RIHA - 311 rojî yo çalakîya 'Nobeta Edaletî' ya keyeyê Şenyaşarî domnena,  Emîne Şenyaşar vera ke nêweş a zî têkoşînê xo yê edaletî dewam kena, waştişê veradayîşê Fadil Şenyaşarî kerd.

 

Nobeta Edaletî ya Keyeyê Şenyaşarî  roja 311ine de  verê Edlîyeyê Rihayî de dewam kena. Emîne Şenyaşar û lajê xo Ferît Şenyaşarî nê serê sibayî de zî  qezaya Pirsûsî ra ameyî verê edlîye û dest bi nobete kerd.

 

Emîne Şenyaşar ke nêweşîya xo ver ra di rojî nêameya çalakîye, ewro amî û eşkera kerd ke nobeta înan binê zilmî de dewam kena. Emîne Şenyaşar waşt ke lajê aye Fadil 3 serrî û 7 mengî yo Xarpêt de tepişte yo wa bêro veradayîş û  heta o nêro veradayîşî do nobeta înan dewam bikero.

 

Emîne da zanayene ke, ê hîrê mewsîmî dimayê xo de verdayê û heta nika seba waştişanê înan  gamêke nêameya eştiş û a nêweş a zî la reyna seba edaletî têkoşîn kena û vernîyê ke a bimiro wazena lajê aye bêro veradayîş. Emîne Şenyaşar vat ke edalet nêmendo û venga persêr û hakiman kerd ke wa taqîbkerdox nêmanê.

 

Emîne ard ziwan ke rojê ke a nêweşîya xo ver ra nêeşkena bêro nobete zî  her tim lajê ci Ferît ke nobete gêno endişe kena û her tim hişê aye serê nobete de yo û ewro zî a nêweşe  bîya la reyna zî ameya nobete.

 

Keyeyî serê hesabê xo yê Medyaya Dîjîtale de zî nê mesajî vila kerd: "Wexto Meclîs de behsê têkoşînê ma yê edaletî yeno kerdiş,  parlementerê AKPyî  Meclîs de xo kenê sey merdeyan. Çirê AKP ra parlementerêke nêwirzeno we û îtîrazê nê  çîyî nêkeno?"