ŞIRNEX - Dewa Nêrwanî ya qezaya Silopî ya Şirnexî de dima ke ceyran birîya tut Alî zorluyo ke pabesteyê hacetê nefesgirewtişî bi dinyaya xo bedilnaye.

 

Goreyê xebera Ajansê Mezopotmayayî (MA) dewa Nêrwanî ya qezaya Silopî ya Şirnexî de 5ê kanûne de dima ke ceyran birîya tut Alî zorluyo ke pabesteyê hacetê nefesgirewtişî bi dinyaya xo bedilnaye. Alî Zorlu (4) de nêweşîya cigêrî û tengîya nefesî estbîyî.

 

'Her şan de ma mêrdeyê mi dir nobete girewtêne'

 

Dadîya Alîyî Kubare Zorlu ard ziwan ke seba ke ceyran birîya tutê ci dinyaya xo bedilnaye û vat: ''Lajê mi nêweşo kronîk bi. 3 serrî û 3 mengî yo o pabesteyê hacetê nefesgirewtişî bi. Dewa ma de tim ceyran birîyayêne. Her şewe ez û mêrdeyê mi ma nobete de bîyî. Key ceyran birîyayêne ma jenarotorê ceyranî akerdêne. 5ê kanûne de ceyran birîya, jenerator de zî benzîn çinbi. Lajê mi o çax bi mor. Eke ceyran nêşîyêne lajê mi nika ciwîyayêne.''

 

'Wa tutê bînî nêmirê'

 

Dadîye Kubare da zanayene ke dewe de tutê sey Alîyî zaf estê û vat: ''20 rojî serê mergê lajê mi ra derbaz bîyî. La hema zî key ceyran şoro ez tersena. Lajê mi rîyê birîyayîşê ceyranî ra merdo la tutê bînî wa wina memirê. ''

 

Cîrana Kubare Leyla Saruhan îfade kerd ke Alîyî rîyê birîyayîşê ceyranî ra dinyaya xo bedilnaya û vat: ''Dewa ma de nêweş û astengdarî zaf ê. Seba ke ceyran tim birîyeno ma zaf zehmetîye ancenê.''

 

21ê kanûne de zî qezaya Farqînî ya Amedî de tuto di serre Yunus Emre seba ke DEDAÎŞî ceyranê înan birnabi dinyaya xo bedilnabî.