîyanê xo şinê baroyan de ronişenê. Çirê qatilê cinîyan û rotişoxê madeyê tiryakî û kesê sûcê edlî kenê yenê veradayîş? Çirê tepişteyê nêweşî yê ke sîyasî yê nînê veradayîş? Înan tu sûcêke nêkerd o. Înan tena ziwan û heqê xo pawit o. Seba nê zî nika tepişteyê."

 

'Seba tepişteyanê nêweşan veng'

 

Hanime peynîyê qiseyanê xo de, sere de rayaumûmî ya mîyanneteweyî rê û veng heme kesî rê kerd ke duştê binpaykerdişê heqan ê tepişteyan de bêveng nêmanê û wina dimayê qisanê ard:" Ez venga serokkomarî û heme însanan rê kena. Eynî wextî de CPT zî bêvengo. Wa ê zî na babete de paştdayîşî bidê tepişteyan û keyeyanê tepişteyan."