WAN - Keyeyê ke tewrê Nobedeta Edeletî ya ke merdimê tepişteyan dabî destpêkerdiş, bi dîyar ke çiqas qelebalix bibo do hende veng bêro eşnawitiş û vengdayîşê wayîrvejîyayîşê çalakî kerdî.

 

Merdimanê tepişteyan, seba tepişteyê nêweşan û tepişteyê ke înfazê înan ameyo veşnayîşî û nînê tehlîyekerdiş bêrê veradayene, Awayîya Xizmetê ya Baroya Wanî de çalakîya 'Nobeta Edaletî ya seba Tepişteyanê Nêweşan' dayo destpêkerdiş û hewteyêk peynîya xo de verda. Roja çalakîye ke ameya destpêkerdişî merdimê tepişteyan bê vindarnayîşêk, bi qerarêk waştenê xo anê ziwan û daxilbîyayîşê nobetan roj bi roj zafêr benê. Keyeyê nobete de yê  vengê daxilbîyayîşê çalakîye kenê û wina vanê: "Ma pêro  destê xo bidê yewbînî û veng bikerin û vajin êdî bes o."

 

‘Nêşenê şêrê nêweşxane û nêşenê dermanan biherênê’ 

 

Tepişteyo bi nameyê Îbrahîm Alkan 67 serrî emrê ci yo û hîrê serrî yo Zîndanê Tîpê Fyî yê Wanî de tepişteye yo û nêweşê kezebe, tansîyon û şekirî yo. Cinîya ey Dilşah Alkan yew merdima tepişteyana ke çalakîye de ya. Dilşahe eşkera kerd ke ganî mêrdeyê aye bêro dermankerdene la yeno astengkerdene û wina vat: "Zîndanan de bi hezaran tepişteyê nêweşî estê. Seba şêrê neweşxane tewr tay des reyî waştişnameyan danê, berê neweşxane zî nêşenê derman biherênê. Ma nêwazenê kes bimiro. Ma aştîye wazenê. Gelo do no heya kamci wext bidomno." 

 

‘Hêzê ey nêmendo’

 

Dilşahe eşkera kerd ke 7 serrî û 6 mengî ceza mêrdeyê ci rê ameya dayîşî la seba nêweşî, hêzê ey yê zîndanî de bimano nêmendo û nê çî vatî: “Ma wazenê tepişteyê nêweşî pêro bêrê veradayîş. Zafêrî tepişteyî temamê cezaya înan qedîyaya la nînê veradayîş. Ma dest bi nobete kerd. Wa herkes destê xo bido serê wujdanê xo. Êdî bes o. Wa peynîya nê zilmî bêro. Bêrê ma pêro pîya nê zilmî ra vajin bes o." 

 

‘Ganî keyeyê tepişteyan daxil bibê’

 

Tepişteyo nêweş Sînan Dayan zî 35 serrî ceza ci rê ameya birnayîşî. Dadîya ey Zeynep Dayane dîyar kerd ke lajê aye 5 serrî û 4 mengî yo tepişteye yo, nê prosesî de di rey emelîyat bîyo û wina rewşa lajê xo îzah kerd: "Lajê mi Zîndanê Tîpê Fyî yê Wanî de tepişte yo. Di aşmî yo qoxuşê karantîna de yo. Nika rewşa ey senîn a  ma nêzanê. 20 rojî yo telefon nêkerdo. Mi emsar di rey lajê xo vîna yo. Seba nêweşo, kenê qoxuşa karantîna ye. Heya karantîna de yo, wa verê ma de bo. Ma weştir ewnîyenê ci ra.”

 

‘Belkî vengê ma bêro eşnawitiş’

 

Zeynebe dîyar kerd ke semedê vengê tepişteyan bidê eşnawitiş, dest bi nobeta edeletî kerdê û vat, ê keyeyan ra paştdayîş pawenê û wina qedêna: “Ma çiqas qerebalix bê do hende vengê ma vejîyo. Wa tutanê ma vera bidê. Ma wazenê keyeyî tewr bibê. Belkî ma çareserîyêk bi no hawa bivînê.”

 

‘Ma pîya edelet biwazê’

 

Dayîka Emrah Abî ke 66 serrî ceza girewto û 10 serrî yo tepişte yo, Asya Abî zî wina vat: “Ez semedê edeletî ameya tîya. Emrah zîndanê Wanî de mendêne, surgunê Osmanîye kerdî. Di mengî yo nêvînena. Sebebê ke na ceza birnayê, Kurdbîyayîşê ey yo. Ez zî wazena keyeyê bînî beşdar bibê û edelet pîya bîyarê.”