ANQARA - Fatma Kûrtûlan a HDPyî, derheqê rewşa manena ya Aysel Tugluk de qisey kerd û da zanayene ke nêweşîya aye avêr şîya û ganî lezkî bêro tehlîyekerdiş. 

 

Yew kesêke ra muhîme ya sîyasetê Kurdan, yewin hemsereka sîyasetê Kurdan û Tirkîyayî de Aysel Tugluk 5 serrî yo, Zîndanê Tîpê Fyî yê Kandirayî yê Kocaelîyî de tepişte ya. Dimayê hêrişê nîjadperestî yê 13ê Êlûle ya 2017î de hemverê cenazeyê dadîya aye de ca amebî  pey ra Aysele problemê nêweşîyî ciwîya û teşîsê demansî ci rê ame dayîş. Aysele ke şertê zîndanî tesîrêk negatîfî ci rê kerd, her çiqas Sazgehê Tîpê Edlî  yê Kocaelîyî (ATK) raporo ke 'nêeşkena tepişte bimano' dawo zî ATKyê Stenbolî raporo 'eşkena  tepişte bimano' da  û tehlîyekerdişê aye asteng kerd. Seba Aysele, rewşa ci her ke şî giran bî, cinîyan kampanyayî dayî destpêkerdiş û waştî Aysele azad bêro veradayîş. 

 

Parlementera HDPyî ya Sêrtî û endama Komîsyonê Cigêrayîşkerdişê Heqê Merdiman ê Meclîsî, derheqê rewşa manena yê Aysele de erjnayîş kerd. 

 

‘Roniştiş û dest bi qiseykerdiş xeylêk wext girewt’

 

Fatma dîyar kerd ke, di hewteyî verî cû şîya serdayîşê Aysele û rewşa aye xirab bîyo dîyo, qiseykerdiş de zehmetî anto, zaf hêdî fikirîyawa û qisey kerdo. Fatma nê çîyî ardî ziwan: "Mi bedilnayîş Aysele dir zelal vîna. Heta serê tabûre  de ronişte, ca bî û dest bi qiseyî kerd xeylêk wext derbas bî. Bala aye zafêr ser o bî. Reyna heta ahîzeyê telefonî girewt, heta ver bi goşê xo berd û heta seba qiseyê xo  hadre kerd xeylêk zehmetî ant. Dima ra peynîyê qiseyê xo de zî eynî çîyî ca ameyî. Heta wuşte we, ahîze rona xeylêk zehmetî ant. Nê zî mojnayêne ke nêweşîya aye çiqas avêr şîya." 

 

‘Ganî lezkî bêro veradayîş’

 

Fatma dewamîyî de bale ante serê problemanê cidî yê weşîyîya Aysele û wina îzah kerd: "Aysele tena nêeşkena ciwîyayîşê xo bidomno. Îdareyê zîndanî nê baş zanenê. Ganî Aysele lezkî bêro tehlîyekerdişî û  înfazê aye bêro taloqkerdiş. Ganî şertê ciwîyayîşê aye bêro vurînayîş. Ganî hem dermankerdişê aye baş bêro kerdiş hem zî vernî ro avêrşîyayîşê nêweşîya aye bêro girewtiş. Ganî şert û mercê ciwîyayîşê aye baş bibo. Yan zî apey gêrayîş çinî yo. Nika eşkenê vernî ro nêweşîya aye bigîrê. La eke wina bidomo êdî apey gêrayîş zî nêbeno." 

 

‘Sayeyê têkoşînê cinîyan newe ra şawitî ATKyî’

 

Fatma dîyar kerd ke, cinîyê dinyayî seba Aysele azadî waşt  û bi nê waştişî kampanyayî dayî destpêkerdişî û wina vat: " Sayeyê nê ra Aysele do newe ra sewqê ATKyî bêro kerdiş. Umîdê ma no yo ke, asasê sîyasî de nê, serê problemanê weşîyîye de çareserîyêk bêro vînayîş. Ma pawenê. Wa ATK tenî derheqê weşîyîye de qerar bido. Pisporî nê çîyî baş zanenê. Ê ke ewnenê nê çîyî vanê. Raporê ATKyê Kocaelî esto. Ganî nê çerçewayî de rapor bêro dayîş.  Rayaumûmîyî û cinîyan îmzayê xo şawitî. Ganî înfazê Aysele bêro taloqkerdiş." 

 

‘Meclîs bêvengîya xo paweno’

 

Fatma sewbîna bale ante serê qelsîya hewldayîşê Komîsyonê Heqê Merdiman ê Meclîsî û vat: "Komîsyon dewayê sîyasî nêvînayîş ser o yeno û ganî komîsyon lezkî mudaxale bikero."

Fatma, bêvengîya komîsyonî yê duştê rewşa Aysele de zî rexne kerd.