Rabîa Onver

 

WAN - Cinîyan dîyar kerdî ke şexsê Aysel Tugluk de hemverê heme tepişteyê nêweşan de caardişê bêhuqûqî estê û ganî peynîya nê caardişan bêro, tepişteyê nêweşî bêrê veradayîş.

 

Zîndanê Tirkîya û herême de rewşa tepişteyê nêweşî roj bi roje giran beno û goreyê dayeyê ÎHDyî 604 ci ra giran bi pêroyî hezar û 605 tepişteyê nêweşî estê. Serra peyîn de 64 tepişteyî zîndanan de dinyaya xo bedilnayî û tepişteyê ke rewşa înan giran bena, nînê dermankerdiş û terkê mergî yenê kerdiş. Keyeyê tepişteyan bi amancê bale biancê serê rewşa tepişteyê nêweşan Amed û Wan de baroyan de çalakîya ‘nobeta edeletî’ dayî destpêkerdiş û çalakîya înan dewam kena.

 

Yew ci ra tepişteya nêweşe ke rewşa ci giran a zî sîyasetmedara Kurd Aysel Tugluk ke serra 2016in de zîndanê Tîpê Fyê Hûmara Yewin ê Kandirayî de tepişte ya. Aysele problemê giran yê weşîye ciwîyena û nêeşkena bi tena sereyê xo cuya xo dewam bikera. Nêweşxaneyê îstîmlakî derheqê rewşa Aysele de raporê ‘ nêeşkena zîndan de bimano' da la sazgehê Tipê Edlî (ATK) eksê nê rapor da.

 

Hewteyê vîyarte de kampanyaya ‘Seba Aysel Tugluk 1000 cinî’ serê înternetî de ame destpêkerdiş û pêwa Tirkîya, Amerîka, Almanya, Avustralya, Hollanda, Fransa, Swêd, Ingîlistan, Kuba, Îtalya de zî cinî tewrê kampanyaya bî. Kampanya bi 8 ziwanî ame weşanayîş û heta nika 6 hezar kesî îmza eşt kampanya.

 

Cinîyê ke îmza eştî  kampanya derheqê rewşa tepişteyê nêweşan de qisey kerd.

 

‘Ganî Aysel Tugluk bêro veradayene'

 

Hemşaredara Ebexî Leyla Atsak ke qeyûm tayînê vera ci bi wina vat: “Aysele vera ke bêro tepiştiş, cuya xo da serê xoverdayîş û têkoşînê cinî. Aysele 5 serrî yo tepişte ya û nêweş a. Raporê ‘nêeşkena zîndan de bimano' dayî. Ganî Aysele bêro veradayîş û bi hawayêke rêk û pêk dermankerdişê ci bêro kerdiş. Ma cinîyê ke ware de têkoşîn kenê, wazenê lezkî Aysele bêro veradayîş. Seba bêhuqûqîyê zîndanan rewşa tepişteyê nêweşan giran bena. Ganî seba dermankerdişê tepişteyê nêweşî bêrê veradayîş."

 

‘Seba tepişteyê nêweşan azadî’

 

Hemsereka Komeleya Hetkarîya bi Keyeyê Tepişteyan dir (TUHAY-DER) Edîbe Babur zî wina vat: “Yew tepişteya nêweşe zî Aysel a. Seba Aysele rê edalet bi ca bêro, bi hezaran cinî bîyê yew. Ma hem seba Aysele hem zî seba tepişteyê bînan azadî wazenê. Cayê tepişteyê nêweşan zîndan nîyo, keyeyê înan o. Ganî bi hawayêke baş bêrê dermankerdiş. Sere de Aysel û heme tepişteyê bîn yê nêweşî ganî bêrê veradayîş."

 

Seba wezaretê dade vengdayîş

 

Hemsereka DBPyî qezaya Ebaxî Nuran Bagdur zî wina vat: “Aysel bi serran o tepişte ya û nêweş a. Rewşa aye her ke şina giran bena. Şexsê Aysel Tugluk de ganî heme tepişteyê nêweşî serbest bêrê veradayîş û dermankerdiş. Ma veng danê wezaretê dade. Wa zîndanan ra cenazeyî nêvejîyê. Ganî tepişteyê nêweşî bêrê veradayîş."