Rojda Aydin 

 

ŞIRNEX - Endamê Meclîsê Dayîkan ê Aştîye yê Silopî, hêrişê hemverê Wargehê Multecîyan ê Mexmûrî şermezar kerdî û vatî: "Hewldayîşê hukmatê Bexda û Hewlêrî nîno qebulkerdiş. Ganî şarê Kurdî hemverê nê de bibê yew û wayîrê Mexmûrî vejîyê."

 

17ê temuza 2019 de dimayê kiştişê berpirsîyarê MÎTî yê Herêma Federal a Kurdistanî Osman Kose, Hukmatê Herêma Federal a Kurdistanî ambargo da serê Wargehê Multecîyan ê Şehîd Rustem Cûdî (Mexmûr). 27ê kanûna 2021ê de zî hêzê leşkerî yê Iraqî hewl da ke bikewê Wargehê Multecîyan ê Şehîd Rustem Cûdî (Mexmûr), wargehî bi têlan ablûqa kerdî. Pêwa nînan xeylêk rey Mexmûr bi hêrişê Arteşa Tirkî dir zî rî bi rî mend.

 

Derheqê babete de Endamê Meclîsê Dayîkê Aştîye yê Silopîyê Şirnexî ajansê ma rê qisey kerdî.

 

‘Seba zulmî koçber bî...'

 

Dayîka Aştîye Emîne Ozerk, hêrişê hemverê Mexmûrî şermezar kerd û veng da Mesût Barzanî ke fek nê şerî ra vera bido. Emîne wina vat: "Wa Barzanî bîyaro vîrê xo wexto ke zulmê Saddamî rema kurdî wayîrê înan vejîyayî. Ma kurdî wayîrê Barzanî û welatîyê Başûrî vejîyayî. Barzanî çira nê rojan xo vîr ra kerdo? Ganî Barzanî goreyê waştişê dişminê kurdan tênêgêro. Ê kurdê Mexmûrî seba zilmê dewlete koçê Mexmûrî kerdî. Ê kurdî seba kêfî nêşîyê uca. Wa nê ambargoyî serê şarê ma ra wedarno. Ma tu wext nêeşkenê hemverê nê zulmî bêveng bibê. Seba çi dorê Mexmûrî kerdê binê ablûqa. Şarê ma uca yeno kiştiş û zulmî dir rî bi rî yê. Çend mengî yo dorê Mexmûrî de ablûqa ameyo kerdiş."

 

'Hemverê hêrişan ganî yewbîyayîş bibo'

 

Emîne vat ke ganî hemverê hêrişê Mexmûrî de şarê Kurdî bibo yew û vat: "Ganî hêrişê hemverê Rojawan û Mexmûrî de peynî bibê. Wa  cenazeyan teslîmê keyeyê ke Sêmalka de vindertê, bikerê. Wa ambargoyê serê Mexmûrî bêrê wedaritiş. Seba caardişê nê çîyan zî mîyanê kurdan de yewbîyayîşêk bibo."

 

‘Wa paştdayîş nêdo neyaranê ma'

 

Dayika Aştiyê Taybet Tatli zî bale ant serê hewldayîşê Mesût Barzanî û vat: "Wa Barzanî kurdan nêroşo. Seba ke o bi xo zî kurd o. Wa paştdayîşê dişminî nêkero. Seba ke ma kurdî yew ê. Ma vanê wayê û biratî, ê vanê neyartî. Wa nê neyartî bi ma nêkerê. Ma kurdî yew ê. Kezeba dayikan veşena. Wa Barzanî na gonî nêrijno. Wa fek  şerê biratî ra vera bido. Wa paştdayîş nêdo neyaranê ma. Seba ke ma kurdî pêro yew ê. Nameyê kurdabîyayîşî serê Barzanî de esto. Ma xeylêk şerm kenê ke Barzanî kurd o. Peşmergeyî zî kurd ê. Êdî bes o. Heta key do Barzanî nê şerî dewam bikero. Heta key gonîya kurdan birijêno. Gonîya kurdan ra nêbî mird." 

 

‘Ma seba Mexmûrî têkoşîn bikerê'

 

Taybete, dîyar kerd ke wayîrvejîyayîşê Mexmûrî girîng o û vat: "Çar parçeyê Kurdistanî şarê Kurdî hemverê zilmî rawuşto serê lingan. La Barzanî û PDK hemverê nê vejênê. Ma veng danê PDK ke wa hêzê xo peyser bianco. Wa hêrişê serê Mexmûrî bido vindarnayîş. Ma wayîrê Mexmûrî vejîyê. Ma do heta peynî pey şarê xo yê Mexmûrî de bê û ma tu wext fek tutanê xo ra vera nêdanê. Ma do seba Mexmûrî têkoşîn bikerê. Ez veng dana her kesî ke seba Mexmûrî vejîyê meydanan."