STENBOL - Vedat Çem Erkmen Zîndanê Tekîrdagî de hucreyê yew kesî de dinyaya xo bedilna. Bê keye û avûkatan karê otopsî ame kerdiş, wesayîtê cenaze û tabût nêame dayîş.

 

Tepişteyo bi nameyê Vedat Çem Erkmen ke Zîndanê Tîpê Fyê Hûmara 2yîn ê Tekîrdagî de bi cezaya giran û 374 cezaya ci rê ame dayene, hucreyê xo bi hawayêke guman dinyaya xo bedilna. Îdarekarê zîndanî vizêr saete 21.00 de bi rayîrê telefonî keyeyê Vedatî gêrayî û xebera întîxarî neql kerdî. Demo ke keyeyê  Vedatî û avûkatê Komeleya Heqê Merdiman (ÎHD) û Komeleya Huqûqnasê Azadîwaştoxan (OHD) ver bi zîndanî de şî, otopsîyê Vedatî vera ke bendeyê avûkat û keyeyê ci bimanê ame kerdiş.

 

Endamê Komîsyonê Zîndanî yê  OHD Şubeyê Stenbolî avûkat Gurkan Îstelî hesabê xo yê medyaya dîjîtalî de reaksîyonê rewşe da û vat: "Çi kamî ra niminenê! Ma bi saetan mabêne zîndan, edliye û nêweşxaneyî de şî û ameyî, zîndanî heme waştişê ma yê pêvînayîşî red kerdî, dimayê saetan ma eşka xo biresnê dozgerîya nobedar û heta nika ma cenaze teşhîs kerd û girewt." 

 

Gurkan dîyar kerd ke Vedat Erkmeno ke çend rojî verê odayê xo ra ame vetiş û bi bahaneyê asayîşê canê ey çin o, berdî hucreyê yew kesî û wina vat: "La bi eşkereyî Vedat ame qetilkerdiş. Vedato ke semedê bi nameyê 'asayîşê cuye' odaya xo ra ameyo vetiş, çira ganî 'întîxar' bikero? Vedat roja îne birayê xo ra vatibi demê 23yê çeleyî yeno pêvînayîşo akerde derheqê îdarekarê zîndanî de serdayîşê sûcî bikero."

 

Gurkan, dîyar kerd ke wesayîtê cenaze ke semedê Vedat waştê nêameyo dayîş û wina vat: "Semedo ke Vedat tepişteyo sîyasî yo wesayîtê cenaze nêame dayîş. Tabûtêk zî nêdayî Vedatî."

 

Keyeyê Vedatî bi îmkanê xo wesayitê cenazeye girewt û berdî Mudûriyetê Goristanê Kuçukçekmeceyî. Keye û merdimê Vedatî dimayê şitişî do cenaze berê Komeleya Dîgor Dagpınar ê Esenyurtî. Cenaze dima ra do berê  bajarê ey Qersî.