Sema Çaglak - Derya Ren

 

AMED - Cinîyê ke beşdarê kongreya Meclîsê Ciwanan ê HDPyî bî dîyar kerdî ke êdî dem demê ciwanan o û vatî: "Do bi hêz û têkoşînê ciwanan no sîstem vînî bikero."

 

Meclîsê Ciwanan ê Partîya Demokratîke ya Şaran (HDP) vizêr Amed de kongreya xo ya 3ine viraşt. Xeylêk şaristanê Tirkîya û yê herême bi seyan ciwanî beşdarê kongre bî. Ciwanê ke bi cil û belgê xo yê adetî eywane pir kerdî û bi hêz û coşêk pîl kongreya xo kerdî. Cinîyê ciwanê ke beşdarê kongre bî dîyar kerdî ke pêwa teda û polîtîkayê şerî yê taybetî ciwanan bi hêz û vindertişê xo bî cewab.

 

'Êdî ciwanî yenê û demê ciwanan o' 

 

Medya Mehmetoglu vat, bi kelecanî beşdarê kongre bîya û wina dewam kerd: “Semedê kongre xeylêk amadekarî ameyî kerdiş û rastî zî amadekarî û keda ke ameye dayîş eywan de vejîya werte. Ganî bêro zanayîş ke ciwanî tîya yê. Her çiqas biwazê ciwanan bêveng bikerê zî do ciwanî hemverê nê tedayan bi yew vengî xo ver bidê. Êdî ciwanî yenê û dem demê ciwanan o. Ma do bi rayberîya cinîyan ê ciwanan hemverê polîtîkayê lêşinî ke serê ciwanan de yenê kerdiş, bibê cewab. Nêwazenê ke rayrayîşê demokrasî de ciwanî ca bigîrê. Semedê nê bîyayîşê ma rê hêriş kenê. La ma serê lingan de yê û têkoşînê xo rê tavîz nêdanê. Ma bi ciwantî dest pêkerd û ma do bi ciwanan serbikewê."

 

'Do bi hêzê ciwanan no sîstem vînî bikero'

 

Dîcle Akti zî wina vat: “Enerjîya ciwanan zaf a û bi coş ê. Xeylêk teda û hêrişî serê ciwanan de estê. Tim vengê ciwanan ameyo waştiş ke bêro qûtkerdiş. Ganî ciwanî tim serê lingan de bê û hêzê xo tewr pîl bikerê. Bi hêz û têkoşînê ciwanan do no sîstem vînî bikero."

 

'Ma tîya yê' 

 

Ayşe Beyar zî wina qisey kerd: “Mi bawer nêkerdêne hende hêz û coşêk pîl bi ca bêro. Verê zî ez şibîya mîtîng û kongreyan. Labelê ewro coşêk girseyî bi û moral û motîvasyonêk pîl da derûdor. Ganî semedê ciwanan tim bername û şayîyê nê şiklî bêrê kerdiş. Enerjî û hêzê ciwanan xeylêk weşê mi şi. Ez zî sey cinîyêke ciwane xo hîna bi hêz hîs kena. Her çiqas vengê ciwanan bêro birnayîş zî ma sey ciwanî vengê xo tewr berz kenê û ma vanê ma tîya yê."

 

'Ganî ma têkoşînê xo tewr berz bikerê'

 

Tewr peyîn Rojda Yaşar qisey kerd û vat: “Hêvîya ma ya ciwanan pîl a. Her çiqas problemî zaf bibê zî ma hêvîya xo vînî nêkenê. Ganî ma têkoşînê xo tewr pîl bikerê. Bîyayîşê xo rê wayîr vejîyê. Eke ma xo bi rêxistin bikerê do têkoşînê ma zî pîl bibo. Eke ma pîl bibê do şerê ma zî pîl bibo. Bi polîtîkayê şerê taybet yeno waştiş ke ciwanan têkoşîn ra dûr bifînê. Ganî ma zêde bibê û bi têkoşînê xo yê rêxstinkerde zorê nê polîtîkayan berê."