Rojda Aydin

 

ŞIRNEX - Hatîce Înal dewa Melî de bi şixulnayîşê firine debara xo kena û tutanê xo weyî kena. Hatîce ke bi karê xo qeza de bîya fînak, bi xîretê xo hişêko cinî nêşenê kar bikerê vîyart. Seba Hatîce waştişêk muhîm o û vat: "Wexto cinî biwazê eşkenê ser kewê" 

 

Her cinîyêke hîkayeya ci esta. Bi hîkayeya xo zaf cinîyan rê benê hêz û fînak. Nînan ra yew zî Hatîce Înale ke 37 serrî ya. Hatîce qezaya dewa Melî ya Şirnexî de cuyena. Hatîce 7 serrî yo firinêke dana şuxulnayene û pê debara xo kena û 6 tutanê xo weyî kena. 

 

Hatîce bi eslê xo dewa Melî ra ya, tutîtîya xo ra heya nê emrê xo her tim xebitîya ya. Hatîce 19 serrîya xo de, bi zorê keyeyî yena zewicnayîş. Peynî ke zewecêna verpersîyarî, kar û barê aye zafêr benê. Hatîce 6 tutan ana dinya. Seba aye zafêr cuye zehmet bena, la reyêk hêvîya xo cuye ra nêbirnena. Hatîce seba debara xo bikero, reya ewilî keyeyê xo de dezgehê xo akena û dest bi viraştişê beqleweyan kena. Hatîce beqleweyê ke viraştê, rotê û pê debara xo kerdê. 

 

‘Xo rê cayê firine viraşt’

 

Hatîce, hetêk ra karê keyî kerdêne û hetêk ra zî beqleweyî viraştêne. Hatîce wina rewşa xo ard ziwan: "Di gîştê mêrdeyê mi çinî yê, seba ney zî  nêşeno her karî bikero. Pêwa viraştişê beqleweyan mi dest bi viraştişê Qehweyê Kizwanan zî kerd. La peynî wextêke êdî  bi viraştişê beqleweyan debare nêbîyêne. Êdî tutî pîl bîyêne, şîyêne mektebe û hewcedarîyê înan zafêr bîyêne. Seba nê mi qerar da ke ez karê xo êdî keye de ney, tever de bikerî. Seba na yewî mi firinêke akerd." 

 

‘Mi zorê şuûrê bîyaye berd’

 

Hatîce wina behsê akerdişê firine kerd: "No bî 7 serrî yo ez nê karî kena û nan pojinena. Ez  pê debara xo kena. Mi bi qenatê xo zorê şuûrê bîyaye berd. Seba ke karê firine sey karê mêrdan ameyêne vînayîş. Ez seba tutanê xo bi keda destê xo xebetêna. Ez bi karê xo serberz a û serê linganê xo de vindena. Sewbîna kesê ke yenê firine zî, keyfweşîyê xo anê ziwan. E, cuye zehmet a la cinî eşkenê duştê her  zehmetîye cuye de ser bikewê." 

 

‘Karêko zehmet o’

 

Hatîce, ramojna ke karê firine zî, sey heme karê bînî zaf zehmetê û wina behs kerd: "Bi rastî zî no kar zaf zehmet o. Serê sibayî saete 03.00 de wurzena we û yena firine. Ez peynî de mîr kena, nanê xo pojena. Ez heya saete 18.00î tîya de xebetêna. Wexto şina keye zî seba tutanê xo werd virazena û karê keyî kena. Him keye de û him zî tever de xebetêna." 

 

‘Ar û dar bîyî vay’

 

Hatîce, dewam de wina vat: “Eynî wextî de krîzê ekonomî tesîr serê mi de zî kerd. Semedo ke vayîya înan xeylêk bîya zêde, ma nêeşkenê bigîrê û şar zî nêeşkeno nan bigîro. Semedê nê krîzî ma zî kewtî mîyanê tengî. La mecbûrî ez reyna yena nanê xo pewijnena. Semedo ke ganî ez debara xo bikera. La reyna zî qîm nêkeno. Ma nêeşkenê lazimîyê xo bi ca bîyarê. Ma xeylêk kewenê zirar. Dimayê vayîye rotişê nanî zî kêm bi. Semedê debara xo sey karêk alternatîf mi dest bi viraştişê qehweyê kizwanan kerd.”

 

‘Darê ma yê kizwanan ameyî veşayîş’

  

Hatîce qalê darê kizwanan kerd û vat: “Ez kizwanê xo ana erzana firine, qelênena. Dima ra bena kena makîne. Ez bi kizwan qehwe, sabûn û rûn viraznena. Sewbîna bi rûnê kizwanan merhem zî viraznena û înan zî roşena. Ma kizwanan gênê. Emsar heme darê ma yê kizwanan ê Koyê Cûdî ameyî veşayîş û birnayîş. Emsar kizwanî xeylêk kêm bî.”

 

Hatîce, wina qiseykerdişê xo qedêna: "Ez wazena cinî muhtacê camêrdan nêbê. Ganî cinî bi kar û barê xo serberz bê. Cinî eşkenê her tewir kar bikerê. Coka wa nêvajê ez nêeşkena.”