ANQARA - Welatîyan dîyar kerd ke, ê wazenê welatêko azad û adil de biciwîyê û sewbîna waştî ekonomî baş bibo. 

 

Ma serrê ke bi şer, feqîrî û pandemîyî derbas bîyî dimayê xo verda. Seranserê serre serebûtê ke welat de ameyî ciwîyayîş tesîrêk pil welatîyan ser o kerd û fersendê ke welatîyan waşt îqtîdar lezkî bibedilîyo. Ma kewtî serra 2022yî û Anqara de welatîyan derheqê serra 2021î de senîn kerdo û waştişê serra 2022yî vatî. 

 

Welatîyê ke mîkrofonê ma rê qisey kerdî diyar kerdî ke serra 2021 serrêke nîna waştiş ke bêra vîrardiş û vatî, ê serra neweyî ra edalet û têduştî wazenê.

 

‘Seba dinya serrêka baş nêbî’

 

Mamosteya Perwerdeyê Bedenî Meltem Yalçinkaya: Serra 2021î seba ma heminan baş nêbî. Hetê weşîyîye de hetê ekonomî û manewî ra serrêke baş nê bî. Seba dinya serrêk baş nê bî. Hetê weşîyîye de problemî ameyî ciwîyayîş, kovid kewt her keyî. Wextê peyîn de problemê ekonomîyî  kovîd da vîrkerdiş. Ma her serê sibayî wurzenê we dolar û zerdan ra ewnenê. Ma vanê do ewro se bibo? Ma rayîr de şinê vanê gelo do çîyêk bêro sereyê ma? Mi 2021î de xo bêasayîş hîs kerd. Ma 2022yî de wazenê bi welatê xo bawer bê. Ma serrêka mergê cinîyan çinî umîd kenê. 

 

‘Ez azadîya tepişteyan wazena’

 

Avûkat Ayşegul Çagatay: Xeylê kesî seba heqê demokratîkî seba edaletî têkoşînî dayî, ameyî destbendkerdiş, dinyaya xo bedilnayî. Ez serra newî de azadî wazena. Wa na serre bibo serrêka azade. Ez azadî û seyyewbînîye wazena. Seba tepişteyê nêweşan azadî wazena. Ez wazena, waştişê tepişteyê ke kewtê roceyê mergî bêrê ca. 

 

‘Wa serra newî bibo serra têkoşîn û paştdayîşî’

 

Avûkat Ceren Yilmaz: Serra 2021î bî serra xoverdayîşî. Umîd kena serra 2022yî bibo serra aştî û na serre de têkoşîn û paştdayîşî pîl bibê. 

 

‘Ma keyeyê xo ra nêvejîyayî’

 

Wendekare Berfîn: Ma hetê ekonomî û weşîyîye de serrêk baş pawenê. Serra 2021î zehmet bî. Hetê komele ra ma kewtî keyeyê xo û nêvejîyayî. Wendiş online dewam kerd. Nika zî ma hewl danê musayîşê prosesî bibê. Ma serrêk weş û bi weşîye umîd kenê. 

 

‘Zengînan rê asan o, feqîran rê zehmet o’

 

Gulkiz Tezera 65 serrî: Hayîya mi serra vîyarte ra çinî ya ke serra ameyîn ra bibo. Wa nanê ma bibo, pîzeyê ma mird bibo ma çîyêk nêwazenê. Lajêke mi xebetêno; ma kîra danê, fatûra danê û dermanê mi herênenê. Debare zehmet a. Ciwîyayîş zengînan rê asano, feqîran rê zî zehmet o.

 

‘Ez wazena sey merdiman biciwîyî’

 

Kedkare Tulay Yildiz: Ma serrêke xirab pey xo de verda. Wa cinî êdî nêmirê. Her roje cinîyêke yena qetilkerdiş. Berzbîyayîşê zerd û dolarî xeylêk xirab bi. Ma wazenê na serre hîna weş bo. Wa ciwanî kar bivînê. Wa betal nêmanê. Her çî vay o. Yê nêeşkenê nan berê keyeyê xo estê.

 

‘Ma hewceyê zanayîş û hunerî yê’

 

Wendekare Başak Gulsoy: Serra 2021î xeylêk xirab bî. Problemê ekonomî û virûs bi. Ma virûs xo vîr ra kerd. Seba ekonomî. Rewşa wendekaran nika zaf zehmet a. Ma problemê ekonomî zaf zêde ciwîyenê. Seba nê ma hewceyê bernameyê huner û entelektuel ê. Rewşa Tirkîya baş nîya. Hêvîdar a serra 2022 çîyê baş xo dir bîyaro.

 

‘Welatêk adîlane’

 

Wendekar Kubra Çîloglu: Serra 2021 zî serrê bînan ra cîya nêbî. Ez seba serra neweî weşî, serkewtiş wazena. Ez welatêk adîlane wazena. Wa her kes kêfweş welatê xo de biciwîyo.

 

Wendekare Salîha: Serrêka zehmet bî. Hêvîdar a vîrus 2022 de biqedîyo û qedexeyî wurzê, dolar bikoyê û zem zî bêro wedaritiş.