AMED - Parlementera HDPyî Meral Daniş Beştaş semedê paştdayîşî nobeta Edaletî serdayîşê keyeyê tepişteyan kerd û vat: “Hemverê binpaykerdişê heqan lazim o ma pîya bibê vengê tepişteyan." 

 

"Nobeta Edaletî" ke hetê merdimê tepişteyan ra bi amancê tepişteyê nêweş û yê ke înfazê înan ameyo veşnayîş bêrê veradayîş, Awanîya Xizmetî ya Baroyê Amedî roja 40ine de dewam kena. Semedê paştdayîşî serdayîş her ke şino zêde beno. Ewro zî parlementera Partîya Demokratîke ya Şaran (HDP) ya Sêrtî Meral Daniş Beştaş û keyeyê tepişteyê siyasî serdayîşê nobete kerdî.

 

‘Ganî ma hîsgêr nêzdî bibê’

 

Merdimê tepişteyan ra Meryem Turan ke serdayîşê nobete kerd qisey kerd û vat: "Ez sere de tecrîd û binpaykerdişê heqan ê zîndanan şermezar kena. Ez sey nasê tepişteyan ewro semedê paştdayîşî tîya ya. Ganî heme kurdî na babete de hîsgêr nêzdî bibê. Semedo ke heqê tepişteyan tewr zêde nêrê binpaykerdiş û semedê cenaze nêvejîyê ganî ma înan rê bibê veng."

 

‘Lazim o ma bibê veng’

 

Parlamentere Merale zî wina vat: "Hemverê îşkenceyî lazim o heme kesê huqûq û hukmî ra bawer kenê wayîrê zîndanan vejîyê. Semedê nê zî nobeta edaletî ya ameya destpêkerdiş xeylêk bierj o. Tu qenalê ke zîndanan qal nêkerdî. Ganî ewro ma bibê vengê înan û rewşa înan bîyarî ziwan."

 

Încî Guler û Reşahat Ada zî xêrameyîşê mêmanan kerdî û mesajê xo yê pîlkerdişê çalakî newe kerdî.