Rojda Aydin

 

ŞIRNEX - Dayîkê tepişteyan bale antî serê rewşa tepişteyanê nêweşan û vatî: "Bêvengî yena mehnayê mergî." Dadîya Naîfî  Nebahat Îşçî, da zanayene ke verpersîyarê merdeyanê zîndanan hukmat bi xo yo. Dadîya Celalî Bedrîye Înedî zî eşkera kerd ke,  wezîfewo tewr muhîm keweno serê kiftanê dadîyan û ganî dadî bêveng nêmanê.

 

Binpaykerdişê heqê tepişteyan dewam keno. Keyeyê tepişteyan sazî û dezgeyê sivîlî û ê huqûqî seba diqet biancê serê rewşa tepişteyan û xusûsî zî seba tepişteyanê nêweşan vengdayîş kenê. Dimayê ke zîndanan de melûmatê merdişê bişikî ameyî, keyeyî zafêr kewtê mîyanê tersî û endîşeyan. Keyeyî ke wazenê dîqet biancê serê rewşa tepişteyan ê Amed û Wanî dest bi çalakîya 'Nobeta Edaletî' kerd.

 

Tepişteyê nêweşan ra yew zî Celal Înedî yo. Celalî ke gurçika xo ra nêweş o 12 serrî ceza ci rê ameya dayîş û 3 serrî yo zî tepişte yo. Celal ke Zîndanê Şirnexî de mendêne sirgûnê Zîndanê Afyonî ameyo kerdiş.

 

Sewbîna seba Naîf Îşçî zî 24 serrî ceza ameya birnayîş û 14 serrî yê xo de ameyo tepiştiş. Naîf Zîndanê Xelatî yê Tîpê Tyî yê Bedlîsî de yeno tepiştiş. Naîf verê ke bêro tepiştiş, qezayê trafîkî derbas kerd o û  lingê ey yê çepî de platîn esto. Seba ke heta nika kontrolê ey nêameyo kerdiş problemanê nêweşî ciwîyeno.

 

Dadîya Naîfî Nebahat Îşçî û dadîya Celalî Bedrîye Înedî rewşa tutanê xo yê tepişteyan rê bi endîşeyîn ê û derheqê rewşa  zîndanan de ajansê ma rê qisey kerdî.

 

'Tedawîyê tepişteyan nînê kerdiş'

 

Nebahat Îşçî ajansê ma rê behsê rewşa lajê xo kerd û vat: "Xêcê platînê nigê ey nêweşîyê bîn,  ê sey made zî ci de peyda bî. 4 mengî verî cû sirgûnê Zîndanê Xelatî ame kerdiş û hucreyo yew kesî de yeno tepiştiş. Didanê ey dejeno la nêbenê nêweşxaneyî û nîno tedawîkerdiş. Goreyê hayîdarîya  hekîman madeyê ey de di-hîrê birînî estê. Tedawîya ey û sewbîna ê tepişteyê bînan nîno kerdiş. Wextê peyîn de 5 cenazeyî zîndanan ra vejîyayî. No çîyê ko rêze ra nîyo. Merdim nêzano çi bi înan kenê. Lajê mi zî Zîndan de yo û nêweş o. Seba ke ekonomîya mi weş nîya nêeşkena şêrî vînayîşê ey. Wexto lajê mi telefon keno behsê nêrehetîya xo keno. Rewşa înan weş nîya. Ma mîyanê endîşeyan de yê."

 

'Bêvengî merdiş a'

 

Nebahate wina dewam kerd: " Ê tepişteyê ke  dinyaya xo bedilnayî, serebûtêk rêze ra nêbî. Ê nê çîyan anê serê tepişteyan. Tepişteyo ke 20 serrî yo zîndanan de yo, çirê reyêk de xo bikişo? Ma nê çî ra bawer nêkenê. Çîyê ke yenê ciwîyayîş qetlîam o. Verpersîyarê nê merdeyan hukmat bi xo yo. Ganî êdî ma bêveng nêbê. Bêvengî Merdiş o."

 

'Bi sirgûnî zulm bi ma û tepişteyan kenê'

 

Lajê Bedriye Înedî Celal Înedî Zîndanê Şirnexî ra sirgunê Zîndanê Afyonî ameyo kerdiş û wina qalê ci kerd: “Dimayê ke lajê mi ame sirgunkerdiş, mi nêeşka şêrî pêvînayîş. Semedo ke xeylêk dûrê ma yo. Çira sirgûn kerdî, semedo ke zulm bi ma û tepişteyan bikerê yenê surgunkerdiş. Ganî no zulmê zîndanan peynî bibo. Lajê mi Celal dimayê ke kewt zîndan nêweşîya gurcikan bi ci peyda bî. Di hîrê rey şi nêweşxane û doktoran vat, ganî bêro emelîyatkerdiş. La semedo ke ame sirgûnkerdiş, emelîyat zî nêbi. Nika didanê ey dejenê."

 

'Wezîfeyo tewr girîng serê milê dakîyan de yo' 

 

Bedrîye tewr peyîn wina vat: "Ma dayîkê tepişteyan wurzê serê lingan û verê berê zîndanan de kom bibê. Wa hukmat wezîfeyê xo bi ca bîyaro. Xora tutê ma tepişte yê, çi înan ra wazenê.  Tu tepişteyêk nêeşkeno peynîya cuya xo bîyaro. Zulm bi înan kenê û dima ra vanê xo kişto. Tu tepişteyêk xo nêkişeno. Ê tepişteyan kişenê. Ganî hukmat peynîya nê zulmî bîyaro. Tîya de wezîfeyo tewr girîng keweno serê kiftê dayîkan. Ganî ma bêveng nêmanê."