ŞIRNEX - Dayika Erkan Encu Felek Encu 42 serrî eynî ca de netîceyê teqîyayîşê mayîne de pîyê xo vînî kena. Feleka ke reya diyîn eynî qedere ciwîya, nêrazîbîyayîşê xo yê nêcaardişê edaletî rê mojna û vat: “No qirkerdiş demê AKPyî de ame kerdiş û berpirsyar ê yê.”

 

28ê kanûna 2011ine de dewa Roboskî ya Qilabanê Şirnexî de 34 kes ke xeylê xo tutî bî, wexto ke derbazê Herêma Federal a Kurdistanî bî û hetê teyaregehê şerî yê Arteşa Tirkî ra ameyî qetilkerdiş. Înan ra yew zî Erkan Encuyo 13 serre bi. Kesê ke dinyaya xo bedilnayî ra tewr qij o bi. Dimayê 34 kesê ke ameyî qetilkerdiş, yew kesa ewil bi ciwanê dewe ra seba cenazeyan bigîro şî serê sînorî dadîya Erkanî, Felek Encu bî.

 

Feleke roja qirkerdişî de keyeyê dadîya mêrdeyê xo de bîya û vengê teyareyan eşnawita, dima ra telefono ke qet nêwaşto cewab bido ameyo û musaya ke tutê ci ameyo qetilkerdiş. Pîyê Feleke serra 1979 de eynî ca de pay dayo serê mayîne û dinyaya xo bedilnayo. Cenazeya pîyê ci dewa Keşanî ya hetê sînorê Herêma Federal a Kurdistanî de ameya definkerdiş. Feleka ke tu wext gorê pîyê xo nêdîyo, dimayê bi serran eynî ca de eynî ‘qedere’ ciwîyaya. 

 

Karneya ey dimayê qetilkerdişî ameye

 

Dejê aye sey roja ewil newe yo, verê penceraya xo ke her çar hetê ci bi koyan girewto, pabeyê roja ke Erkan bêro ya. Keyeyo ke di qat o, dêsê ci bi kewe û sipî ameyo boyaxkerdiş û bi herfê pîlî nameyê Erkanî ameyo nuştiş. Demo ke ma kewtî zere vîrardişê Erkanî ma pêşwazî kenê. Feleke cilî, eşya, notî, kitab û karneya ey ke dimayê qetilkerdişê Erkanî ameya, sey roja ewil pabeya.

 

‘Ti do bicemidyê…’

 

Feleke demo ke vana “Bazirganiyê sînorî” qirkerdişê Roboskî yeno vîrê aye û wina vana: “Pî û kalê ma zî nê karî kerdûne. Serê na cografya de ti karêk bîn bikerê çin o. Ma nêvatêne ‘Bazirganiya sînor’ yan zî ‘qeçaxçîtî’, ma vatêne semedê nanê xo. Erkan di rey şi sînorê Herêma Federal a Kurdistanî. Embazê ey Bîlal estbi. Erkanî waya xo ra persa ‘Do Bîlal şêro?’ Mi zî nan dayîne tenûre ro, mi ci ra vat, ‘ti nêeşkenê şêrê.’ Semedê tersê leşkeran ney, vewre varayîne û mi vatêne do vera nê serdî de dayax nêkero. Lajê mi vat, ‘Wa Bîlal eşyanê mi zî barê estorî bikero, ez o zî ey dir şêrî.’ Mi ci ra vat, ti do bicemidtê. Vatêne, ‘Ganî ez semedê serrnewî pere kom bikerî.’ Mi waşt vernîye ci bigîrî la mi nêeşka.”

 

‘Tutê ma bi F-16 ameyî qetilkerdiş’

 

Feleke dewam de wina vat: “A roje ma nêzanê se bi û heme yewîneyê xo ra vejîyayî. Ez ameya mi werd de  Erkanî û semedo ke nêcemidyo cilan da pira. Merdimê ma keyeyê ma de bî, telefon ame mi rê û vatî, 'Leşkeran rayîr padayo’ Ez zî bi merdimanê xo dir vejîyaya teber. Dima ra ez şîya keyeyê vistewreya xo, ma vat, ma vejîyê serê rayîrî biewnê. Heme ciwanî uca de bî. Dima ra nîm saete derbaz bî. Mêrdeyê mi zî keyeyê cîranê mi de bi û dima ra ez reyna şîya keyeyê vistewreya xo. Hêrişê hawa de vernê de keye leqya, pencere ra veng vejîya. Mi tu rey vengêk wina nêeşnawitib. Ma bi reyke de qîrayîş kerd. Vistewreya mi vat, ‘Tutê ma şî’ û dest bi bermayîş kerd. Mi zî hewl da ke aye aşt bikerî û mi vatêne, ‘Çîyêk nêbîyo’. Dima ra xebere ameye ke tutê ma bi F-16 ameyê qetilkerdiş. Ez bermayîne, mi kerdêne qîrîn, lingê mi de şimik û sereyê mi de tu çîyêk çinbi. Ez bi a rewşa xo vejîyaya serê cade. Ciwanî ameyî û ez zî înan dir şîya sînor. Vernê de Serhat Encu ardî. Destê mi de elektrîkê destan estbi û mi hewl dayîne ke ez cenezayan rê biewnî. Heme ciwanî bermayîne. Serhat şibi rehm, labelê zince ey ra gonî ameyîne. Mi ciwanan ra vatêne lajê mi ça de yo û înan zî vatêne, 'cêr de mandê’. Labelê destûr nêdayî ke ez şêrî. Dima ra heme kesî ameyî û mi o wext tu zanayîş lajê xo ra nêgirewt.”

 

‘Mi nêeşka ez rîyê lajê xo ra biewnî’

 

Feleke dîyar kerd ke a şewa serd û bi vewre de bi lingê zitî a het ra û nat ra ma remayîne û pabeyê mijdiyanî bî û wina vat: "Bi serê siba, Roj TV neql kerd ke Roboskî de bombavaran bîyo. Dima ra ez reyke bîn bi erebeyêk şîya cayê qirkeedişî. Semedo ke rayîrî vewre ra amebî padayîş, dozere amî û rayîr akerd. Demo ke ez şîya cayê qirkerdişî heme cenazeyan rêz kerdibî. Labelê mi nêeşka ez rîyê lajê xo biewnî. Homa kesê ke nê dejî bi ma dayî antiş, bi înan zî bido antiş.”

 

‘Bomba ney bêedaletî bi sebebê kiştişê ma’ 

 

Feleke dewam de wina vat: “Vernîya Roboskî û dimayê Roboskî di prosesî ameyî ciwîyayîş. Roboskî verê zaf weş bi, her kes zerrîweş bi. Veyvî virazîyayîne. Dimayê  10 serran dima emsar reya ewil veyvêk virazya. Roboskî de xeylêk çî vuryayî. Tutê ma, ma û heme kesî xeylêk vuryayî. Heme kesî mîyanê hizûrî de bî. Dimayê Roboskî reya diyîn çîyo ke ma dejna û wêran kerd bêedaletî bi. Kesêk vengê ma nêeşnaweno. Heme kesî ker û lal bîyê. Labelê ma tena edalet wazenê. Bombeyan ma nêkişt; bêedaletî bi sebebê kiştişê ma.”

 

‘Edalet kuçeyê tarî yê Anqara de vînî bi…’

 

Feleke tewr peyîn wina vat: "Her serrgera qirkerdişî de qisey kenê. Parlementerê AKP û CHPyî rojê vîyarte de  Meclîs de vatêne, ‘Werrekna çîyêk wina nêbîne’. Eke serê nê de vindenê wa edalet bi ca bîyarê. No qirkerdiş demê AKPyî de bi ca ame û berpirsyar ê yê. Eke edalet bi ca nêro, do no sey lekeyêk serê mîyanê çimanê AKPyî de bimano, tu wext do nêşêro. Ma nêwaştêne ke Roboskî mîyanê kuçeyê tarî de vînî bibo. Labelê edalet kuçeyê tarî yê Anqara de vînî bi. Na dinya tu kesî rê nêmanena. Bi 10 serrî yo nê dejî ma sey roja ewil ciwîyenê.”