Sema Çaglak

 

RIHA - Emîne Şenyaşar reaksîyon vera zabitnameyê teşhîsî yê diyarkerdişê “kerdox nê dîyar” da û wina vat: “Her çî verê çiman de yo, no qetlîam verê çiman de ame kerdiş. Şima suc kenê. Ma nê zulmî qebul nêkenê. Dozgerî şîrikê nê qetlîamî yê."

 

Qezaya Pirsûsî ya Rihayî de pawitox û merdimê Parlamenterê AKPyî yê Rihayî Îbrahîm Halîl Yildiz 14ê Hezîrana 2018 de hêrişê ferdê Keyeyê Şenyaşarî kerdî û hîrê ferdê keyeyî ameyî kiştiş. Emîne Şenyaşar û lajê xo Ferît Şenyaşar ke hîrê ferdê keyeyê înan ameyî qetilkerdiş, 9ê Adare ra semedo ke edalet bi ca bêro, verê Edliyeyê Rihayî de Nobeta Edaletî gênê.

 

Dozgerîya Rihayî reya hîrên semedê teşhîskerdişê kiştoxan Emîne Şenyaşar û lajê ci Ferît Şenyaşar semedê teşhîsî û keye semedê teşhîsê kiştoxan 8ê Kanûne de şi Mudurîyê Polîsan ê Rihayî. Zabitnameyê teşhîsî de zî wina ameyo vatiş: "Semedê roşnkerdişê serebûtê kiştişê bi qestî û birîndarkerdişê kerdoxê nêdîyar yê Nêweşxaneyê Dewlete ya qezaya Pirsûsî yo.”

 

Keyeyê Şenyaşar zî îfadeyê semedê teşhîskerdişî de dîyar kerdî ke serra 2019 ra tepya karê teşhîskerdişî de tu averşîyayîş nêvirazya yo û neql kerdî ke teşhîsê kenê semedê muhakemeyê Meletî nêbeno babeta muhakemeyî. Sewbîna keyeyî îfadeyê xo de wina vato: "Dimayê 3 serrî û nîm teşhîskerdişê derheqê babete de tu feydeyê înan çin o. Nê prosesî de teşhîsê ke yenê waştiş, bi nîyetêk xirab yenê kerdiş." Keyeyê ke nê îfadeyî da teşhîsê ke ame waştiş nêkerdî û reaksîyon ramojnayî.

 

'Çi niminenê wa eşkera bikerê' 

 

Derheqê babete de Emîne Şenyaşar ajansê ma rê qisey kerd û vat: "Çend rojî verê reyna waştî ke ma teşhîs bikerê, la ma nêşî. Ma ra vanê ke ma nêzanê kamî qirkerdiş kerdo. La ê ma başêr zanê ke se bîyo. Îfadeyê ma estê, îfadeyê şahidan esto. Ma hîrê rey şî semedê teşhîsî. La vanê ke kiştoxî dîyar nîyê. Çi niminenê wa eşkera bikerê. wa qeydê nêweşxane vejê."

 

'Dozgerî şîrikê nê qetlîamî keno'

 

Emîne dîyar kerd ke yê ke nê zulmî kenê wa hesab bidê û vat: "Ma nêzdîyê serrêke tîya roniştê. Çira nê zulmî ma rê kenê. Her çî verê çiman de yo, o qetlîam verê çiman de yo. Şima suc kenê. Ma nê zulmî qebul nêkenê. Dozgerî şîrikîyê nê qetlîamî keno. Wa yê ke tutê mi kiştê, bêrê tepiştiş û muhakemekerdiş. Wa lajê mi serbest vera bidê. Kesê ke qetlîam kerdî nika serbest gêrenê û înan rê tu çîyêk nîno kerdiş. Edliye ma rê qedexe kerdê. Lajê mi odayêk tena de yo. No çi edalet û çi dewlete ya."

 

'Vera ke kiştoxî bêrê muhakemekerdiş ez yena muhakemekerdiş'

 

Emîne tewr peyîn wina vat: “Her ke şino nêweşîyê mi giran benê. Pêwa nê nêweşîyan ez dewaya keyeyê xo kena. Semedo ke edalet bi ca bêro têkoşîn kena. Edalet tena semedê mi nîyo semedê heme kesan lazim o. La mi rê dewa yena akerdiş. Mi benê qereqole û dadgehan. Her roje polîsî bi ma zulm kenê. Ma kenê abluqa. Çira kiştoxî nînê tepiştiş, çira yenê pawitiş. Wijdanê nê hukmatî çin o. Ez fek dewaya xo ra vera nêdana û heta ke lajê mi zîndan ra nêvejîyo û kiştoxî nêrê tepiştiş û muhakemekerdiş verê berê edlîye ra nêşina."