Oznur Deger

 

ANQARA - Sereka Merkezê Gelîncîkî ya Baroyê Anqarayî Asli Arihan dîyar kerd ke duştê şîdetî de muracatê mercîyan muhîmê û her ke ê vengê xo berz bikerê do ê bibê.

 

Dimayê feshkerdişê Pêkerdişê Stenbolî serebûtê şîdetî zafêr bîy û goreyê doneyê ke ajansê ma kom kerdê 2021î de  tewr kemî 311 cinî ameyê qetilkerdiş, 181 cinîyan zî bi tewirêke bişik dinyaya xo bedilnayî. Merkezê Gelîncîkî yê 2yê Nîsane ya 2021ine de hetê Baroya Anqarayî ra amî hadrekerdiş. 10 serrî yo xebatanê derheqê şidetê cinî de kenê.  Sereka Merkezî avûkate  Asli Arihan derheqê  xebatan de qisey kerd.

 

Asliye vat ke, roja merkeze ameya awankerdişî duştê şîdetî, paştdayîşê huqûqî dana û na babete de muracatan gêna zî giranbîyayîşê rewşe ya komele de mojnena ra. Asliye wina vat: "Pêkerdişê Stenbolî ame rakerdiş. Asasîyî de pêkerdişê mîyanneteweyî yo la komele de sey huqûqî yî û serê qanûnan ra yo. Seba ma mehna ya Pêkerdişê  Stenbolî no bî. Heqê waştişkerdişê hewldayîşê derheqê rakerdişê şîdetî bî. Qanûna humara 6284 zî çerçewayê nê de kewt ciwîya ma."

 

‘Vernîya 6284 4320 estbi’

 

Asliye dîyarkerd ke vernîya Pêkerdişê Stenbolî zî xebata qanûnî yê derheqê şîdetê cinîyan estbi û no het ra Pêkerdişê xebate ameyê kerdiş û vat: "6284 dewam keno. Ganî cinî fek nê ra vera bidê. 'No êdî çin o, na babete de qerar nîno dayîş.' Qanûnê 6284 nêwuşto ra. No het ra muracatî yenê girewtiş. Keremê xo ra fek muracatan ra vera medê. Muracatê mercîyê edlî bikerê. Fek ci ra vera medê."

 

‘Bêçare memanê'

 

Aslîye bale ant serê nêzdîbîyayîşê rayaumumî û vat: "Nê het ra yê ke şîdet kenê zî xo asayîş de hîs kenê. Yewin rayîrê safîkerdişê nê xeberdarîya raşt û xoresnayîşê xebera raşt o. Ganî huqûqnas û STK xebera rast bidê. Her bajar de qerkekolî estê. Muracatan gênê. Eke şima ra vajê, ‘ma nêeşkenê bidê' o wext selahîyetê înan çin o. Xora hetê huqûqî de nêeşkenê çîyêk bidê û no nîno manaya ke nîno dayîş. Şima do wina vajê, ‘Îmkanê min çin o bi asayîş şêrî qerekolê ke şima vanê.' Beno ke  pereyê şima zî çinbo. Beno ke asayîşê şima çinbo. Şima do vajê, ‘Şima mi berê.' Seba ke şima şêrê amîriya buroyî, ganî wesayît bêro tesîskerdiş. Xo bêçare hîs mekerê. Hemverê şîdetî cinî eşkenê xo biresnê baroyî. Numareya merkezê Gelîncikî ‘444 43 06’ a. Cinî eşkenê her saete na numara bigêrê. Eke şima qerekolan de probleman ciwîyenê, ma eşkenê her qerekole bigêrê. STK, Merkezê cinîyan û merkezê Hetkarîyê Edlî estê. Keremê xo ra xo biresnê nê cayan."

 

‘Ganî qerarê pozîtîf bêrê parekerdiş'

 

Asliye dewam de wina vat: “Eke ma wazenê vernîya şîdetî padê, ganî ma qerarê pozîtîf pare bikerê. Sebebê dewamkerdişê şîdetî, ewnîyayîşê ‘Xora ez ceza nêgîna' Ez bigîrî zî ez o ca de vejîyî.' La yê ke cezayê cidî gênê zî estê. Ganî nê zî bêrê zanayîş û eşnawitiş. Ganî fehmê hemverê cinî ke ‘sûcdar yena vînayîş' peynî bibê. Waştişê xo dadgehê keyeyî bikerê. Cinîyêke mi gêraya vat, qerekole çîyêke nêkena, tena îfadeyê ey girewt û şi. Tîya de qerekole xora çîyêk nêkena. Cinî vanê qey do gumanbar qerekole de bêro tepiştiş. La qerarê tepiştişî qereqole ney, dadgeha keyeyî dana."

 

‘Ma her ke vengê xo vejê ma do bibê'

 

Asliye tewr peyîn wina vat: "Ma her roje, her saete muracatan gênê. Ma her cayê Tirkîya ra muracatan gênê. Reyan cinîyê ke derheqê veradayîşî de muracatê ma kenê, estê. Ma paştdayîşê heqûqî danê înan. La yê taybetî bîyayîşê xetêke yo. KADESî qetî bîyarê war. KADES cuye xilas kena. Her ke ma vengê xo berz bikerê, ma do bibê. Ganî ma hemverê şîdetî bêveng nêmanê. Ma hewl danê ke paştdayîş bidê cinîyan."