KONYA - Çetîn Dedeogullari ke keyeyê Dedeogullari ameyî qetilkerdiş ra tena mendo, dîyar kerd ke dewlete sozê ke dayê bi ca nêardê û vernîya qirkerdişî de tu astengî çin o û bale ant serê tehlukeyê ke do gumanbarî bêrê veradayîş.

 

30ê Temuza 2021 de qezaya Meramî ya Konya de keyeyê Dedeogullari ke bajarê Qersî ra keyeyêk kurd bi, 4 ci ra cinî 7 kesî hêrişê nîjadperestî yê Mehmet Altun ra ameî qetilkerdiş. 12ê Gulane de keyeyê Keleş û Çalikî hemverê keyeyê Dedeogullari hêrişê nîjadperestî kerdibî û seba tedbîrî nêamebî girewtiş, qirkerdiş ame kerdiş û gumanbar dimayê çend rojan ame tepiştiş. Yew gumanbarê qirkerdişî Mehmet Altun 4in Dadgeha Cezaya Giran ya Konya de tepişte yeno muhakemekerdiş û keyeyê Keleş û Çalik Alî û Lutfu Keleş tepişte, kesê bînî yê keyeyî zî 8in Dadgeha Cezaya Giran ya Konyayî yenê muhakemekerdiş.

 

Derheqê keyeyê Keleşî de, hetê Yewin Dadgeha Keyeyî ya Konyayî de çarçewaya qanûnê hûmara 6284 de qerarê pawitişî vejîya. Goreyê qerarî merdimê Dedeogullari do nêzdîyê keyeyê Keleşî nêbê.

 

Yewin endamê keyeyê Dedeogullari Çetîn Dedeogullari, derheqê prosesê dadgehe û tedbîrê ke nêameyê girewtiş de ercnayîş kerd.

 

‘Her di dosya yewbînan ra cîya yenê ramojnayîş'

 

Çetînî vat, dewaya hêrişî, bi dewaya qirkerdişî dir eynî ya û vat: "12ê Gulane de nêresayî amancê xo la 30ê Temuze de amancê înan bi ca ame. Ma waşt ke her di dosyayî bibê yew. Serdozgerîya Komare ya Konyayî vat, do bibê yew. La nika astengîyê cîya danê verê ma. Sey ke her di dosya yewbînan ra cîya nîşan danê. La her di dewamê yewbînan. Na dosya de bêhuqûqî pîl bena. Ez 14ê Gulane de welat de bîya. Ez bîya şahid ke keyeyê mi çi ciwîya yo."

 

‘Polîsan her di keyeyan ardê vera yewbînan'

 

Çetînî vat, dima ra heme gumanbarî ameyê tahliyekerdiş, waştişê pawitişî kerdê û vat: "Qerekolê polîsan ê Lalebahçe, dozgerî nê hemine nêwazenê bivînê û înan vera dayî. Qerekolî hesasîyetê lazim nîşan nêda. Mabêne di keyan de pêrodayîş vejêno, ganî qerekol cîya cîya veng bido keyeyan. La demo ke ma seba gerrekerdişî şî Qerekolê Lalebahçeyî, keyeyê bîn zî uca de bî. Hewl danê ke keyeyan bîyarê hemverê yewbînan."

 

‘Seba ke keyeyê mi Kurd bi qetil kerdî’

 

Çetînî vat, dimayê 12ê Gulane ra roniştişê yewin de polîsan hêrişê keyeyê mi kerd la seke keyeyê mi hêriş kerdo nîşan dayî û vat: "Keyeyî ra hîrê kesî ameyî derbkerdiş û destbendkerdiş. Birayê mi 16 serre bi o zî destbend kerdî. Keyeyê mi kesî nêkişto. La înan 7 kesan keyeyê mi ra kişt. Dewa senîn dest pêkerd, do wina zî dewam bikero. Seba ke keyeyê kurd bî ameyî qetilkerdiş."

 

‘Keyeyê Keleş, Çalik, Altun, Guven û Şen mîyan de yê'

 

Çetînî dîyar kerd ke serebût hetê waya gumanbarî, Ayşe Keleşî ra ameyo organîzekerdiş û wina vat: "No qirkerdişêk ameyo plankerdiş o. Nika xêrcê di kesî her kes serbest o. Dozgerî gumanbaranî ra waşto ke hîrê kesî sûc bigîrê serê xo. Nê qeydê whatsapî de zî estê. Avûkatî zî mîyan de yê. Avûkat, keye, dozgerî heme yew ê. Heme kesê dorê Mehmet Altun nê planî de yê.  Hasan Şen, Merve Şen, Mehmet Guven heme yew ê. Selahîyetdarê partîya îqtîdarî ke ameyî cenaze û şîn soz dayî mi. Ez wazena lezkî serebût bêro cigêrayîş."

 

‘Seba ke edalet waşt hêriş kerdî'

 

Çetînî dîyar kerd ke eke dimayê serebûtê 12ê Gulane tedbîr biameyîne girewtiş do keyeyê mi nêameyîne qetilkerdiş û vat: "Sebake ma edalet waşt, hêriş kerdî. Sozê keselahîyetdarê dewlete dayî bi ca nêameyî. Wezaretê karê zere, serekkomar, wezaretê dade û parlamenteran na babete de soz dayî. Her kes zano ke Mehmet Altun bi tena sereyê xo nêeşkeno nê qirkerdişî bikero. La çi heyf her di îdianame zî seba gumanbarî bêrê veradayîş ameyê amadekerdiş. Veradayîşê gumanbaran tehdîdêko pîl o. Asayîşê ganê mi çin o. Tu astengî vernîya qirkerdişê newe çin o."