Sema Çaglak

 

AMED - Cinîyan dîqet ant serê rewşa tepişteyan, vatî wa tepişteyê nêweşî bêrê veradayîş û vengdayîşê wa hemverê nê zulmê şarî hêzê xo bi yew bikerê û wurzê serê lingan.

 

Zîndanan de bi taybetî hemverê tepişteyê kurdî yê sîyasî binpay kerdî, tedayî demê peyîn de vejîyayê sewîyeya tewr cor û tepişteyê nêweşî bi hawayêke bê huqûqî semedê binpaykerdişê heqan yew bi yew şinê rehm. Tepişteya bi nameyê Garîbe Gezera ke zîndanê Tîpê Fyê Hûmara 1in Kandirayî ra dima û hetê gardiyanan ra rastê tecawuzî ameye û îşkence dî, 9ê Kanûne de bi guman dinyaya xo bedilnaye. Dimayê demêk tepişteyo nêweşo giran Abdurezzak Suyur, Halîl güneş, Ilyas demîr hucreyê xo de şîbî rehm. Tewr peyîn zî zîndan de tepişteyo bi nameyê Vedat Çem Erkmen Zîndanê Tîpê Fyê Hûmara 2yîn Tekîrdagî ke cezaya muebetî ci rê amebî birnayîş û 374 serrî ceza dabî, hucreyê ke tede bi guman merde ame vînayîş.  

 

Reaksîyonê hemverê rewşa tepişteyan her ke şino zêdeyêr beno. Cinîyan dîyar kerd ke ganî tepişteyê nêweşî serbest bêrê veradayîş.

 

'Ma rewşa tepişteyanê xo ra endîşeyîn ê'

 

Merdima tepişteyî Selva Taş dîyar kerd ke di tepişteyê aye estê û vat: "Birayê mi û lajê mi tepişte yê. Rewşa lajê mi xeylêk xirab o. Kirikkaleyî de mendêne la dima ra ey surgunê zîndanê sîncanî kerdî. Şert û mercê ey zîndanî xeylêk xirab ê. Uca de hucreyê yew kesî de maneno. Gama ke ey Kirikkaleyî ra surgun kerdî, nêverdayî tu eşya û lazimîyê xo zî xo dir bero. Nêweşîya ey qelbî esta, la o nêbenê nêweşxane û tedawî nêkenê. No demêk derg o ma nêeşkenê pêvînayîşê akerde bikerê."

 

'Tepişteyî terkê mergî yenê kerdiş' 

 

Selva dewam de wina vat: “Tepişteyê nêweşî ke zîndanan de dinyaya xo bedilnenê, ma semedê înan zaf xemgîn ê. Ma tehlîyekerdişê tepişteyanê xo û bi taybetî yê nêweşan wazenê. Kam ci huqûq û edaletî de no esto. Tepişteyê nêweşî 70 serreyî û 80 serreyî zîndanan de şinê rehm. Ma nê qebul nêkenê. Ma verê tepişte û şarê xo de yê. wa tepişteyê ma teber de bêrê dermankerdiş."

 

'Ganî hemverê nê zulmî şar bibo yewhêz'  

 

Hanîfe Akin zî wina vat: “Ganî hemverê nê zulmî şar bibo yew hêz. Bi hezaran tepişteyê nêweşî estê ke rewşa xirab de yê. Înan tehlîye nêkenê, semedo ke tepişteyan ra tersenê. Heqê înan yeno binpaykerdiş. Dewlete hemverê tepişteyê nêweşan kerr û lal a. Ganî hemverê nê sere bêro wedaritiş. Tirkîya de ne edalet ne zî huqûq esto. Îqtîdar wazeno ke tepişteyê sîyasî zîndanan de şêrê rehm. Coka tu çîyêk nêkenê. Ganî pêro şar na rewşe bivîno û vengê xo berz bikerê."

 

'Ma nê zulmî qebul nêkenê'

 

Melek Andîç zî vat, seba rewşa tepişteyan hewn nêkeweno çimê aye û vat: "Ma êdî roj bi roje xebera mergê tepişteyan eşnawenê. No zî ramojneno ke do rewşe tewr xirab bo. Ma nê zulmî qebul nêkenê. Ganî êdî ma heme wurzê serê lingan. Bi roniştiş tu çî nêşeno sere. Eke heme şar vera nê wurzo serê lingan, 24 saetan de no problem bêro çareserkerdiş."