Sema Çaglak

 

AMED - Endama Îdarekarîyê TTByî Rezan Altindag bale ante serê varyantê Omîcronî û dîyar kerd ke, her çar kesan ra kesêke Omîcron o. Rezane, wina vat: "Komel, doneyê zaniztî yê ke heqê ci yo bêpar yeno verdayîş. Seba nê zî bawerîya komelî îdarekaranê weşîye rê qels bena. No zî beno sebeb ke pandemî ameyo normalkerdiş û vîrus çiqas zafêr bibo zî cidî nîno girewtiş."

 

Humara dekewtişê covîd-19î her ke şino zafêr beno. Xusûsî dimayê varyantê Omîcronî ra xo mojna ra,  seranserê welatî de hema vajê hûmara dekewtişî, di qatî zafêr bîyo. Tirkîya de zî  her ke şino varyantê Omîcronî zafêrî vila beno. Endama Îdarekarîyê Odeyê Hekîman ê Tirkî (TTB) Rezan Altindag derheqê varyantê Omîcronî de qisey kerd. 

 

‘Lezkî vila beno’

 

Rezane destpêkerdişê qiseyê xo de xusûsîyê varyantê Omîcronî akerd û îşaret kerd ke Omîcron xeylêk lezkî vila beno. Rezane wina qisey kerd: "Covîd-19  enfeksîyonêke vîral o. Coka nê zî vîrusêk ke tim bedilyeno mutasyonî û xo rê varyantê bînî afirneno. Eke qandê ke yeno waştişî derzenî nêrê caardiş û tevdîr nêro girewtiş zafêr varyantî zî do vejîyê. Nika zî ma tewr zafêr serê Omîcronî de qisey kenê. Cîyayîşê ey yê goreyê varyantanê bînan ê ke lezkî vila benê, pêroyê Tirkîya de û hem zî herême de hemverê zafêrî asayenê. Coka ke xopawebîyayîşê bedenê ma qels o û ma tesîrê nê varyantî giran ciwîyenê." 

 

‘Ma do bivînê’

 

Rezane dîyar kerd ke xomojnayîşê varyantê Omîcronî hema eşkera nîyo, labelê hetê xeterbîyayîşî de berzêr o. Rezane vat: "Destpêkerdişî de xeylêk kesî îşaretê enfeksiyonî yê rayîrê nefeso corîn de yenê nêweşxane. O zî seba vilabîyayîşî sebebêke yo. Yan zî yê koronayî ra zaf cîya nîyo. La vera ke lezkî vila beno û hetê qelsbîyayîşê xopawebîyayîşê bedenî de ma sero vindenê. Proseso ke ma nika ci de derbas benê, xeylêk hetan ra yenê munaqaşekerdiş. Her welatî de goreyê xo prosesê pandemîyî ciwîyenê. La ma do  tesîrê ci hewteyanê ameyoxî de bi zelalî bivînê." 

 

‘Sîstemê weşîye sernêkewte bîyo’

 

Rezane vat ke, nêweşxaneyî û polîklînîkî seba janî bes nîyê û wina qisey kerd: "Çi heyf ke êdî ma nêeşkenê behsê tevdîrê asasî bikerê. Vera ke ciwîyayîşêk sey pandemîyî çinî yo, ma derbas kenê. Nêweşxaneyî û polîklînîkî bes nêkenê. Serebûtê tewr qijî de sîstemê weşîye sernêkewte şinê. Sewbîna xora yeno vînayene ke xebatkarê weşîye seba heqê xo, grev û çalakîyan de yê. Yan zî bi tewirêke eşkera ma vînenê ke sîstemê weşîye sernêkewte şino. Vera ke hetê hûmare de kemî,  hetê rih û fîzîkî de zî xeylêk qels ê. Ganî sere de ê persayîşî bêrê helkerdiş." 

 

‘4 kesan ra yew ci ra Omîcron o’

 

Rezane, îşaret kerd ke tewirêke zelalî doneyê janî nînê eşkerakerdiş û wina vat: "Herême de hûmara kesê aşîkerde kemî yê. O zî sey dezavantajêke keweno vernîyê ma. Ê ke aşî benê a nêweşîye tay şenik vîyarnenê. Nê babetan de xopawebîyayîşê bedenî yê kesan ganî xort bo û nê hetî de rastkerdişêk bêro sazkerdiş. Persayîşê ma yo tewr sereyîn, şaşîyê rayîrşîyayîşê prosesê pandemî de yê. Komel doneyê zanistî ra, ê ke heqê ci yo bêpar yeno verdayîş. Vera nê zî bawerîya komelî îdarekerdişê weşîye ra nêmaneno.  A zî yena mehnayê ke pandemî êdî bîyo rêze ra û vîrus çiqas zafêr bibo zî cidî nîno girewtiş. Xeylêk kesî êdî tevdîrê pandemî nêgînê. Destpêkerdiş de heme kesî zereyê keyeyî dir sînor kerdî la dima sey pandemî çinî ya polîtîkayî eştî vernî. Ê zî mexlûbkerdişê verpersîyarî ra polîtîkayê weşîye eştî vernî. Labelê pêro nînan yewî ra ganî ma tevdîrê xo bigîrê û weşîya xo û weşîya komele ya xo bipawê."