RIHA - 'Nobeta Edaletî' ya Emîne û Ferît Şenyaşarî yê verê Edlîyeyê Rihayî de roja 315ine de dewam kena. Keyeyî serê hesabê xo yê Medyaya Dîjîtale de nê çîyî vila kerdî: "Gelo do otorîterêke wayîrê wijdanî nê zilmî ra vajo bes o, nêvejîyo?" 

 

Netîceyê hêrişî de merdim û pawitoxê Parlementerê AKPyî yê Rihayî Îbrahîm Halîl Yildiz ke duştê dikanê înan de caard, mêrde û 2 tutê Emîne Şenyaşar dinyaya xo bedilnayî. Duştê nê zilmê hemverê keyeyê xo Emîne Şenyaşar û lajê xo Ferît Şenyaşar, 9ê Adare ya 2021î de verê Edlîyeyê Rihayî de dest bi nobeta edaletî kerd. Nobeta Edaletî roja 315ine de dewam kena. Ewro zî Emîne û lajê xo Ferît Şenyaşarî keyeyê xo yê qezaya Pirsûsî ra ameyî verê edlîyeyî û dest bi çalakîyê xo kerd. 

 

Keyeyî, serê hesabê xo yê Medyaya Dîjîtale de nê mesajî zî vilakerdî: "Serrêke yo dadîyêke verê berê Edlîyeyê Rihayî de pabeyê edaletî ya. Wezîrê Edaletî vano, 'Berê edlîyeyî, berê edaletî yo'. Welatî, vatişanê serê kursîyan ra yenê kerdiş bawerî bikerê, yan zî çîyê ke yenê kerdiş bawer bikerê? Gelo do otorîterêke wayîrê wijdanî ke nê zilmî ra vajo bes o, nêvejîyo?"