BEDLÎS - Tatwan de endamê Meclîsa Dayîkê Aştîye, semedo ke bale bi ancê serê rewşa tepişteyê nêweşna eşkerayî dayî û waştî ke tepişteyî ganî serbest bêrê veradayîş. Sewbîna Dayîkê Aştîye waştî ke tecrîd zî ganî bêro peynîkerdiş.

 

Qezaya Tatwanî ya Bedlîsî de endamê Meclisê Dayîkê Aştîye hemverê binpaykerdişê heqan ê zîndanan û semedo ke bale biancê serê rewşa tepişteyê nêweşna eşkerayî dayî çapemenî. Parlamentera Partîya Demokratîke ya Şaran (HDP) ya Wanê Muazzez Orhan û endamê Meclisê Cinîyan ê  Bedlîsî tewrê eşkerayî bî. Eşkerayîya ke pankartê bi nuşteyê, "Tecrîd sucê merdimayî yo, ma do  tecrîd bişikinê cuya azad awan bikerê" ame akerdiş de dowîzê ke fotografê tepişteyê zîndan de demê peyîn de dinyaya xo bedilnayî ameyî berzkerdiş.

 

'Tecrîd peynî bikerê' 

 

Saadet Çaçan ke serê nameyê Dayîkê Aştîye eşkerayî wend, bale ant serê rewşa tepişteyê nêweş û waşt ke êdî kes zîndanan de dinyaya xo nêbedilno û vat: "Wa tepişteyê ma yê nêweşan zîndan ra vera bidê. Ma êdî nêwazenê tutê ma zîndanan de bimirê. Êdî bes o. Heqê tepişteyan zî esto wa heqê înan bidê înan û tecrîd peynî bikerê. Ma nêwazenê tutê ma dinyaya xo bi bedilnê. Waştişê ma oyo ke tepişteyê nêweşî serbest bêrê veradayîş û tecrîd bêro peynîkerdiş."

 

Eşkerayî bi sloganan peynî bî.