Rojda Aydin  

 

ŞIRNEX - 21 serrî derbaz bi, la hema zî aqûbetê Serekê HADEPî Silopî Serdar Taniş û îdarekarê qeza Ebubekîr Denîzî nêdîyar o û kerdoxî nêameyî cezakerdiş. Cinîya Ebubekîr, Dîvan Denîz û dayîka Serdarî, Rabîa Taniş dîyar kerdî ke  çiqas muracatê înan bêcewab mendê zî do cigêrayîşê xo yê cenazeyan dewam bikerê. 

 

Serekê HADEPyî yê Silopî yê Şirnexî Serdar Taniş û îdarekarê qeza Ebubekîr Denîz, 25ê çelêyê serra 2001 de seba îfadeyî şîbî Qereqolê Cendirmeyan ê Qeza. Labelê dimayê ke şî qereqole hew agêrayî û ê wextî ra heta nika çaxê aqûbetê înan dîyar nîyo. Serê vînîbîyayîşê înan de 21 serrî derbazbi zî înan ra tu xebere nêameye girewtiş û kesêk zî nêame cezakerdiş. Cinîya Ebubekîr Denîz, Dîvan Denîz û dayîka Serdar Taniş, Rabîa Taniş ajansê ma rê qisey kerdî.

 

‘21 serrî yo çimê ma nê rayîran de yo'

 

Cinîya Ebubekîr Denîz, Dîvan Denîz dîyar kerd ke 21 serrî derbaz bi û heta nika tu xeberêke nêgirewtê û vat: "Tutê mi, mi ra pers kenê û vanê, 'kêlikê şarî estê, la çira ê pîyê mi çin ê?' Ez nêzana çi cewab bidî tutanê xo. Kerboran de vatî ke cenaze ameyê vînayîş û ma şî gonî da, labelê dimayê çend mengan ame dîyarkerdiş ke cenaze ê ma nîya. Seba ke ma cenazeya xo bigîrê cayê ke ma muracat kerd nêmend. La muracatê ma bê netîce mendî. Her roja panşeme keyeyî şinê serdayîşê goranê xo. Werrekna gorêke ma zî bibîne û ma zî bişîne serdayîşê gorê ci. 21 serrî yo çimê ma nê rayîrî de yo ke ma esteyê xo bigîrê."

 

‘Seserre zî derbaz bo ma omidê xo vînî nêkenê'

 

Dîvane wina vat: “Heme kes zî  xeylêk baş zano ke ê herdi zî şî emnîyet seba ke îmza bierzê. Kesê ke veng dayî înan, xeylêk baş zanê ke senîn vînî bîyê. 5 rojî dima ma ra vatî, îmza eştê. A roje ra nata tu xebere ma înan ra nêgirewta. Seserre zî derbaz bibo ma omidê xo vînî nêkenê. Waştişê ma oyo ke wa cayê cenazeyê înan ma ra vajê. Sey mêrdeyê mi xeylêk kesî bi nê hawayî ameyî vînîkerdiş."

 

‘Ma heta peynî pey dewaya xo de bê'

 

Dîvane tewr peyîn wina vat: “Bi 21 serrî yo ma tu weşî nêdî. Ma tim nê dejî ancenê. Her roje çimê mi rayîr de yo ke do rojêke xebere ma rê bêro. Ma heta nika xeylêk gorê komî û bîrî kolna. La tu wext ma esteyê înan nêdî. Roşanan de ma xemgîn ê. Her roja me zerîveşnaye û xemgîn derbaz beno. Ma do heta peynî pey nê dewa bê.”

 

‘Bi 21 serrî yo ma bêmabên cigêrayîşê xo dewam kenê'

 

Dayîka Serdar Taniş, Rabîa Taniş zî wina vat: “Seba ke esteyê xo ma bigîrê, 21 serrî yo ma xo ver danê û cigêrayîşê xo dewam kenê. Ma Cizîr de mendêne o wext. Hîn kesan vernîya înan birnabi û vatibi ‘ma polîs ê, esparê wesayîtî bibê, ma şêrê emnîyet.' La lajê mi û Ebûbekîr Denîz esparê wesayîtî nêbîyê û vatê ma do bi xo bêrê. 25ê çeleyî de şinê îfade bidê û dima ra tu xebere înan ra nêame girewtiş. Ma emniyet ra pers kerd, la vatî nêameyo tîya. Dima ra 5 saetî derbaz beno û vanê ameyê îfade dayê û şîyê. A roje ra heta ewro ma înan ra tu xebere nêgînê. Ma tu rêçêke înan nêdî. Seba ke ma cenazeya înan bivînê, ma heta nika murcatê xeylêk cayan kerd. Labelê tu cewab nêdayîne ma. Çend serrî xebere amî û vatî, ‘Cenazeya ci Kerboranî de yo’. Serê nê de ma şî û ma gonî dayî. Dimayê hîrê mengan cewab ame ke cenaze ê ma nîya." 

 

'Muracatê ma bê cewab mendî'

 

Rabîa tewr peyîn wina vat: "Dewaya ke ma akerd bê netîce mend û dima ra ma muracatê Dadgeha Heqê Merdiman ê Ewropayî (DMME) kerd. 21 serrî derbaz bi zî no dej zerrîya ma de yo. Heta ke ma saxbê ma do serê rayîrê dewaya înan bê. Heta ma yew kes bimanê wayîrê na dewa vejîyê û ma esteyê xo bivînê."