ANQARA - Sîyasetmedar û pawitoxe Bedîa Ozgokçe derheqê rewşa Aysel Tugluk de qisey kerd û da zanayene ganî rewşa tepişteyê nêweşan bêro rojevê sazgehê Ewropayî û vat hedefê înan no yo ke babetê roniştişê Konseyê Ewropayî yê 24ê Çeleyî de dest pê kenê, bîyarê rojeve. 

 

Sîyasetmedara Kurdan Aysel Tugluk 5 serrî yo Zîndanê Tîpê Fyî yê Kandirayî yê Kocaelî de yena tepiştiş. Aysele ke 10 serrî ceza ci rê ameya birnayîşî meseleyê weşîye ciwîyena û di serrî yo teşhîsê demanse ci rê ameyo dayîş. Rewşa Aysele roj bi roje giran bena. Pêwa raporo ke Sazgehê Tîpê Edlî (ATK)yî 'nêeşkena zîndan de bimano' zî ATKyê Stenbolî eksê nê rapor da û vat 'eşkena zîndan de bimano'. Hemverê nê de bi hezaran cinîyan reaksîyon da û kampanyayî caardî. Tewr peynî sernameyê  'Seba Aysel Tugluk 1000 cinî' kampanya ameye destpêkerdiş û cinîyan azadîya Aysele waşt. 

 

Hemşaredara Şaristanê Girdî ya Wanî ke qeyûm tayînê vera aye ame kerdiş, avûkate Bedîa Ozgokçe, derheqê rewşa Aysele de, hêrişê hemverê Aysele û kampanyayî yenê kerdiş de qisey kerd. 

 

‘Aysel Tugluk profîlê cinîyêka xurt a’

 

Bedîa vat ke Aysele xebatanê Wanî de Hereketê Komeleyê Demokratîkî (DTH) de nas kerda û vat, Aysele profîlê cinîyêka xurt a û wina erjna: "Sewîyeyê  awankerdişê DTPyî de hemserekîye amî îlankerdiş. Aysele yewin awankerdoxê cinî û hemsereka ci bî. O wext hemserekîye baş nêamebî fehmkerdiş la Aysele têkoşîn û şîdetî de hemverê cinî de îşaretê gamê samîmî bî. Wexto parlementera Wanî amî weçîniyayîş, ma ra muşahîdî  girewtêne. O wext Wan de newe sazgehê cinîyan û koperatîfî ameyêne akerdiş. Aysele bi nêzdîbîyayîşê sîyasî nêewnayîne û hewl dayêne cinîyan nuqtaya muşterekîye de bîyaro verê yewbînî û vatêne do tesîrêk bîyaye prosesê qanûnî de bêro kerdiş." 

 

‘Rewşa êsîrkerdişî esta’

 

Bedîa derheqê tepiştişê Aysele de zî nê çîyî ardî ziwan: "Ma sîyasetmedarê ke hetê şarî ra ameyê weçînayîşî yê. Her çîyî ke ma qisey kenê di çarçewaya destnêdayîşê kursîye de yê. Bêşik ma eşkenê bêrê muhakemekerdiş la vera qiseyanê azadîya fikr û fehmî yî, muhakemekerdiş mimkun nîyo. Nika heme dosyayê embazê tepişteyan û dewayê tepiştişî di çarçewaya azadîya fikr û fehmî de yê. Bi rayê ke ma şarî ra girewtê,  ma seternayîşê heqî kenê. Seba ke ma qisey kenê ma yenê muhakemekerdiş. Yewin sebebê tepiştişê Aysele qiseyanê nasnameyê sîyasî kerdê, sûcdar amî ramojnayîş û rewşa êsîrgirewtişî babeta vatişî ya."

 

‘Serê Aysele ra Kurdan ra heyf yeno girewtiş’ 

 

Bedîa dîyar kerd ke Aysel Tugluk verê xeylêk sebeban hedef yena girewtiş û wina derg kerd: "Aysele hemserekêka awankerdox a. Hedefê hukmatî yo tewr pîl hemserekî yo. Endamîya rêxistine ra dewa yena akerdiş. No hem hêrişê hemverê programê partî û hem zî duştê sîstemê hemserekîye yo. Aysele zî hedefê nê ya tewr pîl a. Bi nê tewirî serê Aysele de Kurdan ra heyf yeno girewtiş." 

 

‘Zîndanî bîyê keyeyê mergî’

 

Bedîa bale ante serê zîndananê Tirkîya û wina ard ziwan: "Zîndanan de binpaykerdişê heqî yê pîlî yenê  ciwîyayîş. AKPyî îdîa kerd ke 'îşkenceyî rê sifir tolerans' esto, la 7 serrê peyîn de hemverê HDPyî û Kurdan de hêrişê cidî û cezayê pîlî estê. Ma prosesêke tarî de derbas benê. Dewlete eynî dewlet a. Prosesê pandemîyî de caardişanê rejîmê înfazî giranêr bîyê. Bi tewirêke keyfî merdimî yenê tepiştişî û zîndanî bîyê keyeyê mergî." 

 

Bi mektub û pêvînayîş do rewşa tepişteyan bêro vatiş

 

Bedîa bale ante serê paştdayîşî yê cinîyan ê seba Aysel Tugluk û vat cinîyê sirgunî de yê seba veradayîşê Aysele xeylêk xebatan kenê û xebatê ke rayîrşinê zî wina îzah kerd: "Ma wexto peyîn de sîyasetmedarê cinî metnêk çapemenî hadre kerd. Ma çapemenîya Ewropa û Tirkîya rê eşkera kerd. Ma venga kampanyaya paştdayîşî kerd. Do no hetî ra xeylêk kampanyayî bibê. Ma bi mektubêke rewşa Aysele îzah kerd. Ma rewşa tepişteyê nêweş ê sîyasetmedaranê Kurdan vatî. Ma parlementoyê eyaletan û parlementoya dewlete ya Almanyayî ra malûmat da û ma randevû girewt." 

 

‘Kampanyayî yenê kerdiş’

 

Bedîa qiseykerdişê xo wina dewam kerd: "Ma mektub sazgehê Konseya Ewropayî rê û parlementoyê Ewropayî rê şawitî. Ma waştişê randevû kerd. Ma Komîteyê Taqîbkerdişê Konseyê Ewropayî rê mektubêke verhîra şawit. Ma wazenê nê sazîyan dir pêvînayîşêk rî bi rî bikerê. Ma Komîserîyê Heqê Merdiman ê Konseyê Ewropayî rê nuşt. Ma rewşa Aysele û tepişteyanê bînan vat. Ma parlementeran ra waşt ke teslaqê persê rewşa tepişteyê nêweşan rojeve de verdê.  Ma CPTyî rê nuşt. Ma waşt CPT bêro Tirkîya û na babete sero ma pêvînayîşêke bikerê. Ma venga kampanyayanê Rêxistinê Heqî yê Mîyanneteweyî kerd.  Ma Hekîmanê Sînornênasan rê mektub şawit. Ma weşanxaneyê Ewropa û dinyayî rê nuşt. Ma Raportorê Tirkîyayî yê Parlementoyê Ewropayî rê waştişê pêvînayîşî kerd. 24ê Çileyî de do kombîyayîşê Konseyê Ewrûpayî dest pê bikero. Eke şertê fizîkî yê kombîyayîşî bero ca ke, ma hedef kenê ke heyetê xo dir uca kombîyayîşêk bikerê. Şertê pandemîyî bikerê astengî zî ma do mektûb, onlîne dir xebatanê xo bikerê." 

 

‘Ganî Yewîya Ewro qerar bido’

 

Bedîa peynîyê qiseyanê xo de da zanayene ke hedefê înan no yo ke hêsgirîye zafêr bikerê û bi nê vatişan peynî ard: "Seba şert û mercî baş bibê, tepişteyî bêrê tehlîyekerdiş ma hewl danê. Umîdê ma no yo ke Tirkîya bibo welatêke demokratîk û Tirkîya dest nê qeneatê xo yo ke merdiman çinî hesibnena ra verado. Ê ke nê wazenê ganî veng bidê vengê ma. Yewîyîya Ewropayî gelo wazena rejîmêk dîktator bivîno yan zî welatêk ke erjê unîversalan paweno bivîno? Ganî Yewîyîya Ewropayî qerarê nê bido."