KONYA - Waya Îpek Dedeogullari ke ameye qetilkerdiş, Turkan Rifatoglu, vengdayîşê wayîrvejîyayîşê dewa kena.

30ê temuze 2021 de qezaya Meramî ya Konyayî de keyeyê Dedeogullariyê kurdî ke Qers ra bî 4 ci ra cinî 7 kesî hêrişê nîjadperestî ya Mehmet Altun de ameyî qetilkerdiş. 12ê gulane de keyeyê Keleş û Çalikî hemverê keyeyê Dedeogullari hêrîşê nîjadperestî kerdibî û seba tedbîr nêamebî girewtiş, qirkerdiş ame kerdiş. Merdimê keyeyê Dedeogullari her wext dîyar kenê ke cipersayîşêk bi tesîr nêameyo kerdiş û seba kurd bîyê ameyê qetilkerdiş.

Çar cinîyanê ke ameyî qetilkerdiş dayîka Îpek Dedeogullari bî. Waya ci Turkan Rifatoglu, hesret û vîrêkerdişê xo hemverê waya xo ajansê ma rê ard ziwan.

 

Îpeke serra 1964 de Agirî de 10 tutî keyeyî ra ameye dinya. Tutîtîya aye Agirî de derbaz bena û emrê qij de yena zewicnayîş û Qers de bica bena. Dima ra seba hîn probleman 1989 de koçê Konyayî kenê. Îpeke heta roja qirkerdişê ameye ciwîyayîş zî Konya de dinyaya xo derbas kerdî. Îpeke debara xo bi pesdewarî kerdêne. 

 

‘Mi dî danê Barişî ro’

 

Turkane dîyar kerd ke aye xeylêk cinîyêka rîyê ci huyayîne bî û zirarê ci nêresayîne tu kesî. Turkane da zanayîş ke têkiliyê aye û waya ci xeylêk xurt bîyo û her roje şîyê têhet û her tim keyeyê yewbînan de bîyê. Turkane dîyar kerd ke rojêke reyna keyeyê înan de bîya, cîranê înan yê ulkucu Keleş înan tehdîd kerdo û 12ê gulane de zî hêriş kerdê. Turkane wina vat: “Waya mi vat, ‘Ma şan de êdî rakewtêne, teber ra veng ame. Ma fam nêkerd ke çîyo. Ma vejîyayî teber ma ewnîyayî ke dorê lajê mi Barişî girewtê û danê piro.”

 

‘Têkilîyê aye bi cîranan dir baş bi’

 

Turkane dîyar kerd ke aye xeylêk vîrîya waya xo kerda û wina vat: "Îpeke cinîyêka erjîyaye û baş bî. Her kesî aye wina nas kerd. Cinîyê taxe aye wina nas kerdêne. Halê xo de bî. Zirarê aye kesî rê çinbi. Têkiliyê aye bi cîranan dir baş bi. Ameyîne û şîne. Rez û baxçeyê înan estbî. Fêkî kom kerdêne. Heywanê ci bî. Înan ra xeylêk  hes kerdêne. Demê xo pêroyî mîyanê rez û baxçe de derbas kerdêne.”

 

‘Vinîkerdişê 7 nifûsî normal nîyo’

 

Turkane hêrsê xo vera qirkerdişî wina ard ziwan: “Waya mi qet hişê mi ra nêşina. Sohbetê ma, baxçe de roniştişê ma yeno vîrê mi. Her tim huyayîne. Nê nînê xovîrrakerdiş. Ma înan qet xo vîr ra nêkenê. Vînîkerdişê 7 nifûsî normal nîyo. Tutê aye destê mi de pîl bî. Mi xeylêk înan ra hes kerdêne. Mabêne înan û cîranê înan yê Tirkî keyeyê Keleşan baş nêbi. Înan zî kurdan ra hes nêkerdêne. Her tim waya mi înan ra vatêne, ‘Ma do şima tîya ra wedarnê.’ Dima ra zî adir veradayî keyeyê înan. Ma edelet wazenê.”

 

Turkane tewr peyên vengdayîşê wayîrvejîyayîşê dewa kerd û vat sere de kurdî ganî wayîrê dewa vejîyê û salona roniştişî pir bikerê.