Sema Çaglak

 

AMED - Hemsereka TMMOByî Selma Aslan derheqê projeyê vurnayîşê bajarwanî yê Peyasê Amedî de qisey kerd û dîyar kerd ke projeyê vurnayîşê bajarwanî de roniştoxê nê cayan yenê mexdûrkerdiş û proje goreyê berjewendîyê ekonomî yê hîn kes û derûdoran yenê averşîyayîş.  

 

Xeylêk qezayê Amedî xebatê vurnayîşê bajarwanî dewam kena û rojeve de cayê xo pawenê. Dimayê taxê Benûsen, Fîskaya û Kaynartepeyî nika zî qezaya Peyasî de projeyê vurnayîşê bajarwanî ameyo destpêkerdiş. Taxa Firatî ya qezaya Peyasî de, wareyêk 52 hezar metreqare ke 96 keye ci de yê, vurnayîşê bajarwanî ame destpêkerdiş. Derheqê babete de Hemsereka Yewîya Odaya Mîmar û Muhendîsê Tirkî (TMMOB) Selma Aslan qisey kerd.

 

‘Seba Peyasî metodê planî amebi vurnayîş'

 

Selma destpêkê xo de dîyar kerd ke  hetê Wezaretê Bajarwanî û Hawirdorî ra bi qanûnê hûmara 6306, xeylêk herêmî sey wareyê bi rîsk ameyî îlankerdiş û uca de xebatê vurnayîşê bajarwanî ameyî destpêkerdiş. Selma wina vat: “Projeyê vurnayîşê bajarwanî demê vurnayîşê Sûrî de tewr zêde ameyî munaqeşekerdiş û uca de polîtîkayêk cîya ame kerdiş. Peyas zî demêk derg o munaqeşeyê nê projeyan bi. Labelê seba Peyasî plan ame vurnayîş. Serra vîyarte seba taxa Peyasî projeyê vurnayîşê bajarwanî bi la netîceyê dewaya ke hetê Odaya Plansazê Bajêrî ya Şubeyê Amedî ra amebi akerdiş de no proje amebi vindarnayîş."

 

‘Berjewendîyê ekonomî esas gênê'

 

Selma dewam de wina vat: “Taxa Benûsenî de seba derûdorê Sûrî bêro vengkerdiş, no proje ame averşîyayîş. Taxa Fîskayayî de seba ke wareyê zergûnî wêran bikerê proje ame viraştiş. Sewbîna qezaya Rezanî û Sûr de nê projeyî bi amancê cîya ameyî averşîyayîş. Labelê no beno mexdûrbîyayîşê komelî. Yanî kesê ke keyeyê xo de manenê, dimayê ke ê banî xira bikerê do ê kesî şêrê ça dîyar nîyo. Nimûneyê ci Sûr de kewt rojeve. Dima ra ma xeylêk nimûneyê wina dî. Dima ra heme projeyê vurnayîşê bajarwanî de ma xeylêk nimûneyê bi nê rengî dî. Bêguman no tena Amed de tena wina nîyo, gama ke ma Tirkîya ewnîyenê heme bajarê ke vurnayîşê bajarwanî yeno kerdiş, metodê cuya komelî yeno vurnayîş."

 

‘Ganî xebatêke hempar bêro kerdiş'

 

Selma, wina qiseykerdişê xo qedêna: “Nê projeyan de lazim o ke  rewşa komelî ya ekonomî zî verê çiman de bêro girewtiş û komel haydar bo. La çi heyf, nê projeyan de yan komel bê melumat yeno verdayîş yan zî tena çend kesan rê zanayîş yeno dayîş. No wareyî de  ganî xebatêke hempar bêro kerdiş. La çi heyf sey yeno waştiş xebate nîna kerdiş û no zî metodê polîtîkayê asîmlasîyonî yê."