Nîşmiye Guler

 

STENBOL - Stenbol de bi şîarê 'Ma zîndanan de merdiş nêwazenê, ciwîyayîş pawenê' Nobeta Edaletî amî destpêkerdiş.Dadîya tepişteyî Emrah Ûbîç, Dilşah Ûbîç wina veng da keyeyan: "Ma seba tutanê xo ciwîyenê. Ganî ma seba  tutanê xo fedekarîye bikerê. Ganî her kes tewrê nobeta edaletî bibo."

 

Keyeyê tepişteyan bi amancê binpaykerdişê heqan ke zîndanan de peynî bêro û  tepişteyê nêweşî bêrê veradayîş Amed û Wan de Nobeta Edaletî dabî destpêkerdiş. Stenbol de bi şîarê 'Ma zîndanan de merdiş nêwazenê, ciwîyayîş pawenê' Nobeta Edaletî amî destpêkerdiş. Yew keyeyî ra ke tewrê nobeta şubeyê ÎHDyê Stenbolî de paştdayîş dayo zî keyeyê tepişteyê bi nameyê Emrah Ûbîçî yo Zîndanê Tîpê Fyî yê Bolûyî de tepişteyo. Dadîya ey Dilşah Ûbîç seba lajê xo yo nêweşê astimî û 13  serrî yo tepişteyo tewrê nobete bena.

 

13 serrî de sirgunê xeylêk zîndanan ame kerdiş. Emrah 2009î de ame tepiştiş  û hîrê sûcê cîyayî ra 26 serrî û sewbîna cezayê muebetî ci rê ame dayîş. Dosya ke cezayê muebetî ci rê ameyo dayîş, seba newe ra bêro hukum dayîşî şî edlîye. 13 serrî yo  tepişte yo û sirgunê xeylêk zîndanan bîyo. Tewr peynî sirgunê Zîndanê Tîpê Fyî yê Bolûyî ame kerdiş.

 

'Bi kelepçe cigêrayîşo viranî ame ferzkerdiş'

 

Dadîya ey Dilşahe da zanayene ke lajê aye 13 serrî verî Silopîye de ameyo tepiştiş û dima ra berdê Zîndanê Tîpê Dyî yê Amedî û hîrê serrî peyra sirgunê Zîndanê Çewlîgî ameyo kerdiş. Dilşahe wina vat: "Uca ra berdî Wan û uca ra zî berdî Zîndanê Kirikkaleyî. Şewêke de dest û lingê ey girêdanê û bi helîkopter benê Kirikkale. O wext keyeyî şîbî zîndan tutanê xo ra hayî girewtbî ke tepişteyêk hîrê rojî verî ardo zîndan û werd nêdawo ey. Lajê mi mengêke yo Bolû de yo. Bi destê kelepçekerde cigêrayîşê viranî ci rê ameyo ferzkerdiş."

 

'Ganî ma bibê vengê tutanê xo'

 

Dilşahe dîyar kerd ke, heme zînadanan de  tehda û şîdet esto û nika zaf zêdeyêr bîyo û  venga hêsgirîye kerd: "Wa keyeyî bêrê  nobeta edaletî paştdayîş bidê. Ê tepişteyî tutê ma yê. Ma cîyayîşkerdişî nêkenê. Wa bêrê ma dest bidê yewbînan û peynîya nê îşkenceyî bîyarê. Ma vengê xo berz bikerê.  Ganî heme dadî duştê nê tecrîdî de vengê xo berz bikerê. Êdî cenazeyî zîndanan ra vejîyenê. Ma tersenê ke çîyêke bêro sereyê tutanê ma. Lajê mi bêsûc ame tepiştiş û cezayê muebetî dayî ci, sewbîna 26 serrî zî cîya ceza dayê ci. Çi heyf êdî cenazeyan zî nêdanê keyeyan. Coka ma veng nêkenê cenazeyan zî  nêdanê ma. Ganî ma keyeyê xo de nêronişê. Ganî ma wayîr tutanê xo rê vejîyê. Ganî ma seba tutanê xo fedekarîye bikerê."

 

'Ma seba tepişteyan nobete da destpêkerdişî'

 

Dilşahe bale ante serê nobeta edaletî û wina peynîya ci ard: "Heta çalakîyê ma netîce nêgîro do bidomo. Lajê mi nêweşê astimî yo û nîno dermankerdiş. Emrah kewt grevê veyşanîyî yê 2018-2019î. 153 rojî grev de mend. O wext nêweşîya ey girane bî. Dimayê grevî çimê ey zî xerepîya bî. Ganî ci rê verçimike bêro herênayîşî. Pêro ke ma bi desan reyî verçimike şawite, îdareyî apey şawit. Nêbenê nêweşxane zî. Ma şinê zîndanan, tehda ma rê zî kenê. Ma nêeşkenê bi rehetî qisey bikerê. Ez veng heme keyeyan rê kena, wa tewrê nobetan bibê."