Medya Uren

 

ÊLIH - Cinîyê Êlihî hemverê tecrîdê serê Rayberê PKKyî Abdullah Ocalan û heme tepişteyan û binpaykerdişê heqan ê zîndanan rî danê, reaksîyonê xo ardî ziwan û vengdayîşê pîlkerdişê têkoşînê nobeta edaletî kerdî.

 

Bi komployê mîyanneteweyî dir Rayberê PKKyî Abdullah Ocalan tesîlîmê Tirkîya ame kerdiş û girawa  Îmraliyî de ame tepiştiş. Bi îzolekerdişî dir ame tecrîdkerdiş û 23 serrî yo tecrîd bêmabên dewam keno. Yanî tecrîd bi metodê îdarekerdişê Tirkîya û serê heme zîndanan de nê metodê xo ferz kerd. Dayîkê Aştîye yê Êlihî tecrîd şermezar kerdî û vengdayîşê xo pare kerdî.

 

'Oyo ke yeno kerdiş zulm o'

 

Wesîle Baytara ke dayîka tepişteyan a wina vat: "Kurdistan de êyê ke bi kurdî qisey bikerê û pawitişê nasnameyê xo bikerê, yenê tepiştiş. Xeylêk sîyasetmedarê kurdî seba fikr û fehmê xo ameyî tepiştiş, yan zî bi hawayêke bê huqûqî hucreyan de yenê tepiştiş. Bi bahaneyan rast nîyo ke cezaya înan qedêna û vara nêdanê. Yan zî zere de xeylêk problemê weşîye ciwîyenê. Tepişteyê ke şert û mercê giran de hewil danê biciwîyê nêweş kewenê ke nêweş ê zî rewşa înan giranêr bena. Hetê berdişê nêweşxaneyî de zî kenê tengasî. Oyo ke înan rê yeno kerdiş zilm û bêhuqûqî yo."

 

'Ma do tecrîd qebûl nêkerê'

 

Elîf Togluk Timur zî bi nê vatişan tecrîd şermezar kerd: "Azadîya birêz Abdullah Ocalanî do bibo wesîleyê azadîya dinya. Tecrîtkerdişê birêz Abdullah Ocanî zî kelepçekerdişê azadîye yo. No metodê tecrîdî êdî heme tepişteyan rê yeno ferzkerdiş û nika bi hezaran tepişteyê sîyasî bi eynî problemê dir rî bi rî yenê verdayîş. Dewlete tecrît, zulm û îşkence kerdo metod û serê kurdan dano ferzkerdiş. Ma nê zulmî qebûl nêkenê. Bêsûc û sebeb bi hezaran kurdî ameyê tepiştiş û no zî bes nîyo îşkencekerdiş. Wa êdî cenaze zîndanan ra nêvejîyê. Ma do tecrîd qebûl nêkerê."

 

'Ma do seba aştî têkoşîn bikerê'

 

Dayîka Aştîye Meyase Akdag zî wina vat: "Bi hezaran nêweşî û bi taybetî zî yê ke rewşa înan giran a zîndanan de yenê verdayîş. Rexmê ke cezaya înan qediyaye zî nînê veradayîş û bi bahenayan înfazê înan yeno veşnayîş. No zî yeno manaya ke wazenê cenaze serê ma de bêro. Ez zî veng dana heme kurdan kena, heme kurdan kena, wa wurzê û destûr nêdanê ke êdî cenaze serê ma de bêrê. Çi bikewo ser milê ma lazim o ma bikerê û wayîrê dewaya înan vejîyê. Êdî bes o! Dewleta tirkî çi ma ra wazena. Ma çimê înan gonî ra nêbeno mird? Wa bizanê gonî bi gonî nîna şitiş. Lazim o awe birijnê adirî ser. Keyeyê ma yê tepişteyî dest bi nobeta edaletî kerdê, seba ke Tirkîya de edalet nêmendo. Ma çiqas seba edaletî û aştîye hewil bidê zî tu game nêerzenê û ê xo de israr kenê. Ma Dayîkê Aştîye yê û ma do seba aştî têkoşîn bikerê."

 

'Lazim o ma seba edaletî têkoşîn bikerê'

 

Nefiye Çelîk zî dîyar kerd ke birayê ci bi xo zîndan de yo û vat: "Emrê ma verê zîndanan de qedîya. Pîyê ma ra heta wayê û birayanê ma û tutê ma zîndanan dîyê. Tu cayê dinya zî oyo ke komel yan zî  kesêke rê nêameyo kerdiş. No zilm û qetlîam serê şarê kurdî yo. Ma qebûl nêkenê. Ganî ma tepişteyê zîndanan tena nêverdê û înan wayîr vejîyê. Ma heta nika bi çalakîyan dir  tecrîd yeno şikinayîş, dîyar o ke ma eşkenê bikerê. Kes demokrasî û edalet nêdano ma lazim o seba ma  bigîrê ma do têkoşîn bikerê."

 

'Ma vengdayîşê safîkerdişî kenê'

 

Taliya Teyî zî wina vat: "Lazim o ma vengê xo berz bikerê û problemnaê xo bi israr bîyarê ziwan. Bêvengîya ma yena manaya merdişî. Lazim o ma bê hêvî nêmanê û xo ver bidê. Ez nika seba nê sebebî veng danê şarî û heme selahîyetdaran kena. Her cayê Kurdistanî hêrişî yenê kerdiş. Nika Tirkîya zî bi eynî metodê hewil danê ke têkoşînê ma yê seba nasnameyê ma yeno kerdiş bêro pelçiqnayîş. Bi taybetî zî bi tecrîdê ke serê birêz Abdullah Ocalanî kenê wazenê ma kurdan tecrîd bikerê û birijnê. Ma nê tecrîdî qebûl nêkenê û ma vengdayîşê averşîyayîşê safîkerdişî kenê."