Rojda Aydin - Habîbe Eren 

 

ŞIRNEX - Ayşe Encuya ke qetilkerdişê Roboskî de şeş merdimê xo vinî kerdî wina vana: "Êdî zerrîya ma jan ranêkena. No 10 serrî yo edalet nêameyo ca, merg ma Kurdan rê meşrû vînenê. 

 

Nameyê ci roja sîya, ya ke heme dinya de vila bî Roboskî ya... Netîceyê hêrişê teyareyanê şerî yê Artêşa Tirkî de 34 kesî ameyî qetilkerdiş. Ayşe Encu qetlîamî de lajê xo Savaş (15) û Husnu (27) Encu, torinê xo Erkan û Mahsûn Encu û sewbîna di hebî merdimê xo vinî kerdî. Sewbîna lajê aye Behcet Encu bi nameyo bîn Cûdî Roboskî, di serrî vernîyê nika de Rojava de mîyanê Xoverdayîşî de dinyaya xo bedilna. 

 

Dadî Ayşe Encu ya ke, dadîya 12 tutan a, bi eslê xo dewa Zêvîyana ke girêdayê qezaya Qilebanî ya  Şirnexî ya. Keyeyê aye serrê 90î de neçarîye ra dewa xo tereknawa. Ayşe, wina behsê ê rojan kena: "Wexto ma dewa Zêvîyan de bîy, rewşa ma xeylê halan de weş bî. Xusûsî ma bi pesdewarî û ramitişî debare xo kerdêne. Dimayê ke zilm û zordarîya dewlete dest pêkerd û qorîcîtî ma rê ame ferzkerdiş, ma dewa xo terekna, ma ameyî Roboskî de bi ca bî." 

 

'Babî û kalikê ma zî seba debara keyî şîne sînor' 

 

Hîkayeyê Ayşeye sey bi hezaran cinîyanê Kurdan a û emro qij de, bi zor ameya zewecnayîş heme kar û barê keyî serê kiftanê aye de mendo. Ayşe, 15 serrî verî nika mêrdeyê xo bi netîceyê krîzê zerrî ra vinî kena. Babî û kalikê aye, mêrdeyê aye zî bi serran seba debare şîyêne sînor û Ayşe wina vat: "Mêrdeyê mi zî şîne sînor. La mi nêwaştêne tutê mi zî şêrê. La dimayê wextêk êdî tutê mi zî verê xo da sînor.  La tewr dima zî tutê mi serê sînorî de ameyî qetilkerdiş. Bi teyaranê şerî ameyî qetilkerdiş. Teqnayîşê guleyan ra keyeyê ma lerzîya. Mîyanê hêrişî de tenê 3 kesê ke remayî sax mendî. Hukmatî bi guleyanê xo bedenê tutanê ma û bedenê bergîranê ma perçe perçe kerdbî. Seba mazotî bedenê tutê me veşnabî.  Hukmatî bi zanayene tutê ma qetil kerdî." 

 

‘Destûr nêdayî ambulanse bêro’

 

Ayşe, wina behsê xo yê wexto ke şîya cayê serebûtî kerd: "Şewa ke qetlîam virazîya, ma heta cayê qetlîamî rayîr şî. Wexto ma resayî cayê serebûtî înan vat birîndarî estê û wa ambulanse bêro. La destûr nêda ke ambulanse zî bêro. Ê ke saxîbî zî uca de merdî. Destûr nêdayî ke ez tutanê xo bivînî. Wexto defin kerdî zî nêmojnayî mi. Destûr nêdayî ke tewr peynî ez înan bivînî. Xeyalê tutanê mi bî. Lajê mi Husnu 9 serre bî ke zewejnaye bî qet tutê ey çinê bî. Dimayê ke ame qetilkerdiş, lajêke ey ame dinya û ma nameyê ey Husnu na pa. La ma keye de ci ra vanê Bariş. Wexto ma vanîme 'Husnu' zerrîya ma yena sojinayîş. Lajê mi, lajê xo qet nêvîna. Lajê mi  Savaş şiwane bi. Tim şîyêne verê pesî. Savaş seba mektebê xo pere arê bido şîyêne sînor û o zî uca de ame kiştiş. 2 lajê mi û 2 tornê mi uca de ameyê qetilkerdiş. Savaş 14 serre bî û şîyêne mektebe. Xeynê înan di merdimê mi zî nê qetlîamî de dinyaya xo bedilnayî. 

 

‘Dimayê qetlîamî cuya ma bî cehenem’

 

Ayşe, diyar kerd ke vernîyê qetlîamî ciwîyayîşêke înan bi, la dimayê qetlîamî cuye pêro vurîyaya û wina qisey kerd: "Dimayê qetlîamî cuya ma bî cehenem. Bi zanayîş nê çîyî kerdî. Wa dest bidayêne serê malê înan, la çirê tutê ma qetil kerdî? Dimayê serrêke cayî de çend merdimê  ma reyêk bîn sînor de hetê eskeran ra ameyî qetilkerdiş. Rojê qetlîamî ra heya ewro zerrîya ma her tim xemgîn a. Sewbîna bi serrano veyveyî nêvirazîyenê û kes nêşino dawetan zî. Serê qetlîamî de 10 serrî derbas bîyo û la hema zî edalet bi ca nêameyo. Kesê ke laj û tornê mi qetil kerdî nêameyî cezakerdiş û nêameyî muhakemekerdiş. Qatilî ameyî pawitişî. Janê ma zî, no 10 serrî yo hema dewam keno."

 

Lajêke xo Rojawan de vînî kerd

 

Ayşe, vat ke lajê ci Behçet Encu bi nameyo bîn Cûdî Roboskî, serra 2006 de tewrê refê azadîye bîyo û vat: "Ma kurdî her ca de bi merg dir rî bi rî manenê. Lajê mi Behçet (Cûdî Roboskî) zî serra 2006 de tewrê refên azadîye bî. Di serrî verê Rojawan de şehît kewt. Lajê mi Behçet zî hemverê zilmê dewlete şi tewrê tevgerê azadîye bi. Sewbîna lajê mi hemverê eskerîya dewlete zî bi. Semedê nê zî şi. Dimayê qirkerdişî lajê mi şehît kewt zerrîya mi tewr bidej bî.”

 

‘Êdî humatî ra tu hêvîya ma çin a’

 

Ayşe, tewr peyîn wina vat: "Êdî zerrîya ma zêde nê dejan nêwedarnena. Ez heta nika hîrê rey zerrîya xo amelîyat bîya. Demo ke serrgera înan nêzdî bena dejê dejê zerrîya mi tewr kûr beno. Êdî hukmatî ra tu waştiş û hêvîya ma çin a. Semedo ke bi 10 serrî yo  edalet bi ca nêame. Merg ma kurdan rê meşrû vînenê.”