Sema Çaglak  

 

MÊRDÎN - Merve Tekîn ke qezaya Şemraxî ya girêdayê Mêrdînî ya, eşteyan açarnena hacetê dekoratîf. Merve, wina vana: “Berardiş û keda cinîyan ganî qij nêro vînayîş, asoyê cinîyan zaf hîra yo."

 

Cinî her wext berardiş û awankerdiş de bîyê rayberê komelî û hema zî rayberîya xo dewam kenê. Nê cinîyan ra yew zî Merve Tekîn a 30 serrî ya. Merve qezaya Şemraxî ya Mêrdîn de ya. Merve berardişê hacetê ke êdî demê înan qedîyayo û nînê xebitnayene hacetê dekoratif viraznena. 

 

Merve dîyar kerd ke 7 serrî verê Şemrex de bi ca bîya û her wext mîyanê cigêrayîşêk de bîya û vat: "Dimayê ke zewicyaya ameya Şemrex de bi ca bîya. Mi destpêk de xeylêk zahmetî ant. La merdim zereyê keyeyî de zî wazeno bi tewir tewir metodan de wext derbaz bikero. Mi sere de waşt ke karêko  daîmî yê demdergî de bixebityî. La çi heyf mi nêdî. Mi zî hewil da ke zereyê keyeyî de xo rê alternatîfan awan bikerê. Semedo ke xozaya cinîyan de vindertiş çin o. Hertim bi karêk dir eleqedar bena. Ez karê dekorasyonî waya xo ra musaya. Kesê ke berardişê mi vînenê, kêfweş benê û şîroveyê xo seba mi vanê. Sewbîna karê ke kena tesîr serê derûdorê mi de zî keno."

 

'No kar hem seba mi sey hobî yo û hem zî xoza yena pawitiş'

 

Merve dewam de wina vat: “Keye de hacetê ke nînê xebitnayîş, açarnena dekoratif. Seba ke ez nêwazena eşteyan bierzî û zirar bidî xoza kena dekoratîf. Mi rê sey hobî yo. Qutîyê eşte mi xemilna û hîna bî estetîk. Sewbîna şûşeyê pedî ke yenê eştiş, xebitnena. Şûşeyê pedî bi pêştişê perçeyî dorpêç kena û dimayê ke karê deştişî qedîya û nexşe ci qedîya, sey qûtîya ke hacetanê xo bi ca bikerî xebitnena."

 

‘Bi nexş û deştişê ke kena dekorêk bîn dana keyeyê xo'

 

Merve, dewam de wina vat: “Sewbîna ez terziyan de zî xeylêk gêrena. Seba ke terziyan de zî xeylêk qumaşê eşte estê û yenê eştiş. Ez ê qumaşan bi deştiş û nexşkerdişî kena aksesuarê tewir bi tewir. Sey nimûne; ez nê pîneyê qumaşê reng bi reng pîya derznena û înan ra başna û kîsêkê qij viraznena. Sewbîna mi vazoyêk zî bi nexşan xemilna û salona mi de cayêk weş gêno. Sewbîna xeylê cinî bi nê debara xo kenê û ez zî pê debara xo kena"

 

'Ma eşkenê heme wareyan de bi nexşê xo bixemilnê'

 

Merve, tewr peyîn wina vat: “Ez cinîyan rê zî pêşnîyaz kena, ê zî eşkenê keyeyê xo de nê karî bikerê. Hem seba hobî, hem zî seba debare eşkenê. Tewr peyîn zî ez wazena ke embazanê xo cinîyan ra wina vajî.  Her hacetê ke demê xebitnayîşê ci qedîya, merdim eşkeno çîyêk bîn ci ra peyda bikero. Mi xeylêk dîyo ke cinîyan bi nê metodî debara xo kerdo û serê lingan de vindertê. Ma zî bi berardiş û keda xo eşkenê destê xo bidê her ware û bi nexşê xo açarnê wareyêk weşik."