STENBOL- Sîyasetmedara Kurde Aysel Tugluk ke nêweşa û nîna veradayîş, terkê mergî yena kerdiş. Cinîyan reaksîyon mojna ra û vat: "Aysele yew sembolê têkoşînê azadîya Kurdan a û têkoşînê azadîya cinîyan a. Çiyê ke Aysele rê yenê kerdiş heyf girewtiş o. Ganî duştê zindanan de binpaykerdişê ke yenê kerdiş vengêko berz bêro vetiş." 

 

Îqtîdar ke zîndanan de konseptêke newe keno, tepişteyan bi zanayene ver bi mergî beno. Seba binpaykerdişê heqê tepişteyan rojanê vîyarteyî de 7 tepişteyan dinyaya xo bedilnayî û xusûsî zî tepişteyê nêweşî. Nê tepişteyan ra nêweşa ke rewşa aye zaf giran a, sîyasetmedara Kurdan Aysel Tugluka ke serra 2016î de Zîndanê Tîpê Fyî ya Humara 1ine ya Kandirayî de tepişteya ya. Aysele ke nêweşa giran a, pêwa  problemê giranan cuwîyena, înfazê aye nîno taloqeştişî. No zî beno sebebê giranbîyayîşê rewşa aye. 

 

Sere ra rêxistinê cinîyan û heme hetî seba Aysele kampanya û çalakîyan caanê. Na çarçewa de Yewîyîya Seba Demokrasîyê Stenbolî de rojanê vîyarteyî de faks Wezaretê Edaletî rê şawit û diqet ant serê rewşa Aysel e. 

 

‘Sebeb îqtîdar o zilimkar o’

 

Endama Yewîyîya Seba Demokrasîyî Nesteren Davutgolu eşkera kerd ke welatêke ci de edalet çinî bo heme qaîdeyî yenê lerzinayîş û wina vat: "Aysele bi serran a seba demokrasî têkoşîn dana. Tever de dermankerdişê Aysele heqê aye yo demokratîk o. Xeylêk embazê nêweşî bi rike nînê veradayîş. Rewşa Aysele her şina giran bena û no tesîr serê ma de zî keno. Ma wazenê Wezaretê Edaletî vengê ma bişinawo. Sebebê nêtehlîyekerdişî îqtîdar o zilimkar o. Seba tersenê, hewl danê têkoşîna edaletî û demokrasî bêro xetemnayîş." 

 

‘Duştê huqûqî de hereket kenê’

 

Nesterene, da zanayene ke cayo ke edalet çinî bo, aştî zî çinî ya û aye ard ziwan: "Heme problemî yewperestî ra yenê ca. Nizdîbîyayîşê ke faşîzanî merdiman cîya vîneno, welat yewbînî ra perçe kenê, hemverê huqûqî de hereket kenê. No duştê heqê merdiman o. Cinî ayabîyayîşî de yê û seba têkoşîne yenê têhet. Seba Aysele cinî yenê têhet. Seba tepişteyan ganî hukmêko bêhet bibo." 

 

‘Wazenê komele hêsîr bigîrê’

 

Vervatoxa platformê Paştdayîşê Sosyalîstî( SODAP) Sevtap Akdag ard ziwan ke dewlete serê tepişteyanê sîyasî de polîtîkayê hêsîrgirewtişî û heyfgirewtişî ana ca û wextêke derg netîceyê polîtîkayan de na rewşe vejîyaya meydan û wina vat: "Zaf zelal aseno tepişteyê nêweşî nêşenê uca de bimanê, rawşa înan nêweş a. La seba tehlîye nêkerê  bahanan vejenê meydan û terkê mergî kenê. Seba nê wextê dimayîn de xeylêk tepişteyan dinyaya xo bedilnayî. No wextêk derg o zîndanan de pinpaykerdeşê heqan yenê ciwîyayîş. Her waştişê tepişteyan agêrena cazaya hucreyî. Dewlete bi nê polîtîkayan hewl dana komele hêsîr bigîro." 

 

‘Lazimî bi vengêko berz esto’

 

Sevtape peynîya qiseykerdişê xo de wina vat: "Îqtîdar wazeno komelêke bêveng bivirazo. Seba nê zî hewl dano komele bitersino. Rewşa tepişteyan weş nîya. Yew kesêk tepişteyan ra  rewşa aye girana, Aysel Tugluk a. Pêwa ke bi desan reyî raporî nêşena zîndan de bimano ameyo dayîş zî, vernîyê tehlîyeyê aye yeno girewtiş. Ganî ma reyna rewşe tehqîqat bikerê. Çîyê yenê kerdiş ganî çerçewaya heyfgirewtişî de bêro famkerdiş. Aysel Tugluk yew sembolê têkoşînê azadîya Kurdan a û têkoşînê azadîya cinîyan a. Çîyê ke Aysele rê yenê kerdiş heyfgirewtiş o. Ganî duştê zîndanan, binpaykerdişê yenê cuwîyayîş vengêke berz bêro vejinayîş."