Dîlan Babat

 

ANQARA - Zîndanê Sîncanî de tepişteya bi nameyê Sîbel Balaç bi amancê tepişteyê nêweşî bêrê veradayîş, muhakemeyêk adîlane bêro kerdiş û binpaykerdişê heqan peynî bibê, dest bi rojeyê mergî kerd. Avûkate Sîbele, Ceren Yilmaz vat, dosyaya ke Sîbel ci ra tepişteya delîlê ci werte de çin ê û veng da ganî vengê muwekila aye bêro eşnawitiş.

 

Sîbel Balaç 9ê Teşrîna Peyêne 2016 de bi amancê paştdayîş bido  çalakîya ‘ma karê xo wazenê' ê karkerê KHKyî ke kar ra amebî eştiş, Kuçeyê Yukselî yê Anqara de bî, bi 20 kesî dir amebî destbendkerdiş û 18ê Kanûna 2018 de ameye tepiştiş. Dewaya Sîbele ke ameyîne muhakemekerdiş 8 serrî  û mengêke û 15 rojî ceza ci rê ameye dayîş. Hîrê serrî yo zîndanê Sîncanî de yena tepiştiş. Sîbele bi hemkarîya keye û avûkatanê xo dîyar kerd ke 19ê Kanûne de dest bi rojeyê mergî kerda.

 

Yew avûkata Buroya Huqûqî yê Şar (HHB) Ceren Yilmaz û dayîka Sîbele, Nuray Balaç derheqê rewşa ci de qisey kerd.

 

Cigêrayîşê viran ci rê ferz kerdî 

 

Cerene da zanayîş ke Sîbel mamoste bîya û hemverê mobîngê ke vera mamosteyan fek kar ra vera daya û paştdayîş daya çalakîya çalakgerê Yukselî ya ‘ma karê xo wazenê.' û wina vat: "Demo ke Anqara şina Tekîrdag verê keyeyê xo otogar de pêwa qerarê cigêrayîşî çin o, yena destbendkerdiş û uca de cigêrayîşê viran ci rê yeno ferzkerdiş. Yeno îdiakerdiş ke demê cigêrayîşî de kaxidêk ser de yeno vînayîş. La Sîbele sere de vana qert  tabletê aye de bîyo la zabitnameyî de vanê serê cilê aye de ameyo vînayîş. Ma derheqê cigêrayîşê viranî de muracatê sucî kerd. La semedo ke qeydê kamera çin ê qerarê bêtaqîbkerdişî ame dayîş. Ma muracatê DDB kerd. Dimayê nê destbendkerdişî Sîbele bi şertê kontrolê edlî ameye veradayîş.”

 

'Delîlî werte de çin ê'

 

Cerene dewam de wina vat: “Dosya bi mehnaya tewrê çalakîya Yukselî bîya hetê 28in Dadgeha Cezaya Giran yewbînan ra ame visnayîş. Dimayê ke dosya ameye visnayîş, Sîbele otogarê Anqarî de ameye destbendkerdiş. Qerto ke yeno îdiakerdiş serê Sîbele de ameyo vînayîş, sey delîlê esas ê na dosya ame mojnayîş. Ma her rey vat, wa qertê bîyarê. La emniyetî nuşte şawit û qert verê înan de yo. 8 serrî û mengêke û 15 rojî ceza ci rê ameye dayîş. Dadgeha istînafî zî ceza leze tesdîq kerd û nika dadgerî de ya."

 

Cezaya hucre û dîsîplînî 

 

Cerene wina vat: “Zîndanê Sîncanî de ferzkerdişê rêça engiştan esto û semedo ke Sîbele nê qebul nêkerdo, reaksîyon vera binpaykerdişê heqan daya xeylêk cezayê dîsîplînî û hucre ci rê ameyê birnayîş. Sîbele roja ke ameya tepiştiş cezaya hucreyî ancena. Heto bîn ra zî hema dayîşê cezayê hucre dewam kenê."

 

'Mektube nêame şawitene' 

 

Cerene wina qal kerd: “Sîbele mektubêke nusena û îdare vano, ‘Ma mektubê to şawenê.' Qerarê qedexeyî çira nêameyo teblîgkerdiş.  Sîbele 19ê Kanûne de dest bi roeyê mergî kerda. Yew waştişê aye yê sereyîn veradayîşê tepişteyê nêweşî û muhakemeyêk adîlane yo.”

 

'Wa vengê ma bieşnawê'

 

Dayîka aye Nuray Balaç zî vat, kênaya aye Sîbele semedo ke heqê xo gêraya ameya destbendkerdiş û wina vat: "Kênaya mi semedo ke vengê aye bêro eşnawitiş, kewte rojeyê mergî. Mi kênaya xo bi zehmetî pîl kerd, la înan kênaya mi kerd çi rewşe. Gelo do kes heqê xo nêgêro? Ez nêzana ke kênaya xo senîn xelas bikerî. Dewaya kênaya mi her wext derg kerdî û 8 serrî ceza dayê. Ez nêwazena kênaya xo vînî bikerî. Wa vengê kênaya mi bieşnawê. Rewşa kênaya mi baş nîya. Cezaya hucre dayê. No edaletêk senîn o? Kênaya mi tena heqê xo gêra. Sewbîna tu sucê aye çin o."