ANQARA - Dayikê Aştîye seba tepişteyê nêweşî bêrê veradayîş û hemverê tecrîd, binpaykerdişê heqan ê zîndanan bêrê peynîkerdiş, herême ra seba pêvînayîşê tewir bi tewir bikerê şî Anqara. Dayîkan vat, "Wa heme  dayîkê Tirkîya waştişê dayikê kurdan bieşnawê û bibê vengê ma.”

 

Dayikê Aştîye û merdimê tepişteyan ê Amed, Wan, Çukurova, Mêrdîn, Sêrt, Êlih û Şirnexî seba dîqet biancê serê rewşa tepişteyê nêweşan şî Anqara. Dayîkê ke do beşdarî Meclîsê Koma Partîya Demokratîke ya Şaran (HDP) bibê, seba waştişê xo yê serê binpaykerdişê heqan ê zîndanan û tepişteyê nêweşan bîyarê ziwan do serdayîşê tewir bi tewir zî bikerê.

 

Dayîkê Aştîye û merdimê tepişteyan ê Wan û Colemêrg ra ameyî anqara qalê amancê xo yê ameyîşê Anqara kerdî.

 

‘Ma seba caardişê edaletî ameyî’ 

 

Dayîkê aştîye yê Geverî ra Fazîlet Polat wina vat: “Nê kesê bêguna zîndan de yê. Tepişteyê nêweşî nînê  dermankerdiş, zere de bi hezaran kesî estê ke nêeşkenê xo bipawê. Bi serran o ma verê morgan de dore de yê. Ma semedo ke peynîye nê bîyarê ameyî tîya. Ma êdî tehemûl nêkenê ke cenazeyêk zî zîndan ra vejîyo. Ma êdî nêwazenê esteyê tutanê xo bigeyrê, nêwazenê verê morgan de vinderê. Ma zî hemwelatîyê nê welatî yê û ma wazenê goreyê nê vajê. Ma her cayî ra ameyî ke edalet bi ca bîyarê. Ganî heme dayikê Tirkîya goş bidê waştişê dayîkanê Kurdan. Bibê vengê ma.”

 

‘Tepişteyê nêweşî nînê dermankerdiş’

 

Waya Devîş Aşkan ke 8 serrî yo zîndanê Panosî de ya Makbule Aşkan zî vat, zîndanan de bi hezaran tepişteyê nêweşî estê û tepişteyî tu heqê xo ra feyde nêgînê û wina vat: “Tu tepişteyê nêweşî zîndan de nînê dermankerdiş, heme yew bi yew zîndan de mirenê. Ma wazenê ke nêweşî ganî serbest bêrê veradayîş. Ma waştiş kenê ke tut û wayê û birayê ma yê bêguna bêrê veradayîş.”

 

Vengdayîşê dayîkan: Vengê ma bieşnawê 

 

Dayikê Aştîye yê Geverî Gulçîn Karabûk destpêkê qiseykerdişê xo de vat: “Ma êdî nêwazenê zerrîya dayîkan biveşo. Verî her çî, tecrîdê Îmraliyî û temamê zîndanan bêro wedaritiş. Pêwa her çî zî ma vanê aştî. Merdimê zîndanan çi kerdê? Tena seba nasname û heqê xo têkoşîn kenê. Sebebê ke hende cenaze zîndanan yenê vetiş oyo ke bi şarê Kurdî dej bidê antiş.”

 

Tewr peyîn Gulçîne wina vat, "Vengdayîşê ma seba heme dayikan o, wa vengê ma bieşnawê, seba cenaze zîndanan ra nêrê vetiş, wa edalet bi ca bêro.