Derya Ren

 

AMED - Wendekarê Fakulteya Tipî yê Unîversîteya Firatî yê sinife diyîn Enes Kara întîxar kerdibi. Wendekarê Unîversîteya Dîcleyî derheqê babete eşkerayî dayî û vatî: “Întîxar çareserî nîyo, yewin çareserî rêxistinbîyayîş o. Ma do pîya nê prosesî rêxistin bikerê.”

 

Tirkîya û herême de bi polîtîkayê ke serê ciwanan de yenê kerdiş, pabebîyayîşê ameyoxê ciwanan, hedefê înan yenê çinkerdiş. Astengîyê tewr pîl vernîya ciwanan de, tarîkat û cemaet ê. Rojê vîyarte de Wendekarê Fakulteya Tipî yê Unîversîteya Firatî yê sinife diyîn, Enes Kara seba tedayê keyeyê  cemaetî de mendêne, întîxar kerd. Dimayê ke Enesî dinyaya xo bedilna, tarîkat û cemaetî reyna ameyî rojeve.

 

Wendekaranê Unîversîteya Dîcleyî derheqê sebebê ke ciwanan ver bi întîxarî beno de, ercnayîş kerdî.

 

‘Wendekarî endîşeyê ameyoxî ciwîyenê'

 

Esra Perçîn a wendekara sinifa 6ine ya Fakulteya Tipî, dîyar kerd ke yewin sebebê ke Enesî întîxar kerdo yurdê tarîkatî bîyo û vat: "Endîşeyê dimayê ke mezun bibo û do biciwîyo, zî yew sebebê întîxarê Enesî yo. Bi sîstemê ke dewlete awan kerdo, beşê bînî zî wendekarî hetê ameyoxî de kewenê endîşe. La çi heyf demê peyîn de mezunê tipî zî nê endîşeyan ciwîyenê. La rewşa Enesî cîya ya. Seba ke hetê ameyoxî de endîşeyê ci estbî. Hem zî yurdê tarîkatî de mendêne."

 

‘Sebeb krîzê siyasî yo’

 

Wendekara sinifa yewine yê Beşê Matematîkî ya Fakulteya Fenî, Arîn Tan zî wina vat: “Yew ciwano ke bi endîşeyê ameyoxî întîxar kerdo Enes Kara yo. Bi hezaran embazê ma yê ke seba problemê ekonomî yurdê cemaetî de manenê estê. Bêguman dewlete verê ciwanan dna ê  yurdan. Bêguman no kaos tena girêdayê krîzê ekonomî nîyo. Yew sebebê tewr pîl yê nê kaosî awan kneo, krîzê sîyasî yo."

 

‘Bêrê ma pîya xo rêxistin bikerê’

 

Arîne tewr peyîn wina vat: “Wa keyeyî tutê xo yurdan de bi ca nêkerê. Xora ma wendegeh de caardişê sîstemî dir yenê rî bi rî. Ez nika yurdê cemaetî de nêmanena. La eke ez bimendêne, mi zanayîne do psîkolojîyê mi senîn bîne. Ez veng dana tutan. Wa xo tena hîs nêkerê. Bêrê ma pîya xo rêxistin bikerê. Ma tena nîyê. Întîxar çareserî nîyo. Yewin çareserî rêxistinbîyayîş o."