Oznûr Deger

 

KONYA - Yewin roniştişê dewaya hêrişê nîjadperestî yê hemverê keyeyê Kurdî yê Dedeogullarî de, polîsan xeylêk kesî derb kerdî û destbend kerdî. Kesê ke ameyî destbendkerdişî Harûn Rifatogulû wina vat: "Wesayît de yew polîsî ra ke ma derb kerd, wina vat, 'ma do nê Kurdan dir mijûl bibê'. Yewêna zî vat 'ma ulkucîyê ma bişima hemine eşkenê."

 

Qezaya Meramê Konyayî de 30ê Temûze ya 2021î de keyeyêke Kurdan bi peynameyê Dedeogullarî ameyî qetilkerdiş. Roniştişê dewaya qirkerdişî, 14ê Çileyî de 8in Mehkemeya Cezaya Girane ya Konyayî de ameye vînayîş. Roniştişî de vergumanan îfadeyê nakokî dayî û merdimanê keyeyê Dedeogullarî zî reaksîyon dayî. Serê nê ra polîsan hêrişê keyeyî kerd û xeylêk endamê keyeyî derb kerdî. Hêrişê polîsan de Harûn, Omer(16) û Oner Rifatoglû ameyî destbendkerdiş.

 

Hulya Kaplan ke ameye derbkerdiş, Omer û Harûn Rifatoglû ke ameyî destbendkerdiş behsê şîdetê polîsan kerd.

 

'Ma derb kerdî û destbendkerdî'

 

Birazayê Yaşar û Îpek Dedeogullarî yê ke ameyê qetilkerdiş, Omer Rifatoglû vat verê xeyrêqanûnî ya nêheqîya pîlî de bi tîşortê 'Ma edalet wazenê' tewrê roniştişî bîyî û wina behsê hêrişê polîsan kerd: "Roniştiş de xeberê zûrî û şaşî kerdî. Ma reaksîyon da, la polîsan hêrişê ma kerd. Polîsêko sivîl, video antêne. Ma nêzanayne o polîs o. Babê mi zî telefonê ey girewt. Dima ra babê mi telefon da ey. Înan qirrikey ma girewt û da ma ro. Ma salone ra vetî. Dima ra edlîye de dayî ma ro. Telefonê mi şikitî. Ma derb kerdî û destbend kerdî."

 

'Ma do gere bikerê'

 

Omerî eşkera  kerd ke, ê bi pirodayîş kewtê wesayît û wesayît de nengê cinsî ameyê çînayîş û wina vat: "Derbe da sereyê mi ro. Polîsan vat 'na saete ra pey ma do Kurdan dir mijûl bibê'. Ez berda cayê tutan. Ma do derheqê polîsan de gere bikerê."

 

Polîs: Ma ulkucîyê

 

Waya Îpek Dedeogullarî, Hulya Kaplan zî yew kesêka roniştişî de amîbî derbkerdiş. Hulya vat, seba şideto ci rê ameyo  kerdiş vengê aye kewto û vat: "Polîsan tehdîd û nengî çînayî. Verê çimanê mi de birazayê mi derb kerd. Seba ê yewî  birazayê mi xo eşt serê înan. Serê nê ra înan şîdet mi rê zî kerd. Ez milê xo ra birîndar bîya. Vengê mi kewt. Mi eşt, da dêsî ro."

 

'Seba ke ma Kurd bî ma derb kerdî'

 

Hulya venga yewîyîye kerd û vat ganî Kurdî duştê hêrişan de bibê yew û vat keyeyê Keleşî tehdîdo ke 'şima Kurdê ma do şima tîya ra wedarê' keyeyê Dedeogullarî rê kerdê û nê çîyî ardî ziwan: "Keyeyê waya mi qedênayî. Tenî Çetînê ma mend. Înan ra vatêne 'Şima Kurdê, ma PKKyîjan tîya de nêwazenê'. Semedo ke ma Kurd ê, ma rastê hêrişan yenê. Semedo ma Kurdî bî, polîsan ma derb kerd. Ma edalet wazenê. Eke lazim bikero ez do bi tîşorto  'EDALET' bigêrî."

 

'Kurdbîyayîş sûc o gelo?

 

Harûn Rifatoglû zî  ke amebî derbkerdiş û destbendkerdiş vat bi tîşortê 'nê welatî de Kurdbîyayîş sûc o' tewrê roniştişî  bîyo vat: "Polîsan dekewtiş de mudaxaleyê tîşortî kerd. Keyeyê ma ame qirkerdiş. Seba nê mi no tîşort da xo ra.  Ez venga rayaumûmî kena. Gelo 'nê welatî de Kurdbîyayîş sûc o?'  Ma sey temaşekerdoxan  tewrê roniştişî bî. Vergumanan îfadeyê nakokî dayî. Keyeyê mi zî reaksîyon da. Ma seba keyeyê xo bidê vindarnayîş, şî verê înan. La polîsan ma derb kerdî. Ma vat vinderê înan şîdet zêde kerd. Nengê cinsperestî çînayî. Teverê edlîye de zî dewam kerdî. Di polîsî  teber de zî hêrişê ma kerdî. Her kesî seyr kerd û polîsan zî ma derb kerd. Dima ra ez, datîza û datê mi tepiştî.  Kam ameyêne ma derb kerdêne. Polîsêke vat 'ma do Kurdan dir mijûl bibê'  yewêna zî vat 'ma ulkucîyê ma do zorê şima berê'. "

 

Harûnî reaksîyon da bêcezadayîşî û wina qiseykerdişê xo qedêna: "Wa vîr ra nêkerê, ma do hesabê nê bipersê!  Her ke ma vat ma 'yewiyîye wazenê' înan ma qetil kerd! Ma vat 'edalet'  înan hêriş kerd! Ez persêr û hakim bîyêne, mi do 7 kesê ke ameyê qetilkerdişî ra efûyê xo biwaştê û îstîfa bikerdê. Nê hema çiqas delîlanê somut wazenê? Çirê hema vergumanî nînê tepiştiş? Gelo seba ke ma Kurd ê,  coka nê wina kenê? Ma do derheqê polîsê ke ma derb kerdê de zî  muracaatê sûcî bikerê."